Ka Tongeni Lúkúlúk Wóón Lamalam ren Pekin Moni?
Estelle * a kan fiffiti fel me a wor fúmén néún. A apasa: “Ua ereni emén néúwisin ai we lamalam pwe ua mochen káé ewe Paipel.” Iwe nge, ese fókkun áiti ngeni. Ló, ló, ló, a kaúló le feffel. A pwal apasa: “Ekkewe néúwis ra erá pwe ika use tongeni fiti fel, iwe upwe chék titiiló moni. Ua ekieki, ‘Iir rese alamota ai fiti fel, nge ra chék mochen angei nei moni.’”
Iei alon Angelina, emén mi achocho le fiffiti lamalam ren fansoun langattam: “Lón ai we lamalam, iteiten an fis ám fel ra assawa eú pasikit fán úlúngát me iteitan ra mochen aupwe uwoulóng moni lón. Ra kan chék tittingor moni fansoun meinisin. Ua pwisin ereniei, ‘Án Kot we manaman mi fel ese nónnóm ren ekkeei aramas.’”
Ekkewe lamalam lón leeniom we ra kan eriáni aramas lón sókkópaten napanap ar repwe ngeniir moni? A itá tipeeú ngeni met Paipel a apasa?
IFA ÁITIEN EWE PAIPEL?
Jesus, ewe chón poputááni ewe lamalamen Chón Kraist, a apasa: “Oua angafatei . . . oupwe pwal fangafat.” (Mateus 10:8) Ewe pwóróus lón Paipel a fókkun aúchea ese tongeni mé ren moni, me itá epwe kawor ngeni meinisin mi mochen káé.
Ifa usun ekkewe popun Chón Kraist ra ataweei án ewe mwichefel moni towu?
Emén me emén leir a ‘fang en me usun mefien letipan. Esap fangürüfituk ika fang fän echimw. Pun Kot a echeni eman mi pwapwa le lifang.’ (2 Korint 9:7) Ewe aposel Paulus a apasa: “Äm aia angang lerän me lepwin pwe aisap aweiresikemi lupwen aia afalafala” ewe kapas allim. (1 Tesalonika 2:9) Paulus a ffér imw mangaku pwe epwe atufichi i lón an angangen afalafal.—Föför 18:2, 3.
FÉFFÉRÚN CHÓN PWÁRAATÁ JIOWA A TIPEEÚ NGENI EKKENA ÁITIEN PAIPEL?
Chón Pwáraatá Jiowa ra kan mwichfengen lón ekkewe sókkun imw ese tokorárá, iter Leenien Mwich. Ifa usun ra ataweei án ewe mwichefel moni towu? Rese fókkun assawa sepien asor. Rese pwal einetawu futo pwe aramas repwe amasoua moni. Nge ika emén a aúcheani ewe prokramin káit seni Paipel, a tongeni waalong an monien álillis lón ewe pworun asor lón ewe Leenien Mwich nge sap mwen mesen aramas.
Itá úrúrún, ifa usun lamalam epwe ataweei an moni towu?
Sia weweiti pwe mi lamot moni fán iten fférún ei puk me titiilóón. Iwe nge esap mwo fán eú óm kopwe kúna och minen advertise are tingoren moni me lón. Nge a fen menlapei esilefeiliin ewe enlet lón Paipel.
Met meefiom, ekkeei kókkót ra tipeeú ngeni met Jesus a apasa me ewe leenien áppirú ekkewe popun Chón Kraist ra isetiw?
^ Ekkóch it lón ekkeei lesen ra fen siwil.
