A weires ngeni ekkóch aramas ar repwe tongei Kot. Ra ekieki pwe rese tongeni weweiti Kot me Kot ese áfánni aramas are a pwal mwo nge kirikiringaw. Álleani ekkeei pwóróus fan:

• Iei alon Marco seni Italy: “Ua iótek ngeni Kot ren álillis nge ua meefi pwe ese áfánniei me i emén use tongeni weweiti. Use ekieki pwe Kot i emén mi wor memmeef ren.”

• Iei alon Rosa seni Guatemala: “Inaamwo ika ua fókkun mochen angang ngeni Kot nge usun itá use tongeni weweiti i. Ua ekieki pwe Kot emén mi kirikiringaw me a kan apwúngúkich. Use lúkú pwe Kot mi tong.”

• Iei alon Raymonde seni Canada: “Lekúkkúni, ua lúkú pwe Kot a kúkkútta mwáállich kewe me a kan mmólnetá le apwúngúkich atun mi fich. Mwirin, ua ekieki pwe Kot ese áteneki aramas. Kot a usun emén meilap mi ekkemmweni aramas nge ese wesewesen áfánniir.”

Met óm ekiek? Aramas rese tongeni tongei Kot? Fitepúkú ier lóóm, Chón Kraist ra pwal eáni ena kapas eis. Ren enletin, seni ekkewe ier 500 ngeni 1500, lap ngeni aramas lón ekkewe fénú mi erá pwe iir Chón Kraist rese pwal mwo nge iótek ngeni ewe Kot mi Lapalap. Pwata? Pokiten aramas ra fókkun niwokkusiti Kot. Iei alon emén sou uruwo Will Durant: “Epwe ifa usun án emén mi tipis epwe iótek ngeni emén mi fókkun eniwokkus me ese áfánni aramas?”

Met a efisi án aramas ekieki pwe Kot i emén mi “eniwokkus me ese áfánni aramas”? Met ewe Paipel a wesewesen apasa usun Kot? Óm silei ewe enlet usun Kot, epwe tongeni atufichuk le tongei i?