Neman ka ekieki: ‘Ika Kot a silei mettóch meinisin kapachelong minne sia ekieki me ach osupwang, epwe itá met lamoten ach sipwe pwal iótek?’ Mi pwal pwúng ena kapas eis. Esap pwe Jesus a erá pwe Kot “a fen silei met oua osupwang ren, mwen ousamwo tüngor ngeni”? (Mateus 6:8) King Tafit lón Israel lóóm a mirititi ei mettóch, iwe a makkeei: “Mwen ai üsamwo kapas, en, ai Samol mi Lapalap, ka fen unusen silei mine üpwe apasa.” (Kölfel 139:4) Ina minne, itá met lamoten ach sipwe chúen kul ngeni Kot lón iótek? Ren an epwe pélú ena kapas eis, sipwe nengeni met Paipel a apasa usun án ekkewe chón fel ngeni Kot iótek. *

Inaamwo ika ewe Paipel a erá pwe Jiowa * Kot a silei mettóch meinisin, nge a pwal áiti ngenikich pwe ese chék mochen silei pwóróusen chón fel ngeni. (Kölfel 139:6; Rom 11:33) Án Kot tufichin chechchemeni mettóch meinisin esap usun eú computer mi chék ioni sókkópaten pwóróus usun aramas nge sanne a wor an memmeefin tong ngeniir. Nge Kot a fókkun áfánni alóllóólun masouen letipach pún a mochen ach sipwe arap ngeni i. (Kölfel 139:23, 24; James 4:8) Ina ewe popun Jesus a pesei néún kewe chón tapweló mwirin ar repwe iótek inaamwo ika Seman we a fókkun silei ach kewe osupwang. (Mateus 6:6-8) Ika sia ukkuwawu meefiach ngeni ewe Chón Férikich, epwe pwal péchékkúleló ach mochen arap ngeni i.

Fán ekkóch, eli a weires ngenikich ach sipwe silei met sia mochen tingorei Kot. Lón ekkena atun, Kot ese chék nengeni ach kewe memmeef mi nóm lón letipach sise pwár ngeni, nge ren an silei mettóch meinisin usun nónnómuch a ataweei met sia osupwangan. (Rom 8:26, 27; Efisos 3:20) Lupwen sia mirititi pwe Kot a fen álisikich lón pwisin manawach, pwal mwo lón ekkewe napanap sise mwittir tepereni, iwe sia mochen pacheéch ngeni i.

Ewe Paipel a alúkúlúkúkich pwe Kot ewe mi Unusen Manaman a aúseling ngeni án néún kewe chón angang mi tuppwél iótek, nge a pwal áiti ngenikich ekkewe popun ese aúseling ngeni ekkóch iótek. Áwewe chék, lón fansoun Israel lóóm lupwen a chéúfetál ewe angangen akkachofesá, Kot a akúnéú ewe soufós Aisea an epwe ereni ekkewe aramas: “Lupwen oua fen kapaspat lon ämi iotek, üsap fokun aüseling, pun oua lepöücha ren ämi niela aramas.” (Aisea 1:15) A ffat pwe Kot esap tongeni etiwa án ekkewe ekkóch iótek, chókkewe mi oputa an kewe allúk are iótek fán limengawen letiper.​—Än Salomon Fos 28:9; James 4:3.

Nge ewe Paipel a apasa: “Are sia tüngor och mine a fich ngeni letipan, a aüselingakich.” (1 Johannes 5:14) Iwe, itá weween pwe Kot a kan chék mwittir pélúweni án ekkewe chón fel ngeni tingor meinisin? Aapw. Nengeni pwóróusen aposel Paulus, a tingormaú ngeni Kot fán úlúngát an epwe angei seni ‘eu samau a fokun metek’ ren. (2 Korint 12:7, 8) Neman a úri Paulus och semmwen lón mesan. Ese mwáál a fókkun elichippúng  me ren! Pún a wor an tufich me ren Kot le echikaraatá aramas me pwal mwo nge amanawasefáli ekkewe mi máló, nge i epwe chék likiitú lón pwisin an semmwen. (Föför 19:11, 12; 20:9, 10) Inaamwo ika Kot esap pélúweni án Paulus tingor lón ewe napanap a ekieki, nge fán kilisou a etiwa minne chék Kot a pélúwen ngeni.​—2 Korint 12:9, 10.

Pwúngún pwe ekkóch aramas lón Paipel Kot a pélúweni ar iótek ren an féri eú manaman. (2 King 20:1-7) Nge esap iteitan a fis ena, pwal mwo lón fansoun lóóm. Ekkóch chón lúkú ra meefi osukosuk pún usun itá Kot ese pélúweni ar iótek. King Tafit a eis: “Ifa ükükün fansoun om kopwe manlükieila? Ifa usun, kopwe manlükieila tori feilfeilachök?” (Kölfel 13:1) Nge lupwen ena mwán mi tuppwél, Tafit, a chechchemeni án Jiowa seláni fán chómmóng, iwe a pwal péchékkúlsefál an lúkúlúk wóón i. Lón ena pwal chék iótek, Tafit a erá: “Üa anomu ai apilükülük won om tong ellet.” (Kölfel 13:5) Usun chék Tafit, eli epwe lamot ngeni néún Kot chón angang ikenái ar repwe likiitú le ikkiótek tori ar repwe mirititi án Jiowa pélúweni ar iótek.​—Rom 12:12.

Kot a pélúweni ach kewe iótek ren an ngenikich met sia wesewesen osupwangan.

Fán ekkóch ren och popun mi múrinné, ekkewe sam me in mi tong rese kan ngeni néúr kewe met ra tingorer lón chék ewe atun ra tingor. A pwal ina usun Kot, neman esap pélúweni ach iótek lón chék ewe napanap are ewe atun sia ekieki itá epwe pélúweni. Nge sia tongeni lúkúlúk pwe ewe Chón Férikich, usun emén sam mi tong, epwe awora ngenikich met sia wesewesen osupwangan lón ewe napanap me ewe fansoun mi fich ngeni.​—Lukas 11:11-13.

Kot a tongeni pélúweni ach iótek lón ewe napanap sise mwittir tepereni.

Iwe nge, met ika sia tingor án Kot álillis pwe sipwe ngaseló seni och weires mi chék sópwósópwóló? Itá sipwe ekieki pwe pokiten chék Jiowa ese mwittir angasakicheló seni ach weires, iwe weween ese pélúweni ach iótek? Epwe fen múrinné ach sipwe ekieki ika Kot a fen álisikich lón ekkóch napanap nge sise chék mwittir tepereni. Áwewe chék, neman emén chiechiach a achocho úkúkún an tufich le álisikich lón ewe atun sia fókkun osupwangen álillis. (Än Salomon Fos 17:17) Mi tufich án Jiowa epwe amwékútú chienach na an epwe álisikich? Pwal och, án Kot álillis a tongeni feito seni ach álleani ewe Paipel. Lón ach állea sia tongeni kúna och emmwen epwe álisikich le likiitú fán ewe osukosuk sia nónnóm lón.​—2 Timoty 3:16, 17.

Fán chómmóng Kot a ngeni néún kewe aramas ewe péchékkúl epwe tongeni elikiitúúr fán ar kewe osukosuk, lap seni an epwe angasereló seni. (2 Korint 4:7) Áwewe chék, lupwen Jesus a tingormaú ngeni Seman we an epwe angei seni ewe riáfféú pokiten an lólilen ren an epwe itengaw iten Kot we, Jiowa a tiinaato emén chónláng an epwe apéchékkúla Néún na. (Lukas 22:42, 43) Pwal ina chék usun, Kot a tongeni néúnéú emén chiechiach an epwe apéchékkúlakich lón ewe fansoun sia kon meefi apwangapwang. (Än Salomon Fos 12:25) Pokiten ei esin napanap sise kon mwittir tepereni, iwe a lamot sipwe nennengenifichi ekkewe atun Kot a pélúweni ach kewe iótek lón sókkópaten napanap.

Kot a pélúweni ach iótek lón ewe fansoun mi fich me ren, iwe fán ekkóch a lamot sipwe witiwit.

Ewe Paipel a erá pwe ewe Kot mi Unusen Manaman a álisi ekkewe mi tipetekison “lon an fansoun mi fich.” (1 Petrus 5:6) Ina minne, ika sia meefi pwe usun itá a mmang án Kot pélúweni ach tingor, sisap ekieki pwe Kot ese áfánnikich. Nge pokiten ena Chón Férikich mi tong a silei mettóch meinisin, ese mwáál a ekieki ach kewe tingor me ren met a silei usuch me epwe féri met epwe fókkun échitikich.

Áwewe chék: A wor emén noum kúkkún át nge a tingoreok kopwe kamé waan bicycle. Kopwe itá mwittir awora an na tingor? Ika ka meefi pwe esaamwo mirit an epwe tongeni wani efóch bicycle me silei túmúnún, iwe, neman kosap mwo kamé. Nge neman mwirin och fansoun ika ka meefi pwe a fich ngeni an epwe wani efóch bicycle, iwe ka awora ngeni. Pwal ina chék usun Kot, neman epwap ‘ngenikich mochenin lelukach’ lón ewe fansoun mi fich me ren ika pwe sia achocho le ikkiótek.​—Kölfel 37:4.

Ewe Paipel a pesei ekkewe Chón Kraist mi enlet ar repwe chék lúkúlúk pwe mi lamot ewe mettóch iótek. Nge neman ekkóch repwe erá: ‘A mecheres ach sipwe apasa ena nge a weires ach sipwe féri.’ Pwúngún pwe ika a chék sópwósópwóló ach weires are sia likiitú fán án aramas kirikiringaw ngenikich, neman epwe weires ach sipwe wikkitiwiti án Kot epwe pélúweni ach iótek. Iwe nge, sipwe chechchemeni áitien Jesus usun ach sipwe ikkiótek.

Jesus a eáni ewe kapas áwewe usun emén fefin mi wéúngaw mi má pwúlúwan, a chék soun etto ren ewe soukapwúng mi kirikiringaw me tingorei an epwe álisi. (Lukas 18:1-3) Inaamwo ika akkomwan, ewe soukapwúng ese mochen álisi ena fefin, nge feil feil a ekieki: “Üpwe le alisi, pwe epwe pwäla an pwüng. Are üsap alisi, epwe chök sopwela le feito rei tori üpwe osukosuk ren.” (Lukas 18:4, 5) Me ren ewe popun kapas ei wokisin a mak lón, ewe soukapwúng a áfánni án ewe fefin tingor pwe ena fefin ete “afélú mesan,” are lón kapas áwewe, “ete itengaw” ren neminna. * Ika emén soukapwúng mi kirikiringaw a álisi emén fefin mi wéúngaw pokiten an ese mochen epwe itengaw ren, iwe ifa usun ren ewe Kot mi tong, esap pwal pwáraaló an pwúng ngeni ekkewe “aramas ra tingor ngeni nepwin me neran pwe epwe anisir”! Usun chék met Jesus a erá: Kot epwe “muttir anisir.”​—Lukas 18:6-8, Kapasen God.

Inaamwo ika fán ekkóch sia meefi pekkus le tittingor álillis, nge mi lamot sisap fangetá. Ach likiitú le ikkiótek a pwáraatá ach enletin mochen kúna án Kot epwe álisikich lón manawach. Ika sia pwal mirititi ifa usun Kot a pélúweni ach iótek, iwe epwe péchékkúleló ach riri ngeni i. Ewer, sia tongeni lúkúlúk pwe Jiowa epwe pélúweni ach kewe iótek mi tipeeú ngeni letipan ika sipwe ikkiótek ren lúkú.​—Lukas 11:9.