1, 2. Met sókkun napanap néún Jiowa kewe chón angang ra eáni?

 NÉÚN Jiowa kewe chón angang ra mosonottam le witiwiti pwénúetáán ekkewe oesini. Áwewe chék, Jeremaia a wikkitiwiti án chón Papilon ataieló Juta, iwe ena mettóch a fis lón ewe ier 607 mwen Kraist. (Jer. 25:8-11) Aisea a oesini pwe Jiowa epwe féri án ekkewe chón Jus mi eoló repwe liwiniti Juta, me erá: “Feiöchün chokewe meinisin ra anomu ar apilükülük won.” (Ais. 30:18) Mika a pwal wikkitiwiti pwénútáán án Jiowa kewe pwon me apasa: “Ngang üpwe neta ngeni ewe Samol mi Lapalap. Üpwe ösüküsükü Kot ai we Chon Amanau.” (Mik. 7:7) Ren fitepúkú ier, néún Kot chón angang ra pwal lúkúlúk pwe ewe Messaia mi pwonetiw, are Kraist, epwe waroto.​—Luk. 3:15; 1 Pet. 1:10-12. *

² Lón ei fansoun, sia pwal wikkitiwiti pwénúetáán ekkewe oesini usun án Jiowa we Mwú. Jesus, i kingen ena Mwú, ekiseló epwe seláni néún Kot kewe chón angang seni ei fénúfan mi efeiengaw. Epwe nieló ekkewe aramas mi ngaw me amóeló riáfféú meinisin. (1 Joh. 5:19) Ina minne, mi lamot ach sipwe ekkekieki  pwe ránin Jiowa we a tongeni war lón chék eú ekkeei rán, me sipwe féri úkúkún ach tufich pwe sipwe mmólnetá ngeni ena rán.

3. Ika a fen fansoun langattam ach wikkitiwiti warotoon ewe sópwólóón, met sia tongen poputá le ekieki?

³ Sia fókkun ésúkúsúkú ewe rán lupwen letipen Kot epwe pwénútá wóón fénúfan. (Mat. 6:10) Nge ika a fen fite ier ach wikkitiwiti an epwe fis ewe sópwólóón, eli sipwe tongeni poputá le ekieki, ‘Mi chúen lamot ach sipwe wikkitiwiti me ekieki pwe ewe sópwólóón a chék arapoto?’

4. Pwata a lamot ach sipwe “mamasa”?

⁴ Jesus a allúk ngeni néún kewe chón káé ar repwe “mamasa.” Ina popun a lamot sipwe ésúkúsúkú ewe sópwólóón me ekkekieki pwe ekiseló chék epwele fis. (Mat. 24:42; Luk. 21:34-36) Pwal och, án Jiowa we mwicheich a kan ákkáchema ngenikich ach sipwe “witiwiti ewe Ränin Kot o achocho ngeni tori epwe müttirito” me ekkekieki usun ewe ótót sefé Jiowa a pwonei.​—Álleani 2 Petrus 3:11-13.

5. Ifa pwal eú popun sipwe wikkitiwiti ránin Jiowa we?

⁵ Ika a lamot án ekkewe popun Chón Kraist repwe wikkitiwiti ránin Jiowa we, iwe, a fen kon lamot ngenikich lón ei fansoun. Pwata? Pokiten ewe esissil Jesus a awora mi ánnetatá pwe i a fen Kingen án Kot we Mwú seni ewe ier 1914 me sia nónnóm lón ekkewe ránin lesópwólóón, are án ei ótót “fansoun sopolan.” Áwewe chék, usun met Jesus a fen oesini, a ngangngawoló ei fénúfan me ewe angangen afalafala kapas allimen ewe Mwú a fiffis wóón unusen fénúfan. (Mat. 24:3, 7-14) Jesus ese affata ifa úkúkún ttamen ekkewe ránin lesópwólóón, ina popun mi lamot sipwe chék mmólnetá ngeni warotoon ena sópwólóón epwe tongeni fis lón chék eú ekkeei rán.

6. Ifa usun sia silei pwe nónnómun ei fénúfan epwe chék wakkatteló ngawan atun sia feffetál ngeni ewe sópwólóón?

⁶ Iwe met, itá sipwe ekieki pwe “sopolan” ei ótóten fénúfan epwe weneiti pwal eú fansoun lón mwach atun epwe fókkun watteeló ngawan lap seni lón ei atun? Ewe Paipel a erá pwe aramas “lon ekewe ränin lesopolan” repwe chék ngangawóló. (2 Tim. 3:1, 13; Mat. 24:21; Pwär. 12:12) Ina popun, inaamwo ika fénúfan mi fókkun ngaw iei, nge sia silei pwe epwe pwal wakkatteló ngawan.

7. Met Mateus 24:37-39 a áiti ngenikich usun nónnómun fénúfan atun ekkewe ránin lesópwólóón?

⁷ Ekkóch ra tongeni ekieki pwe me mwen ewe “riaföü mi lapalap,” epwe fis maun lón iteiten eú me eú fénú me lap ngeni aramas repwe semmwen are echik. (Pwär. 7:14) Nge ika pwe a fis ena, iwe epwe fókkun ffat ngeni meinisin aramas pwe a pwéppwénútá ekkewe oesini lón Paipel. Epwe pwal mwo nge ffat ngeni chókkewe rese pwapwaiti met ewe Paipel a apasa. Nge chechchemeni, Jesus a erá pwe lón ekkewe ránin lesópwólóón, lap ngeni aramas “resap silei,” weween pwe manawer a pwáraatá pwe rese áfánni minne a fiffis tori warotoon ránin Jiowa we iwe repwap fókkun rúké. (Álleani Mateus 24:37-39.) A ffat, sisap ekieki pwe me mwen an epwe fis ewe riáfféú mi lapalap, fénúfan epwe akkomw wakkatteló ngawan pwe aramas resap chúen tongeni tunaló kkanotóón ewe sópwólóón.​—Luk. 17:20; 2 Pet. 3:3, 4.

8. Met a ffat ngeni chókkewe mi álleasochisi án Jesus we allúk pwe repwe “mamasa”?

⁸ Ewe esissil Jesus a awora ngeni néún chón káé a eú minen éúréúr mi affata menni ewe fansoun repwe nónnóm lón. Néún  Jesus chón káé ra mammasa. (Mat. 24:27, 42) Seni 1914, ekkewe sókkópaten kinikin lón án Jesus we esissil ra fen pwéppwénútá. Sia lúkúlúk pwe iei sia nónnóm lón ekkewe ránin lesópwólóón, are ewe “fansoun sopolan.” Jiowa a fen filatá ineet epwe ataieló án Satan ei ótót mi ngaw.

9. Pwata mi lamot sipwe wikkitiwiti me ekkekieki pwe ewe sópwólóón epwe fis ekiseló chék?

⁹ Iwe, pwata a lamot sipwe wikkitiwiti me ekkekieki pwe ewe sópwólóón epwe fis ekiseló chék? Pokiten sia álleasochisi Jesus Kraist. Pwal och, sia fókkun kúna pwe ewe esissil Jesus a awora usun ekkewe ránin lesópwólóón a pwéppwénútá. Sia lúkú pwe ewe sópwólóón a arapoto, esap pokiten chék ach mwittir lúkúoló mettóch meinisin sia rongorong, nge pokiten sia fókkun lúkú pwe án Paipel kewe oesini usun ra pwéppwénútá. Mi lamot sipwe mammasa me mmólnetá ngeni warotoon ena rán.

10, 11. (a) Pwata Jesus a ereni néún kewe chón káé pwe repwe “mamasa”? (b) Met Jesus a ereni néún kewe chón káé ar repwe féri ika ra ekieki pwe a mmang ewe sópwólóón? (Ppii ewe sasing lepoputáán ei lesen.)

¹⁰ Chómmóng leich sia fen tuppwél le angang ngeni Jiowa ren fite fite ier me ésúkúsúkú warotoon an we rán. Ese lifilifil ika ifa ttamen ach sia fen witiwit, nge mi chék lamot sipwe witiwit me ekkekieki pwe ekiseló chék ena rán epwele war. Mi lamot sipwe mmólnetá lupwen Jesus a war me ataieló án Satan ei ótót. Chechchemeni met Jesus a ereni néún kewe chón káé ar repwe féri: “Oupwe mamasa o afälikemi, pun ousap silei inet ewe fansoun epwe war lon. Epwe usun chök eman mwän a saila toau, nge a likitala nöün chon angang pwe repwe tümwünü meinisin mine a eäni. A awisa ngeni eman me eman an angang o allük ngeni ewe chon mamasa ewe asamalap, pwe epwe mamas. Iei mine oupwe mamasa, pun ousap silei inet samolun ewe imw epwe war, are epwe war lekuniol, are lukenipwin, are wünümweerän, are lesosor. Are epwe müttir feito, esap öch an epwe künok lon om möür. Mine üa ürenikemi, üa üreni aramas meinisin: Oupwe mamasa.”​—Mark. 13:33-37.

¹¹ Lupwen néún Jesus kewe chón káé ra mirititi pwe Jesus a poputá le nemenem lón ewe ier 1914, ra pwal mirititi pwe sópwólóón ei ótót epwe chék tongeni mwittir fis lón ar we fansoun. Ina popun ra ammólneeretá ngeni ren ar alapaaló ar angangen afalafal. Jesus a erá pwe i a tongeni war “wünümweerän, are lesosor.” Ika epwe fis ena, met a lamot néún kewe chón káé repwe féri? Jesus a ereniir ar repwe chék “mamasa.” Ina popun, inaamwo ika sia meefi pwe sia fen wikkitiwit fansoun langattam, esap weween pwe a chúen towau ewe sópwólóón, are esap war lón ach ei fansoun.

12. Met Apakuk a eisini Jiowa me ifa usun Kot a pélúweni?

¹² Ewe soufós Apakuk a witiwit fán mosonottam atun a féri an angangen esilefeili usun katalóón Jerusalem. Mi pwal wor ekkóch soufós akkomw mwen Apakuk, iir ra afalafal usun ena pwóróus lón fite fite ier. Apakuk a tongeni kúna pwe a lapóló ngawen an we fansoun me wakkatteló pwúngúngaw lap seni lóóm. A sié ngeni Jiowa an epwe álisi, me eisini: “Ai Samol mi Lapalap, ifa ükükün fansoun ai üpwe siö ngonuk pwe kopwe awora om alilis?” Inaamwo ika Jiowa ese affata ika ineet epwe fis ewe sópwólóón nge a pwon ngeni Apakuk pwe ena rán “esap mang.” Jiowa a pwal ereni: “Kopwe chök witiwit.”​—Álleani Apakuk 1:1-4; 2:3.

13. Menni ekiek Apakuk a tongeni eáni, me pwata mi efeiengaw ena sókkun ekiek?

 ¹³ Anchangei mwo, met ika Apakuk a chipwangeló le witiwiti ewe sópwólóón me apasa: ‘Ua fen wikkiti talóón Jerusalem ren fite fite ier. A chúen wor watteen fansoun me mwen an epwe fis ewe sópwólóón. Ese pwal lamot ai upwe sópweló le afalafal usun. Ekkewe ekkóch ra tongeni féri ei angang.’ Met epwe tongeni fis ika Apakuk a eáni ena esin ekiek? Jiowa esap chúen pwapwaiti i. Me ika Apakuk ese fen mmólnetá lupwen a tori sópwólóón, iwe i epwe fen máló.

14. Pwata sipwe kilisou pwe Jiowa a fen éúréúrakich ach sipwe wikkitiwiti ewe sópwólóón?

¹⁴ Anchangei pwe ka fen nóm lón ewe Paratis. Meinisin met Paipel a oesini fán iten ekkewe ránin lesópwólóón a fen pwénútá usun met Jiowa a apasa. A péchékkúleló óm lúkú Jiowa me watteeló óm lúkúlúk pwe i epwe apwénúetá meinisin minne a pwonei. (Álleani Josua 23:14.) Ka fókkun kilisou pwe Jiowa a fen isetiw ewe rán mi fich an epwe fis ewe sópwólóón, me a fen éúréúra néún kewe aramas ar repwe wikkitiwiti ena rán.​—Föf. 1:7; 1 Pet. 4:7.

15, 16. Pwata a lamot sipwe achocho le akkafalafal lón ekkeei ránin lesópwólóón?

¹⁵ Án Jiowa we mwicheich epwe kan ákkáchema ngenikich le akkomwa lón manawach ach angang ngeni Jiowa. Ekkeei minen áchem ra álisikich le akkachocho lón ach angang ngeni Kot me pwal ámmeef ngenikich atapwalapwalen ei angang. Sia lúkúlúk pwe ewe esissil Jesus a awora a pwéppwénútá iei me ekiseló chék epwele fis ewe sópwólóón. Ina minne, sia akkomwa Jiowa lón manawach me akkafalafala ewe kapas allim usun ewe Mwú.​—Mat. 6:33; Mark. 13:10.

¹⁶ Lupwen sia afalafala ewe kapas allim ngeni aramas, sia álisiir ar repwe kúna manaw seni katalóón án Satan ei ótót, ewe epwele fis ekiseló chék. Lón 1945 efóch siip itan Wilhelm Gustloff a kokoló, ina eú me lein ekkewe feiengaw mi kon watte a fis lemataw. Fitengeréú aramas ra máló. Emén pwiich fefin me pwúlúwan we ra kúna manaw seni ena feiengaw. Neminna a chechchemeni pwe pwal mwo atun án ewe siip a kokotiw, emén fefin a kekkechiw: “Ai kewe kiufer! Ai kewe kiufer! Mwári kewe, nei kewe iering me náná! Ra chúen nóm meinisin fan. Meinisin piseki ra péút seniei!” Nge ekkewe ekkóch pasisé ra weweiti pwe a fókkun lamot ar repwe achocho le seláni manawen ekkewe pwal ekkóch pasisé. Iwe, lón ei fansoun, aramas ra pwal nóm lón efeiengaw. Sia pwal mochen sipwe usun  ekkena pasisé rese ekieki pwisin iir, sipwe nefotofot wóón atapwalapwalen ach ei angangen afalafal. Mi lamot sipwe achocho úkúkún ach tufich le álisi aramas ar repwe kúna manaw seni katalóón ei ótót.

17. Pwata sipwe lúkú pwe ewe sópwólóón a tongeni fis lón chék eú ekkeei rán?

¹⁷ Sia fókkun kúna pwe a kan pwéppwénútá ekkewe oesini lón Paipel me sópwólóón ei ótót mi ngaw a fókkun arapoto. Sisap ekieki pwe mi chúen lamot watteen fansoun me mwen án ewe “engol mächä” me “ewe manmwacho” repwe tongeni maunei Papilon mi Lapalap, ewe mwicheichen lamalam chofona. (Pwär. 17:16) Chechchemeni pwe Kot epwe “atolonga lon letiper” ar repwe maunei lamalam chofona, me ena mettóch a tongeni mwittir fis me a tongeni fis lón chék eú ekkeei rán! (Pwär. 17:17) Sópwólóón án Satan ei ótót mi ngaw a arapakkanoto. Ina minne, mi lamot sipwe álleasochisi án Jesus ei kapasen éúréúr: “Oupwe afälikemi, pwe lelukemi esap chouchou ren mongömong me ünüpuch, pwal ren öürekin manauen ikenai, pwe ewe rän esap müttiritikemi usun eu sär.” (Luk. 21:34, 35; Pwär. 16:15) Sipwe mammasa me akkachocho lón án Jiowa we angang me lúkúlúk pwe i epwe álisi o ‘föri sokun föför ngeni ir mi anomu ar apilükülük won.’​—Ais. 64:4.

18. Ifa ewe kapas eis epwe pélú lón ewe lesen mwirin ei?

¹⁸ Atun sia witiwiti sópwólóón ei ótót mi ngaw, mi lamot sipwe aúseling ngeni néún Jesus we chón káé itan Jutas, iei met a eáni fén: “Ämi chiechiei kana mi achengicheng, oupwe chök sopwela le apöchöküla ämi lükülük mi unusen pin. Oupwe iotek ren manamanen Ngünmifel. Iwe, oupwe püsin tümwünükemi lon än Kot chen lupwen oua witiwiti ach Samol Jesus Kraist pwe epwe ngenikemi manau esemüch lon an ümöümöch.” (Jut. 20, 21) Nge ifa usun sipwe pwáraatá pwe sia witiwiti me ésúkúsúkú án Kot we ótót sefé ewe epwele waroto? Ewe lesen mwirin ei epwe pwóróus usun ena.