PWÓRÓUS LÚKÚNPÉÉN
Ié Kewe Chón Pwáraatá Jiowa?
Becky seni California a erá: “Ua fen silei Mike lón fitu ier. I emén Chón Pwáraatá Jiowa. Nge use weweiti an lamalam. Ié na Jiowa? Pwata Chón Pwáraatá rese féri apwapwaan holiday? Eli Mike a fen fiti eú lamalam mi och sókkun?”
Iei alon Zenon seni Ontario, Canada: “Atun chón órui ra káé ewe Paipel ren Chón Pwáraatá Jiowa iei met ua ekieki: ‘Met weween ena it Chón Pwáraatá Jiowa? Met sókkun it ena!’”
Kent seni Washington a erá: “Ám me pwúlúwei we aua ekieki pwe Chón Pwáraatá Jiowa ra etto rem pún ra mochen alapaaló ám mengiringir pokiten ause fáffál. Me aua ekieki pwe ika ekkewe lamalam mi kon iteféúló rese ataweei met aua kúkkútta seniir, sanne eú lamalam mi kkóló usun Chón Pwáraatá Jiowa epwe álisikem.”
Cecilie seni Esbjerg, Denmark a apasa: “Use fókkun sissileer me met ra lúkú.”
Eli ka fen kúna ar afalafal imw me imw are lein chómmóng aramas nge ra eineti ekkewe puken álillisin Paipel me áiti ngeniir eú káéén Paipel ese kamé. Neman ka fen angei ei puk seni emén me leir. Nge ka chúen ekieki, wesewesen ié kewe Chón Pwáraatá Jiowa. Neman ka pwal eáni ekiekin emén me lein ekkewe a mak asan.
Ika ka eáni ekkena sókkun kapas eis are ekiek, ia kopwe kútta pélúwer me ie? Ifa usun kopwe silei met Chón Pwáraatá Jiowa ra wesewesen lúkú, ia a feito me ie ewe moni mi atufichi ar angangen afalafal me ar leenien mwich me pwata ra kan etto chuuruk lón imwom me lón ekkewe leeni chómmóng aramas ra kan soun nóm ie?
Iei met Cecilie a pwal apasa: “Ua álleani chómmóng pwóróus usun Chón Pwáraatá Jiowa wóón ewe Internet. Ua rong ekkóch pwóróus aramas ra akkapwóróusa usur me ua aúseling ngeni chómmóng pwóróus mi ákkápiir. Pokiten ena, use fókkun sani Chón Pwáraatá Jiowa.” Mwirin, Cecilie a pwisin fós ngeni Chón Pwáraatá Jiowa me a silei pélúwen an kewe kapas eis me pwapwa ren.
Ka mochen kopwe silei pélúwen óm kewe kapas eis usun Chón Pwáraatá Jiowa nge epwe pwúng? Aua peseok pwe kopwe pwisin fós ngeni Chón Pwáraatá Jiowa, ekkewe mi wisen féri ei puk, iir repwe fókkun tongeni pélúweni óm kewe kapas eis. (Än Salomon Fos 14:15) Amwo ekkewe lesen mwirin repwe álisuk le silei usúm me ám kewe lúkú me pwal weweiti ewe angang aua féri.
