ENOK a fen manaw ren langattam fansoun. Ese mwáál a weires ach sipwe anchangei pwóróusen manawan, nge i a fen manaw úkúkún 365 ier, ina epwe lap seni fán rúáánú ttamen ierin manawen aramas mi manawattam lón ei fansoun! Nge me ren aramasen lón ena atun, saminne a wesewesen chinnap. Lón ena atun, lap seni 5,000 ier a ló, aramas ra fókkun manawattam seni aramasen lón ei fansoun. Atun Enok a uputiw, ierin Atam, ewe áeménún mwán, a lap seni wonopúkú, me a sópwósópwóló manawan ren ina epwe úkúkún úlúpúkú ier! Ekkóch me lein mwirimwirin Atam kewe ra pwal mwo nge manawattam lap seni i. Iwe lupwen a 365 ierin Enok, neman inisin a chúen usun inisin emén alúwél, usun itá epwe chúen sópwósópwóló manawan ren fansoun langattam. Iwe nge, esap ina met a fis.

Neman Enok a nóm lón watteen efeiengaw. Anchangei an a súsúfetál, ese tongeni ménúki án aramas oputa ewe pwóróus seni Kot a kerán uwei ngeniir me wówóngawen meser ren ar song. Ekkena aramas ra fókkun oput i. Ra oputa ewe pwóróus a uwei ngeniir, me ewe Kot mi ékkúnéú ngeni ena pwóróus. Ese wor met ra tongeni fér ngeni án Enok na Kot, Jiowa, nge ra tongeni efeiengawa Enok! Neman Enok a ekieki ika epwe chúen tongeni kúnasefáli an we famili. A itá ekieki pwúlúwan we me néún kewe nengngin are néún we át Metusala, are Lamek, néún néún we? (Keneses 5:21-23, 25) Epwele iei muchúlóón manawan?

A wor ákkáekis chék pwóróusen manawen Enok mi mak lón Paipel. A chék wor úlúngát leeni lón Paipel a mak pwóróusan lón. (Keneses 5:21-24; Ipru 11:5; Jutas 14, 15) Iwe nge, a naf minne mi mak lón ekkena wokisin pwe sipwe mwaren silei pwóróusen ei mwán mi péchékkúl an lúkú. Mi wor óm famili ka wisen túmúnú? Ka fen kúna weiresin óm kopwe peni minne mi pwúng? Ika ina, neman epwe watte met kopwe káé seni án Enok lúkú.

A mmen ngaw nónnómun aramas wóón fénúfan atun Enok a uputiw. I a nóm lón ewe efisuen táppin tettelin aramas mi feito seni Atam. Pwúngún pwe lón ena atun a chúen nóm ren aramas ewe esin péchékkúlen inis mi nóm ren Atam me Efa pokiten ar unuséch me lóóm. Ina popun, aramas ra chúen manawattam. Iwe nge, a mmen ngaw ar féffér me a ta ar riri ngeni Kot. A mmen chéúló féfférún akkachofesá. Chéúlóón ena mettóch a poputá ren ewe oruuen táppin aramas, atun Kain a nieló pwiin we Epel. Emén me lein mwirimwirin Kain kewe a fókkun sikásini pwisin i ren an erá pwe an akkachofesá me an liiwini ngaw ngeni aramas a fen kon luló seni án Kain! Nge lón ewe aúlúngátin táppin tettelin aramas, a pwá eú mineféén sókkun féfféringaw. Aramas ra poputá le kéri iten Kot we Jiowa, nge esap fán ésúfél lón ar fel. Usun ra pani iten Kot we mi pin lón ar kapasen turunufas me súfélúngaw.​—Keneses 4:8, 23-26.

Ese mwáál ena sókkun napanapen fel mi ngaw a chéúfetál lón fansoun Enok we. Iwe atun Enok a mámmááritá, a wor eú kefil mi nóm mwan. Epwe itá fitaaló chék féfférún aramasen lón na fansoun? Are epwe kútta ewe Kot mi enlet, Jiowa, ewe a féri láng me fénúfan? Ese mwáál a fókkun chúng letipan an silei pwóróusen Epel, ewe a ninniiló pokiten an fel  ngeni Jiowa lón ewe napanap mi apwapwaai I. Enok a filatá an epwe úppós usun chék Epel. Keneses 5:22 a apasa: “Enok a chiechiefengen me Kot.” Ena itiitin kapas mi kkóló aúchean weween, a pwáraatá pwe Enok a fókkun súféliti Kot inaamwo ika a nóm lón ewe ótóten aramas mi ésúfélúngawa Kot. I ewe áeménún aramas Paipel a néúnéú ena itiitin kapas fán itan.

Lón pwal chék ena wokisin a apasa pwe Enok a chiechifengen me Jiowa mwirin án néún we itan Metusala a uputiw. Sia kúna pwe a wor án Enok famili atun a 65 ierin. A wor pwúlúwan nge ese affat itan lón Paipel, me “a pwal wor nöün mwän me fefin” nge ese pwal affat iir fitemén. Ika emén sam a chiechifengen me Kot atun a túttúmúnú an famili, a lamot epwe achocho le túmúnúúr lón ewe napanap mi apwapwaai Kot. Enok a weweiti pwe Jiowa a mochen an epwe pacheéch ngeni pwúlúwan we. (Keneses 2:24) Ese wor tipemwaramwar pwe a pwal achocho úkúkún an tufich le asukula néún kewe usun Jiowa Kot. Ifa mwirilóón ena?

Paipel ese kon affata. Ese fós usun án néún Enok we át Metusala lúkú, ewe mi manawattam mi mak pwóróusan lón Paipel, me máló lón ewe ier a fis ewe Noter. Iwe nge, Metusala a wor néún we át itan Lamek. Lamek a uputiw lap seni ipúkú ier mwen málóón seman we chinnap Enok. Me lupwen Lamek a mámmááritá a pwáraatá watteen lúkú. Jiowa a néúnéú i le oesini usun Noa, néún we át, iwe ena oesini a pwénúetá mwirin ewe Noter. Noa a chék usun Enok, semen seman we chinnap, ewe a chiechifengen me Kot. Noa ese kúkkúna Enok. Nge Enok a isetiw eú álemwir mi kkóló aúchean. Noa a tongeni silei usun ena álemwir seni pwisin seman we Lamek, are seni semen Lamek we Metusala, are pwal mwo nge seni semen Enok we itan Jaret, ewe a máló atun Noa a ierini 366.​—Keneses 5:25-29; 6:9; 9:1.

Ekieki usun sókkofesenin Enok me Atam. Atam, ewe mi unuséch, a ú ngeni Jiowa me a likiti ngeni mwirimwirin kewe eú álemwir mi ngaw, ina tipis me máló. Nge Enok, ewe mwán ese unuséch, a chiechifengen me Kot me likiti ngeni mwirimwirin kewe eú álemwir mi múrinné, ina lúkú. Atam a máló atun a 308 ierin Enok. Aramasen Atam kewe ra kechiweiti semelaper na mi ekieki chék pwisin i? Sise silei. Nge sia chék silei pwe Enok a sópweló an “chiechifengen me Kot.”​—Keneses 5:24.

Ika en emén mi túttúmúnú eú famili, ekieki met ka tongeni káé seni án Enok lúkú. A lamot kopwe atufichi óm famili lón pekin aion, nge ewe a kon lamot, óm atufichiir lón pekin lúkú. (1 Timoty 5:8) Ka tongeni féri ena esap chék ren kapas nge pwal ren met ka féri. Ika ka filatá le chiechifengen me Kot usun chék Enok ren óm mut ngeni án Kot kewe allúk repwe emmweni manawom, iwe pwal en ka tongeni likiti ngeni óm famili eú álemwir mi múrinné, ina eú leenien áppirú mi aúchea.

Neman Enok ewe mi wor an lúkú a tipitipingaw atun a nóm lein ekkewe aramas ese wor ar lúkú. Nge an we Kot Jiowa a áfánni i. Lón eú atun Jiowa a fós ngeni néún na chón angang mi tuppwél. A ewisa ngeni Enok an epwe uwei eú pwóróus ngeni ekkewe aramas lón ena fansoun. A filatá Enok an epwe emén soufós, i ewe áeménún soufós mi mak an oesini lón Paipel. Sia silei ena pokiten Kot a emmweni Jutas,  pwiin Jesus we, an epwe makkeei met Enok a eáni oesini fitepúkú ier mwirin ena. *

Met masouen án Enok na oesini? Iei: “Ewe Samol epwe feito fiti ngeröün chon läng mi pin pwe epwe apwüngü aramas meinisin, epwe pwal atipisiir meinisin pokiten ar kewe föför ra föri ren ar resap meniniti Kot, pwal pokiten ekewe kapas mi fokun ngau ekewe chon tipis resap meniniti Kot ra apasatä lon ar ü ngeni.” (Jutas 14, 15) A fókkun péchékkúl án Enok lúkú pwe ekkena mettóch repwe wesewesen fis. Me ren ekiekin Enok, usun itá nge Kot a fen apwénúetá met a mak lón ena oesini. Weween pwe ena soufós a fós usun och mettóch ese fókkun wor an tipemwaramwar wóón an epwe fis, iwe, sia tongeni fósun usun nge a fen fis!​—Aisea 46:10.

Neman Enok a afalafala ena pwóróus ngeni meinisin repwe rongorong. Iwe, met Enok a meefi me ifa usun an a uwei ngeniir? Ena éúréúr a fókkun péchékkúl. A néúnéú ekkeei kapas, “resap meniniti Kot” me “fokun ngau,” pwe epwe pwáraaló úkúkún ngawen ekkewe aramas, ar kewe féffér, me napanapen ar féri ekkena féffér. Ena oesini a éúréúra meinisin aramas pwe ewe ótót ra fératá seni ewe fansoun ra katowu seni Eten a unusen ngawóló. Ena ótót epwe unusen kataló atun Jiowa me néún kewe “ngeröün chon läng mi pin” repwe waroto me ataieló. Enok a fókkun pwora lón an ákkáláemén le esilefeili ena éúréúr seni Kot! Neman me lekúkkúnún Lamek a kakkatol me ingeló ren pworaan seman na chinnap. Ika ina, iwe kich mi weweiti pwata.

Ese mwáál án Enok lúkú a amwékútúkich ach sipwe etittina ika sia eáni ekiekin Kot fán iten napanapen ei ótót sia manaw lón. Ewe pwóróusen kapwúng Enok a pwora le esilei ngeni aramas a chúen lamot ngenikich, a weneiti lón ei ótót usun chék pwal lón fansoun Enok we. Minne Enok a eáni éúréúr a pwénúetá atun Jiowa a aworato ewe Noter lón ewe ótóten aramas rese niwokkusiti Kot lón fansoun Noa we. Nge katalóón ena ótót mi ngaw a chék eú minen lios fán iten eú wakkatteen kata epwele fis lón mwach. (Mateus 24:38, 39; 2 Petrus 2:4-6) Ikenái Kot a mmólnetá fiti fengen me fitengeréú néún chónláng mi pin ar repwe féri ar kapwúng mi pwúng wóón ei ótóten aramas mi ú ngeni i. A lamot emén me emén leich sipwe lefareni án Enok na kapasen éúréúr me sipwe pwal ereni ekkewe ekkóch. Neman chón ach famili me chiechiach kewe resap mochen fitikich. Iwe neman fán ekkóch sipwe tipitipingaw. Nge Jiowa ese fókkun péútaaló Enok, iwe esap pwal tongeni péútaaló néún kewe aramas mi tuppwél lón ei fansoun!

Ifa usun a muchúló manawen Enok? Pokiten a monomonoló pwóróusen an máló lap seni pwóróusen an manaw, iwe chómmóng ra fókkun mochen silei usun. Ewe puken Keneses a apasa: “Enok a chiechifengen me Kot. Mürin esap chüen nom, pun Kot a angei.” (Keneses 5:24) Met weween án Paipel erá pwe Kot a angei Enok? Ewe aposel Paulus a áweweei: “Ren an lükülük Enok a marukula, pwe esap küna mäla. Iwe, resap chüen küna, pun Kot a amarukata; pun mwan an marukula, Kot a pwärata an amungu.” (Ipru 11:5, Testament Mi Fö—Fáichuk) Met weween án Paulus néúnéú ei itiitin kapas, “a marukula, pwe esap küna mäla”? Lón ekkóch afféún Paipel ra erá lón Ipru 11:5 pwe Kot a uwei Enok ngeni lón láng. Nge ese pwúng ena. Pún ewe Paipel a fen affata pwe Jesus Kraist i ewe áeménún mi manawetá ngeni manaw lón láng.​—Johannes 3:13.

Iwe, ifa usun án Enok “a marukula, pwe esap küna mäla”? Ese mwáál, Jiowa a angepwetete le “amarukata,”  are ámweta, manawen Enok seni manaw ngeni máló pwe esap máló me lepéún ekkewe chón oputa i. Nge me mwen ena, “Kot a pwärata an amungu,” are pwapwa ren. Ifa usun? Me mwen chék án Enok máló, neman a kúna eú lángipwi seni Kot, neman eú lángipwi mi pwáár ngeni liosun ei fénúfan an a eú paratis. Atun an a kúna ena mettóch mi pwáraatá pwe Jiowa a pwapwa ren, iwe a méúrúfóchóló. Ewe aposel Paulus a mak usun i me pwal ekkóch mwán me fefin mi tuppwél, a erá: “Ekei aramas meinisin ra mäla lon ar lükülük.” (Ipru 11:13) Mwirin, neman ekkewe aramas mi oputa i ra kútta inisin nge ese “wor eman a chüen tongeni küna” pún Jiowa a amóeló pwe aramas rete ésúfélúngawa are eáni minen fel mi chofona. *

Iwe, ach sia silei weween ena wokisin, sipwe sótun anchangei ifa usun neman a muchúló manawen Enok. Ekieki ei pwóróus, nge pwal chechchemeni pwe sisap tongeni silei ika a chék iei usun minne a fis. Enok a súsúfeil, iwe epwele meefi pekkusuló. Ekkewe chón oputa i ra tattapweló mwirin, nge ra fókkun lingeringer pokiten ewe kapasen kapwúng a atoura ngeniir. Enok a kúna eú leeni epwe tongeni op lón me ekis asésé, nge a silei pwe ekiseló chék repwe tongeni kúna me ikkena ie. Iei a fókkun chék arap ngeni an epwele ninniiló. Iwe, atun a asésé, a iótek ngeni an we Kot. Iwe eú memmeef mi fókkun ekinamwe a feitiw wóón. Enok a kúna eú lángipwi, nge usun itá i a wesewesen nóm lón.

Anchangei pwe lón kúnaen Enok na, a kúna eú ótót mi fókkun sókkóló seni ewe a manaw lón. Me ren pwe eú leeni mi lingéch usun ewe tánipiin Eten, nge ese wor kerop mi mammasa pwe aramas resap tolong lón. A wor chómmóng mwán me fefin mi fókkun péchékkúl me sáráfé inisiir. A wor kinamwefengen lefiler. Ese fókkun wor ewe koput me ewe angangen eriáfféwú aramas pokiten minne ra lúkú, ewe mettóch i a kúna lón manawan. Nge ren Enok, i a meefi án Jiowa apéchékkúla letipan, tongei, me echeni. A lúkúlúk pwe itá epwe nónnóm ikena, iwe, epwe ina leenian. Nge atun a kinamweeló, a amméúraaló mesan me méúrúfóchóló.

Tori iei a chúen annut lón máló, nge Jiowa Kot a chúen unusen chechchemeni. Iwe, usun met Jesus a fen pwonei, epwe war ewe fansoun lupwen meinisin chókkewe mi nóm lón ekiekin Kot repwe rongorong mwelien Kraist me towu seni peiaser me kúna eú Paratis mi lingéch me kinamwe.​—Johannes 5:28, 29.

Ka mochen óm kopwe nóm ikena ie? Anchangei pwapwaom atun ka chuuri Enok. Ekieki usun ekkewe mettóch mi kkóló amwararan sia tongeni káé seni! A tongeni erenikich ika minne sia eáni anchang usun sópwólóón manawan a mwaren akkarap ngeni met enletin minne a wesewesen fis ngeni. Nge ren iei, a wor mettóch mi fókkun lamot sipwe káé seni. Mwirin án Paulus fósun Enok, a erá: “Esap wor eman a tongeni apwapwai Kot are esap wor an lükü.” (Ipru 11:6) Ina popun, a fókkun lamot emén me emén kich sipwe áppirú pworaan Enok me an lúkú!