Ewe Oruuen Taropwe Ngeni Chón Tesalonika 2:1-17
2 Iwe nge, ussun án ach Samol Jises Kraist nónnóm me ach chufengen me i, ám áúa tingorekemi ámi pwiim kana
2 pwe ousap mut ngeni emén an epwe ekkesiwili ámi ekiek mi pwúng, are osukosuk iká emén a apasa pwe ránin Jiowa* we a waroto. Ousap lólilen iká ra pwal mwo nge apasa pwe ena pwóróus a feito seni Kot, are álleani seni eché taropwe ra apasa pwe áúa makkeei.
3 Ousap mut ngeni emén an epwe otupukemiiló, pún me mwen ena rán epwe war, ewe angangen rikiló* epwe akkomw fis me ewe aramas mi fókkun ngaw epwe pwááló. I ewe epwe kitetteriló.
4 I ewe chón ú ngeni me a átekiatáái pwisin i pwe epwe tekia seni meinisin mi iteni kot are mettóch aramas ra fel ngeni, ina minne a móttiw lón ewe imwenfelin Kot me pwáár ngeni aramas pwe i emén kot.
5 Ouse chemeni pwe atun úa chúen nóm remi, úa fen erenikemi ussun ekkena mettóch?
6 Nge iei oua silei met a eppeti i an epwe pwápwááló me mwen ewe fansoun mi kefililó.
7 Ewer, féfféringawen ena aramas lemonomon, a fen fiffis. Nge ei féfféringaw epwe monomonoló tori án ewe chón eppeti esap chúen nóm.
8 Mwirin, ena emén mi fókkun ngaw epwe pwápwááló, ewe emén ewe Samol Jises epwe nieló ren manamanen an kapas me kiterieló atun epwe pwápwááló an nónnóm.
9 Nge pwápwálóón ena emén mi fókkun ngaw epwe fis ren án Setan angang, me epwe féri chómmóng manaman, esissil mi otuputup, me mettóch mi amwarar,
10 me meinisin féffér ese pwúng me féfférún otuputup. Ekkena mettóch ra emmweningawa chókkewe repwe ninniiló, ina kapwúngúúr pokiten rese etiwa me aúcheani ewe enlet pwe repwe tongeni kúna manaw.
11 Ina popun, Kot a mut ngeniir ar repwe tupuló ren afalafal mi chofona pwe repwe lúkú minne mi chofona,
12 pwe iir meinisin repwe kúna kapwúng pokiten rese lúkú ewe enlet nge ra fen pwapwaiti minne ese pwúng.
13 Ina minne, fansoun meinisin a chúng letipem ám áúpwe kilisou ngeni Kot fán itemi ámi pwiim kana mi wor tongemi me ren Jiowa.* Pún seni lepoputáán, Kot a fen filikemiitá ámi oupwe kúna manaw ren an epinikemiiló ren an we ngún mi fel me ren ámi lúkú ewe enlet.
14 I a kérikemi ámi oupwe kúna manaw ren ewe kapas allim áúa afalafala ngenikemi, pwe oupwe pwal kúna ling ussun ach Samol Jises Kraist.
15 Ina minne, ámi pwiim kana, oupwe úppós me kémwéchúnúk wóón ekkewe káit áúa asukula ngenikemi, ese lifilifil iká áúa áiti ngenikemi lón kapas are lón taropwe.
16 Pwal och, amwo pwisin ach Samol Jises Kraist pwal Semach Kot, ewe mi tongekich me awora ngenikich ourur esemuch me ápilúkúlúkéch ren ewe kirekiréch mi somwoló,
17 repwe oururu letipemi me apéchékkúlakemi pwe oupwe féri me apasa minne mi múrinné fansoun meinisin.
