Me ren Luk 21:1-38
21 Iwe, atun Jises a nennengeni ekkewe leenien asor, a kakkatol ekkewe mi pisekisek mi púngúlong ar asor.
2 Mwirin, a kúna emén fefin mi osupwang mi má seni pwúlúwan a púngúlong rúúeféú féúkúkkúnún senis mi fókkun kisikis aúchean,*
3 me a apasa: “Enlet úa erenikemi pwe minne ei fefin mi wéúngaw mi má seni pwúlúwan a waalong a watte seni met meinisin ra waalong.
4 Pún meinisin ekkeei ra waalong liffang seni somwen wéúúr, nge i inaamwo iká a osupwang,* a waalong meinisin minne a manaw seni.”
5 Mwirin, atun ekkóch ra kakkapas ussun ewe imwenfel, ren ifa ussun aramas ra elinga ngeni ekkewe faw mi múrinné me ekkewe mettóch ra eáni asor,
6 a apasa: “Ren ekkeei mettóch oua kúna iei, epwe war ekkewe rán atun esap chúen wor eféú faw epwe nóm wóón eféú faw nge esap toropasetiw.”
7 Mwirin ra kapas eis ngeni, ra apasa: “Sense, ineet ekkeei mettóch repwe wesewesen fis, me met esissil epwe pwá atun ekkeei mettóch repwele fis?”
8 A apasa: “Oupwe túmúnú pwe ousap tupuló. Pún chómmóng repwe feito fán ásengesin itei, me apasa, ‘Ngang i,’ me ‘Ewe fansoun pwénútáán oesini a arapoto.’ Ousap tapweló mwiriir.
9 Pwal och, lupwen oupwe rong akúrangen maun me osukosuk,* ousap niwokkus. Pún ekkeei mettóch repwe akkomw fis, nge ewe sópwólóón esap mwittir fis.”
10 Mwirin a ereniir: “Fénú me fénú repwe maunfengen lefiler, me mwú epwe ú ngeni mwú.
11 Epwe wor watteen chechchechin fénú, me epwe wor nafangawen mwéngé me málapalap ekis meinisin, me aramas repwe kúna mettóch epwe eniwokkusur me esissil mi lap seni láng.
12 “Nge me mwen án meinisin ekkeei mettóch repwe fis, aramas repwe aresinikemi me eriáfféwúkemi, repwe uweikemiiló ngeni ekkewe sinakok me imwen kalapus. Repwe uweikemiiló mwen ekkewe king me governor fán ásengesin itei.
13 Epwe suuk ngenikemi le útá mwer ussun nei chón pwáraatá.
14 Ina minne, oupwe apposa letipemi ousap asóssót me mwan ren ifa ussun oupwe pélúweni,
15 pún úpwe ngenikemi kapas me tipáchem, ewe meinisin chón ú ngenikemi resap tongeni ú ngeni are appélúwa.
16 Pwal och, pwal mwo sememi kewe me inemi me pwiimi me aramasemi me chiechiemi repwe afangemá ámi, me repwe nieló ekkóch me leimi,
17 me aramas meinisin repwe oputakemi pokiten itei.
18 Nge esap mwo emeet meten mékúremi epwe péútúló.
19 Ren ámi likiitú, oupwe seláni manawemi.
20 “Iwe nge, lupwen oua kúna pwe ekkewe mwichen soufiu ra rokopwálieló Jerusalem, iwe oupwe silei pwe talóón we a arapoto.
21 Iwe, chókkewe mi nóm lón Jutia repwele poputá le sútá wóón ekkewe chuuk, chókkewe mi nóm lón Jerusalem repwe ló seni, me chókkewe mi nóm lemal resap tolong lón,
22 pún ikkeei ekkewe rán Kot epwe apwúngú aramas lón, pwe ekkewe mettóch meinisin mi makketiw repwe pwénúetá.
23 Riáfféú ngeni ekkewe fefin mi pwopwo me chókkewe mi oupwu ménúkol lón ekkena rán! Pún epwe wor riáfféú mi lap lón ei fénú me song ngeni ekkeei aramas.
24 Me repwe máló ren ketilas me repwe ooló lón meinisin ekkewe mwú, me ekkewe mwú* repwe puratiw Jerusalem tori ewe fansoun mi kefililó fán iten ekkewe mwú* epwe pwénúetá.
25 “Pwal och, epwe wor esissil lón ewe akkar me maram me ekkewe fúú, nge wóón fénúfan, riáfféú ngeni aramasen ekkewe mwú rese silei ewe alen towu pokiten ewe púngúpúngún lóólóón mataw.
26 Aramas repwele mammasaroch ren ar niwokkus me ésúkúsúkú ekkewe mettóch repwe feito wóón fénúfan, pún ekkewe mettóch fán láng repwe chechchech.
27 Iwe mwirin, repwe kúna án ewe Néún aramas feffeito lón eú kuchu fán an manaman me ling mi lapalap.
28 Nge atun ekkeei mettóch repwe poputá le fis, oupwe úwenewenetá me echimwatá mékúremi, pún ámi amanaw a arapoto.”
29 Iwe, a ereniir eú kapas áwewe: “Oupwe nengeni ewe irá fiik me meinisin ekkewe pwal ekkóch irá.
30 Lupwen a fasar chéér oua pwisin kúna me silei pwe iei a arapoto fansoun pwichikkar.
31 Iei ussun pwal ámi, atun oua kúna ekkeei mettóch pwe ra fiffis, oupwe silei pwe ewe Mwúún Kot a arapoto.
32 Enlet úa erenikemi pwe ei táppin aramas resap fókkun máló tori án meinisin mettóch repwe fis.
33 Láng me fénúfan repwe móróló, nge ái kewe kapas resap fókkun móróló.
34 “Nge oupwe pwisin túmúnúkemi pwe letipemi esap fókkun choutiw ren ámi mwéngémmóng me únnúmmóng me aúrekin manaw, nge mwittir chék ena rán epwe torikemi
35 ussun eú ssár. Pún epwe tori meinisin chókkewe mi nónnóm wóón unusen fénúfan.
36 Iwe, oupwe mammasa, oupwe tingormaw lón iótek fansoun meinisin pwe oupwe tongeni sópwéch lón ámi sú seni ekkeei mettóch meinisin repwele fis me lón ámi útá mwen ewe Néún aramas.”
37 Iwe, lerán a kan asukul lón ewe imwenfel, nge lepwin a kan feiló me nóm wóón ewe chuuk itan Chukun Olif.
38 Me lesossorusich meinisin aramas ra feito ren lón ewe imwenfel pwe repwe aúseling ngeni i.
