Me ren Luk 22:1-71
-
Ekkewe souasor ra ekiekin nieló Jises (1-6)
-
Ammólnetáán ewe sáingoon Pasofer (7-13)
-
Poputáán ewe Fááfen Ach Samol (14-20)
-
“Ewe chón afangemáei a nóm rei ren ei cheepel” (21-23)
-
Watteen ánini iká ié a lap (24-27)
-
Án Jises pwonen etipeeú fán iten eú mwú (28-30)
-
Oesini ussun án Piter angangen amam (31-34)
-
Lamoten mmólnetá; ruuofóch ketilas (35-38)
-
Án Jises iótek wóón ewe Chukun Olif (39-46)
-
Jises a ares (47-53)
-
Piter a amam Jises (54-62)
-
Jises a kúna turunufas (63-65)
-
Kapwúng me mwen ewe mwichen soukapwúng mi tekia (66-71)
22 Iei a arapoto ewe Ránin Chulapen Pilawa Ese Lefen, ewe a iteni Pasofer.
2 Me ekkewe souasor mi lap me ekkewe soumak ra kúkkútta al mi múrinné fán iten repwe nieló i, pún ra niwokkusiti ekkewe aramas.
3 Iwe, Setan a tolong lón letipen Jutas, ewe mi iteni Iskariot, emén me lein ekkewe Engol me Rúúemén,
4 me i a feiló me fós ngeni ekkewe souasor mi lap me ekkewe meilapen ewe imwenfel* ren ifa ussun epwe afangemá i ngeniir.
5 Ra fókkun pwapwa ren ei me ra tipeeú ar repwe ngeni moni silifer.
6 Iwe, i a tipeeú ngeni me a poputá le kakkatol menni atun a fich an epwe afangemá i ngeniir nge ekkewe aramas resap silei.
7 Iei a tori ewe áeúin ránin Pilawa Ese Lefen, ewe rán atun ewe man fán iten ewe mwéngéén Pasofer a ninniiló.
8 Iwe, Jises a tiinaaló Piter me Jon, a apasa: “Oupwe feiló me ammólnatá ewe Pasofer fán itach pwe sipwe mwéngé.”
9 Ra ereni: “Ia ka mochen ám áúpwe ammólnatá ie?”
10 A ereniir: “Nengeni! Lupwen oupwe tolong lón ewe telinimw, emén mwán mi uwei eú leenien konik mi ffér seni pwúl epwe chuurikemi. Oupwe tapweló mwirin ngeni lón ewe imw a tolong lón.
11 Iwe, oupwe ereni ewe minne imwan ewe, ‘Ewe Sense a apasa: “Ifan ewe ruumwen waséla ia ngang me nei kewe chón káé áúa tongeni mwéngé ewe Pasofer ie?” ’
12 Iwe, ena mwán epwe áiti ngenikemi eú watteen ruumw mi wor pisekin lón mi nóm asan. Oupwe ammólnatá ikena ie.”
13 Iwe, ra feiló me ra kúna mettóch meinisin ussun chék met a ereniir, me ra ammólnatá fán iten ewe Pasofer.
14 Iwe atun a tori ewe kulók, a móttiw* ren ewe cheepel fitifengen me ekkewe aposel.
15 Me a ereniir: “Úa fókkun mochen oupwe etiei le mwéngé ei Pasofer me mwen ái úpwe kúna riáfféú,
16 pún úpwe erenikemi, úsapw chúen mwéngésefál tori án ewe Mwúún Kot epwe nemenem me met ei mwéngé a liosuetá epwe pwénúetá.”
17 Iwe, a angei eú kap mi keit ngeni, a iótekin kilisou me apasa: “Oupwe angei ei me pássini ngeni emén me emén leimi,
18 pún úa erenikemi, seni ikenái feiló, úsapw chúen únsefál seni ei wain tori án ewe Mwúún Kot waroto.”
19 A pwal angei ewe pilawa, iótekin kilisou, a kinikisietiw, me ngeniir, a erá: “Ei a wewe ngeni inisi, ewe úpwe fangoló fán ásengesimi. Oupwe sópweeló le féri ei pwe áchechchemei.”
20 A pwal ina ussun ngeni ewe kap mwirin ar mwéngéén lefááf, a apasa: “Ei kap a wewe ngeni ewe pwonen etipeeú mi fé ewe epwe poputá atun chchaai epwe niniiló fán ásengesimi.
21 “Nge nengeni! péún ewe chón afangemáei a nóm rei ren ei cheepel.
22 Pún ren enletin, meinisin met mi makketiw ussun ewe Néún aramas epwe fis ngeni, iwe nge feiengaw ngeni ena aramas, i epwe afangemá me ren!”
23 Iwe, ra poputá le pwóróusfengen lefiler iká ié me leir epwe tongeni wesewesen féri ei.
24 Iwe nge, a pwal fis eú watteen ánini lefiler ren ié me leir a lap.
25 Nge a ereniir: “Kingen ekkewe mwú ra samol wóór, me chókkewe mi wor ar nemenem wóór ra silleló ussun aramas mi féfféréch ngeni ekkewe ekkóch.
26 Nge ámi, ousap ina ussun. Nge ewe emén mi lap me leimi epwe wiliiti ewe mi kisifóchófóch, me ewe emén mi wisen emmwen epwe ussun emén chón angang.
27 Pún ié a lap, ewe emén a mwéngé* are ewe emén a wato ewe mwéngé? Esap pwe ewe emén mi mwéngé?* Nge ngang úa nóm leimi pwe emén néúmi chón angang.
28 “Iwe nge, ámi ekkewe oua fitipacheei lón sóssótui kewe,
29 me ngang úa féri eú pwonen etipeeú ngenikemi ussun chék Semei we a féri eú pwonen etipeeú ngeniei fán iten eú mwú,
30 pwe oua tongeni mwéngé me ún wóón ái cheepel lón Mwúúi me móót wóón ekkewe leenien móótun king me apwúngú ekkewe 12 einangen Israel.
31 “Simon, Simon, nengeni! Setan a erá pwe a mochen ámi meinisin, pwe epwe mworeekemi ussun wiich.
32 Nge úa tingormaw lón iótek fán itom pwe óm lúkú esap apwangapwangoló, me en, atun chék kopwe liwinsefál, kopwe apéchékkúla pwiium kewe.”
33 Iwe a ereni: “Samol, úa mmólnetá ái úpwe fituk le kalapus me máló.”
34 Nge a apasa: “Úa erenuk, Piter, emén chukó esap kékké ikenái tori óm kopwe amam óm sissileei fán úlúngát.”
35 A pwal ereniir: “Atun úa tiinikemiiló nge ousap uwou pwotoun moni are pwotoun mwéngé me ipwemi, met, ámi mi osupwangen och mettóch?” Ra apasa: “Aapw!”
36 Mwirin a ereniir: “Nge iei ewe emén mi wor ren pwotoun moni epwe angei, pwal ussun chék ren pwotoun mwéngé, me ewe emén ese wor néún ketilas epwe améméló úfan úféúfen lúkún me mééni efóch.
37 Pún úa erenikemi pwe minne mi makketiw epwe fókkun pwénúetá rei, ‘I a állealong lein ekkewe mi fókkun ngaw.’ Pún met a makketiw ussui a pwéppwénútá.”
38 Iwe ra apasa: “Samol, nengeni! ikkeei ruuofóch ketilas.” A ereniir: “A naf.”
39 Atun a ló, a feiló wóón ewe Chukun Olif ussun met a kan féfféri, me ekkewe chón káé ra pwal tapweló mwirin.
40 Atun ra tikeri ewe leeni, a ereniir: “Oupwe sópweeló le iótek pwe ousap tolong lón sóssót.”
41 Iwe, a feiló seniir ina epwe towauen án emén manei eféú faw, me a fótopwúkútiw me poputá le iótek,
42 a apasa: “Semei, iká ka mochen, kopwe angei seniei ei kap. Iwe nge, esap letipei, nge letipom epwe pwénúetá.”
43 Mwirin, emén chónláng seni láng a pwá ngeni me apéchékkúla i.
44 Nge a nóm lón eú sókkun watteen riáfféú pwe a sóssópweló le sié lón iótek, me molonan a ussun supwun chcha mi supwutiw lepwúl.
45 Lupwen a útá seni an iótek me feiló ren ekkewe chón káé, a kúner pwe ra méúr, ra pekkus ren ar letipechou.
46 A ereniir: “Pwata oua méúr? Oupwe pwáátá me sópweeló le iótek pwe ousap tolong lón sóssót.”
47 Atun a chúen fóffós, nengeni! eú mwichen aramas me ewe mwán itan Jutas, emén me lein ekkewe Engol me Rúúemén, a emmweniir, me a feiliiti Jises pwe epwe kisi i.
48 Nge Jises a ereni: “Jutas, ka afangemá ewe Néún aramas ren eú kiis?”
49 Lupwen chókkewe únúkkún i ra kúna met epwele fis, ra apasa: “Samol, áúpwe pékú ngeniir ewe ketilas?”
50 Emén me leir a mwo nge pékúoló peliefichin selingen ewe chón angang, néún ewe souasor mi lapalap.
51 Nge lón án Jises pélúweni a apasa: “A naf.” Me a attapa selingen ewe chón angang we me echikara i.
52 Mwirin, Jises a ereni ekkewe souasor mi lap me ekkewe meilapen ewe imwenfel me ekkewe néúwisin chón Jus mi feito pwe repwe aresini: “Oua feito fán ketilas me wok ussun nge oupwe ú ngeni emén chón solá?
53 Atun úa nóm remi iteiten rán lón ewe imwenfel, ámi ouse turufiei. Nge iei néúmi we kulók me ewe nemenemen rochopwak.”
54 Mwirin, ra aresini i me ra uwealó ngeni lón imwen ewe souasor mi lapalap, nge Piter a tattapweló mwirin me towaw.
55 Lupwen ra ékúetá eú ekkei lukanapen ekkewe ruumw me ra motfengen, Piter a pwal móót leir.
56 Nge emén chón angang fépwúl a kúna i an mómmóót lón saramen ewe ekkei, a attolaéchú i me apasa: “Ei mwán a pwal fiti i.”
57 Nge a amam, a apasa: “Fépwúl, úse silei i.”
58 Ekiseló mwirin pwal emén a kúna i me apasa: “Pwal en emén me leir.” Nge Piter a apasa: “Mwán, esap pwal ngang.”
59 Ina epwe mwirin eú awa, pwal emén mwán a poputá le péchékkúl le erá: “Pwúngún, ei mwán a pwal eti, pún ren enletin, i emén re Kalili!”
60 Nge Piter a apasa: “Mwán, úse silei met ena ke fósun.” Me mwittir chék, atun an chúen kakkapas, emén chukó a kékké.
61 Ren ei, ewe Samol a kul me newenewen ngeni Piter, me Piter a chemeni alon ewe Samol lupwen a ereni: “Mwen án emén chukó epwe kékké ikenái, kopwe amam ngang fán úlúngát.”
62 Iwe, a towu lúkún me kechiw pokiten a fókkun letipechou.
63 Iwe, ekkewe mwán mi mammasa Jises ra poputá le turunufasa i, éfénú i,
64 me mwirin ar pwélúoló mesan, ra kan ereni: “Iká en emén soufós, kopwe erenikem iká ié na a awatók.”
65 Me ra apasa pwal chómmóng kapas mi ésúfélúngaw ngeni i.
66 Iwe lupwen a rániló, ewe mwichen néúwisin Jus, iir ekkewe souasor mi lap me ekkewe soumak, ra kochufengen, me ra uwealó i lón leenien án chón Jus we mwichen soukapwúng mi tekia me apasa:
67 “Iká pwe en ewe Kraist, kopwe erenikem.” Nge a ereniir: “Ikáámwo úpwe erenikemi, ousap fókkun tongeni lúkú.
68 Pwal och, iká úpwe kapas eis ngenikemi, saminne oupwe pélúweni.
69 Iwe nge, seni iei ewe Néún aramas epwe mómmóót peliefichin ewe Kot mi manaman.”
70 Ren ena, iir meinisin ra apasa: “Iwe met, en ewe Néún Kot?” A ereniir: “Ámi pwisin oua apasa pwe ngang.”
71 Ra apasa: “Met lamoten pwal ekkóch kapasen pwáraatá? Pún kich pwisin sia rong seni pwisin awan.”
Footnote
^ Ina, chón emmweni ekkewe chón mmasen imwenfel.
^ Are “móót tiwiniin.”
^ Are “móót tiwiniin órun ewe cheepel.”
^ Are “móót tiwiniin órun ewe cheepel.”
