Ewe Mwúún Kot ina eú nemenem lón láng. Epwe siwili meinisin mwúún aramas me epwe efisi minne Kot a tipeni pwe epwe pwénúetá lón láng me wóón fénúfan. A múrinné ewe pwóróus usun Mwúún Kot. Ekiseló chék án Kot we Mwú epwe ataweei án aramas osupwangen eú mwú mi múrinné. Epwe etipeeúfengeni meinisin ménúmanaw mi nom wóón fénúfan.​—Álleani Taniel 2:44; Mateus 6:9, 10; 24:14.

Mi lamot epwe wor kingen eú mwú. Jiowa a seikaatá Néún we, Jesus Kraist, pwe epwe King lón An we Mwú.​—Álleani Pwärätä 11:15.

Katol ei video Met ewe Mwúún Kot?

Mi fich ngeni Néún Kot we an epwe King, pokiten i emén mi kirekiréch me a úppos fán iten minne mi pwúng. (Johannes 1:14) A pwal wor an tufich le álisi aramas pun i epwe nemeni fénúfan seni láng. Mwirin an manawsefál, a feitá láng me mwotiw peliefichin Jiowa me witiwit. (Ipru 10:12, 13) Iwe, Kot a ngeni péchékkúlen an epwe poputá le nemenem.​—Álleani Taniel 7:13, 14.

Eú kúmi mi iteni “chon pin” repwe fiti Jesus le nemenem me láng. (Taniel 7:27) Néún Jesus kewe aposel mi tuppwél, iir chón pin mi akkomw kefilitá. Tori iei, Jiowa a chúen kekefil ekkewe mwán me fefin mi tuppwél ar repwe chón pin. Ra usun Jesus le manawetá ren eú inis sise tongeni kúna.​—Álleani Johannes 14:1-3; 1 Korint 15:42-43.

 Fitemén aramas repwe feitá láng? Jesus a eita ngeniir “mwich mi kisikis.” (Lukas 12:32) Iteiter epwe 144,000. Repwe fiti Jesus le nemeni fénúfan.​—Álleani Pwärätä 14:1.

Mwúún Kot a poputá le nemenem lón 1914. * Atun Jesus a poputá le King a akkomw oturatiw Satan me néún kewe chónláng mi ngaw wóón fénúfan. Satan a fókkun lingeringer me a poputá le efisi osukosuk wóón unusen fénúfan. (Pwärätä 12:7-10, 12) Seni ena atun, án aramas kewe riáfféú ra kon lapoló. Maun, lengita, málapalap, me chechchechin fénú, iir kinikinin ewe ‘esisin’ pwe ekiseló chék ewe Mwú epwele unusen nemenaló mwékútúkútún fénúfan.​—Álleani Lukas 21:7, 10, 11, 31, TF.

Án Kot we Mwú a fen etipeeúfengeni mwichen aramas seni mwú meinisin ren ewe angangen afalafal mi fiffis wóón unusen fénúfan. Fite million aramas mi tipetekison ra kan akkanomuur fán nemenien Jesus. Án Kot we Mwú epwe túmúnúúr atun katalóón ei otot mi ngaw wóón fénúfan. Ina popun, chókkewe mi mochen repwe kúna feiéch seni án Kot we Mwú repwe káé pwe repwe chón álleasochis fán nemenien Jesus.​—Álleani Pwärätä 7:9, 14, 16, 17.

Lón úkúkkún 1,000 ier, ewe Mwú epwe apwénúetá minne Kot a tipeni fán iten aramas seni lepoputáán. Unusen fénúfan epwe wiliti paratis. Mwirin, Jesus epwe enniwili ngeni Seman we ewe Mwú. (1 Korint 15:24-26) Ié we ka mochen ereni usun án Kot we Mwú?​—Álleani Kölfel 37:10, 11, 29.