Eú me eú án Chón Pwáraatá Jiowa kewe Leenien Mwich, iten Kot we mi pin a nóm wóón. Ina minne, ach eliméchú, aéchú me túmúnú ekkewe mettóch mi ta me wóón, ina eú wis mi aúchea mi kapachelong lón ach angang ngeni Kot. Kich meinisin sia tongeni álillis.

Álillis le limeti ewe leeni mwirin mwich. Iteiten sárin mwich, chón ewe mwichefel ra pwapwa le ekis limeti ewe Leenien Mwich, nge iteiten wiik a pwal wor eú elimelim mi watte. Emén mwán mi ásimaw are chónálillisin mwichefel a wisen akkóta ena angang, fán chómmóng ra kan fiti tettelin ekkewe angang mi makketiw mi lamot epwe ffér. Ekkewe chón mwich ra féri ekkewe angang mi lamot, ren choweán pirum, suwap, télú tas, átetteliéchú sea, limeti leenien ngaseló me asammwacho, péútaaló kápich, are limeti me ótei lúkún. Fán eú lón eú ier, ewe mwichefel a akkóta eú ránin elimelim fán iten unusen ewe Leenien Mwich. Ika sia mut ngeni néúch kewe ar repwe álillis lón ei angangen elimelim, iwe, sia áiti ngeniir ar repwe pwáraatá súfél ngeni ach leenien fel.​—Än Salomon Afalafal 5:1.

Álillis lón fférsefálin minne a ta me wóón ewe Leenien Mwich are pisekin lón. Iteiten ier, emén epwe cheki unusen ewe Leenien Mwich. Ren met a ffatoló lón ewe chek, iwe, epwe kkótóló angangen fférsefálin me túmúnún pwe epwe éch, pwe esap kamé sefál minefé siwilin are waló lón leenien ffér. (2 Kronika 24:13; 34:10) Ika eú Leenien Mwich a limeliméch me múrinné, iwe, a fich an epwe eú leenien fel ngeni ach we Kot. Ren ach álillis lón ei angang, sia pwáraatá ach tongei Jiowa me aúcheani ach leenien fel. (Kölfel 122:1) A pwal eitéchú ach we Leenien Mwich lón sópwuch we.​—2 Korint 6:3.

• Met popun a lamot sipwe túmúnúéchú ach leenien fel?

• Ikkefa ekkewe kókkót fán iten túmúnún liméchún ewe Leenien Mwich?