En mi kúna ekkeei sasing lón ei puk, usun úféúféchún ekkeei Chón Pwáraatá Jiowa atun ra fiti ar kewe mwich? Pwata sia kon ekieki usun úfach me foutach?

Pún sipwe pwári súfél ngeni ach Kot. Pwúngún pwe Kot ese kon áfánni napanapen foutach me lúkún. (1 Samuel 16:7) Iwe nge, atun aua chufengen pwe aupwe fel ngeni, aua fókkun mochen pwári ám súféliti i me chienem kewe chón fel. Ika sipwe útá mwen mesen emén soukapwúng lón imwen kapwúng, sia fókkun mochen pwe foutach epwe pwári súfél ngeni wisan we. Iwe a pwal ina usun napanapach atun ach kewe mwich, epwe pwári watteen ach súféliti “ewe Souapwüngün unusen fanüfan,” Jiowa Kot, me ewe leeni sia fel ngeni lón.​—Keneses 18:25.

Pún sipwe pwári sókkun manaw sia aúcheani. Ewe Paipel a pesei Chón Kraist pwe repwe “öüköchü üfer o üföüf sokun üf mi fich” ngeni chókkewe mi niwokkusiti Jiowa. (1 Timoty 2:9, 10) “Üf mi fich” a wewe ngeni ach sisap úféúf ekkewe úf eli epwe efisi án aramas kon ngoneitikich ren ach úféúf mi eingeing, sikepwach, are pwáraaló napen inisich. A pwal wewe ngeni ach sipwe filiéchú úfach kewe ar resap nikápwesepwes are luló ámáirúún. Ena kapasen emmwen a chúen suuk ngenikich sókkópaten kefil ach sipwe pwisin filatá. Ach úféúf úf mi fich a tongeni ‘alinga ewe afalafal usun ach Chon Amanau’ me “mwareiti Kot.” (Titus 2:10, TF; 1 Petrus 2:12) Sia achchúngú án aramas ekiek usun fel ngeni Jiowa ren ach úféúféch fán iten ach kewe mwich.

Kosap mut ngeni úf an epwe pineuk le fiti mwich. Sipwe tongeni úféúf úf mi liméch, múrinné me fich ngeni mwich, nge ese pwal lamot epwe mémmong me tokorárá.

• Met lamoten napanapen úfach atun sia fel ngeni Kot?

• Ikkefa ekkewe kapasen emmwen mi emmweni ach kefil fán iten úfach me foutach?