LESEN 47
Ka Mmólnetá le Papatais?
Ka fen káé chómmóng mettóch usun Jiowa ren óm káéén Paipel. Ese mwáál ka fen féri ekkóch siwil me apwénúetá met ka káé. Nge, eli a wor met a eppetuk le fangóló manawom ngeni Jiowa me papatais. Ei lesen epwe áweweei ekkóch mettóch a tongeni eppeti án emén mochen papatais, me epwe áiti ngonuk ifa usun kopwe tongeni pworacho ngeniir.
1. Epwe ifa úkúkún óm sile me mwen óm kopwe tongeni papatais?
Ren óm kopwe papatais, a lamot óm kopwe “silei ewe let.” (1 Timoty 2:4) Esap weween pwe a lamot óm kopwe silei pélúwen meinisin ekkewe kapas eis usun Paipel me mwen óm kopwe papatais. Pwal mwo nge ekkewe Chón Kraist mi papatais ren fite fite ier ra chúen sópweló le kákkáé ewe Paipel. (Kolose 1:9, 10) Nge a lamot óm kopwe silei ekkewe popun asukul seni Paipel. Ekkewe mwán mi ásimaw ra tongeni álisuk le silei ika a naf sileom usun Paipel.
2. Ikkefa ekkóch mettóch mi lamot kopwe féri me mwen óm kopwe papatais?
Me mwen óm kopwe tongeni papatais, a lamot óm kopwe “ekieksefäl [“aier,” NW] o kul ngeni Kot.” (Álleani Föför 3:19.) Weween, kopwe fókkun niamamesini óm kewe tipis me lóóm me tingorei Jiowa an epwe omusakoló. Kopwe pwal oputásini féffér mi ngaw me úppós le eáni ewe esin manaw mi apwapwaai Kot. Pwal och, kopwe poputá le fiffiti ekkewe mwich me fiti chón ewe mwichefel le afalafal.
3. Pwata kosap mut ngeni niwokkus an epwe eppetuk?
Ekkóch ra niwokkus ika resap tongeni apwénúetá minne ra fen eáni pwon ngeni Jiowa. Pwúngún, fán ekkóch kopwe kan mwámmwáálliló, usun chék ekkewe mwán me fefin mi tuppwél mi mak pwóróuseer lón ewe Paipel. Jiowa ese menei seni chókkewe mi fel ngeni ar repwe unuséch. (Álleani Kölfel 103:13, 14.) A pwapwa atun ka achocho úkúkún óm tufich! I epwe álisuk. Pwal och, Jiowa a anúkúnúkúkich pwe ese wor och mettóch “epwe tongeni aimwüfesenikich seni [an] we chen.”—Álleani Rom 8:38, 39.
KÚTTAFICHI
Ppii ifa usun ka tongeni pworacho ngeni ese lifilifil met epwe eppetuk le papatais ren óm alapaaló óm silei Jiowa me etiwa an álillis.
4. Alapaaló óm silei Jiowa
Epwe ifa úkúkún óm silei Jiowa me mwen óm kopwe tongeni papatais? A lamot óm kopwe silei Jiowa pwe kopwe tongeni tongei me mochen apwapwaai. Fichi ei VIDEO pwe kopwe silei ifa usun chókkewe iir mi pwal kákkáé Paipel wóón unusen fénúfan ra féri ena. Mwirin pwóróusfengen wóón ei kapas eis.
-
Met a álisi ekkóch me lein chókkewe lón ewe video le mmólnetá ngeni papatais?
Álleani Rom 12:2, me mwirin pwóróusfengen wóón ekkeei kapas eis:
-
Ka tipemwaramwar ren minne ewe Paipel eáni asukul, are ika Chón Pwáraatá Jiowa ra asukula ewe enlet?
-
Ika ewer, iwe met ka tongeni féri?
5. Pworacho ngeni met ekkewe a tongeni eppetuk le papatais
Atun sia filatá le fangóló manawach ngeni Jiowa me papatais, kich meinisin epwe torikich sóssót. Ren óm kopwe silei eú pwóróus usun ena, fichi ei VIDEO, me mwirin pwóróusfengen wóón ekkeei kapas eis.
-
Lón ewe video, met sókkun weires a lamot án Narangerel epwe pworacho ngeni pwe epwe tongeni angang ngeni Jiowa?
-
Ifa usun an tongei Jiowa a álisi le ú ngeni ekkena minen eppet?
Álleani Än Salomon Fos 29:25 me 2 Timoty 1:7, me mwirin pwóróusfengen wóón ei kapas eis:
-
Met a apworaikich le ú ngeni ekkewe minen eppet?
6. Lúkúlúk wóón án Jiowa álillis
Jiowa epwe álisuk le apwapwaai i. Fichi ei VIDEO, me mwirin pwóróusfengen wóón ekkeei kapas eis.
-
Lón ewe video, met a eppeti án ewe chón káé epwe papatais?
-
Ifa usun minne a káé a álisi le alapaaló an lúkúlúk wóón Jiowa?
Álleani Aisea 41:10, 13, me mwirin pwóróusfengen wóón ei kapas eis:
-
Pwata ka tongeni lúkúlúk pwe ka tufichin apwénúetá óm pwon ngeni Jiowa pwe kopwe angang ngeni?
7. Alapaaló óm aúcheani án Jiowa tong
Lapólóón óm ekieki usun úkúkún án Jiowa tongeok, epwe pwal ina lapólóón óm kilisou ngeni me mochen angang ngeni tori feilfeiló. Álleani Kölfel 40:5, me mwirin pwóróusfengen wóón ei kapas eis:
-
Ikkefa ekkewe feiéch seni Jiowa ka kon aúcheaniir?
Ewe soufós Jeremaia a tongei Jiowa me aúcheani an we kapas, me a fókkun kilisou ren feiéchún le uwei iten Jiowa we. A erá: “Om kapas a fis pwe ai pwapwa, lelukei a meseik ren, pun itom a föü woi, ai Kot.” (Jeremaia 15:16) Pélúweni ekkeei kapas eis:
-
Pwata a eú watteen feiéch ach wiliti emén Chón Pwáraatá Jiowa?
-
Ka mochen óm kopwe papatais me wiliti emén Chón Pwáraatá Jiowa?
-
A wor met a eppetuk le féri ena?
-
Óm ekiek nge met a lamot kopwe féri pwe kopwe tongeni papatais?
EKKÓCH RA ERÁ: “Ua lólilen ika ua papatais nge usap tongeni apwénúetá meinisin met ua eáni pwon.”
-
A pwal ina usun meefiom?
MENLAPAN
Ren án Jiowa álillis, ka tongeni pworacho ngeni ese lifilifil met a eppetuk óm kopwe papatais.
Enniwili
-
Ren óm kopwe papatais, epwe ifa úkúkún met kopwe silei usun ewe Paipel?
-
Met sókkun siwil a lamot kopwe féri me mwen óm kopwe tongeni papatais?
-
Pwata kosap mut ngeni niwokkus an epwe eppetuk le papatais?
PWAL EKKÓCH PWÓRÓUS
Ppii met itá óm kefil le papatais epwe lóngólóng wóón.
Ppii ifa usun ka tongeni pworacho ngeni ekkóch sóssót mi tongeni eppetuk.
“Met A Eppeti Ai Upwe Papatais?” (Ewe Leenien Mas, March 2019)
Ppii ifa usun emén mwán a sópwéch lón an pworacho ngeni eú watteen sóssót mi eppet an epwe papatais.
Me lepoputáán, emén mwán itan Ataa a tipemwaramwar ika epwe papatais. Ppii met a álisi le eáni ena kefil mi aúchea.
