Let pour bann Romen 15:1-33
15 Me nou ki for, nou devret ed bann ki pa for, siport zot febles e pa zis fer plezir nou prop lekor.
2 Annou fer plezir nou prosen pour son prop byennet e pour batir li.
3 Parski menm Kris pa ti fer plezir son prop lekor, me zis parey i’n ganny ekrir: “Sa ki dimoun in dir pour ensilte ou, zot in servi pour ensilte mwan.”
4 Parski tou bann keksoz ki’n ganny ekrir dan lepase ti ganny ekrir pour ansenny nou pour ki atraver nou landirans ek rekonfor ki Lekritir* i donn nou, nou kapab annan lespwar.
5 Aprezan, ki sa Bondye ki donn landirans ek rekonfor i ed zot tou pour annan sa menm fason panse ek latitid ki Kris Zezi ti annan,
6 pour ki ansanm dan linite avek en sel lavwa* zot kapab glorifye Bondye ek Papa nou Senyer Zezi Kri.
7 Alor, byen resevwar* kanmarad parey Kris in byen resevwar zot osi pour ki Bondye i ganny glorifye.
8 Parski mon dir zot ki Kris ti vin serviter bann ki sirkonsi pour montre ki Bondye i toultan dir laverite e pour konfirm bann promes ki I ti fer avek zot zanset
9 e pour ki bann nasyon i kapab glorifye Bondye pour son konpasyon.* Parey i’n ganny ekrir: “Se pour sa rezon ki mon pou loue ou an piblik parmi bann nasyon e mon pou sant bann kantik pour loue ou non.”
10 Ankor enn fwa i ti dir: “Zot bann nasyon, rezoui avek son pep.”
11 Osi: “Zot bann nasyon, loue Zeova* e ki tou pep i loue li.”
12 Izai in osi dir: “En dimoun* sorti dan fanmir Zese pou vini, i pou diriz bann nasyon e zot pou annan lespwar dan li.”
13 Mon priye ki sa Bondye ki donn lespwar i ranpli zot leker avek bokou lazwa ek lape akoz zot annan konfyans dan li e ki lespri sen i ranpli zot leker avek lespwar.*
14 Mon bann frer, mon konvenki ki zot vreman anvi fer sa ki byen, zot konn byen parol Bondye e ki zot kapab konsey* kanmarad.
15 Me, mon’n koz pli fran avek zot lo serten pwen pour rapel zot sa bann keksoz, parski Bondye in demontre labonte ekstraordiner anver mwan
16 pour ki mon vin en serviter* Kris Zezi pour dimoun lezot nasyon. Mon pe fer sa travay sen pour anons sa bon nouvel Bondye pour ki dimoun lezot nasyon i kapab vin en lofrann akseptab pour Bondye e ki zot vin sen gras a lespri sen.
17 Alor mon annan rezon pour mwan zwaye akoz mon en disip Kris Zezi ki fer travay Bondye.
18 Parski mon pa pou oze koz lo okenn lezot keksoz apard sa ki Kris in fer atraver mwan pour ki bann dimoun lezot nasyon i obei. I’n fer sa atraver mon parol ek aksyon
19 e gras a bann mirak, keksoz merveye ek lespri sen Bondye. Alor mon’n pres afon sa bon nouvel konsernan Kris partou depi Zerizalenm ziska dan rezyon Iliri.
20 Anfet, dan sa fason mon’n fer li mon lobzektif pour anons sa bon nouvel kot non Kris pa ti’n deza ganny anonse, pour ki mon pa batir lo fondasyon en lot dimoun.
21 Me pour ki zis parey i’n ganny ekrir: “Bann ki pa ti’n ganny mesaz konsernan li pou konnen e bann ki pa ti’n tande pou konpran.”
22 Sanmenm rezon akoz plizyer fwa mon pa’n kapab vin kot zot.
23 Me la i nepli annan okenn teritwar dan sa rezyon kot mon pa’n anons sa bon nouvel e pour plizyer* lannen mon’n anvi vin kot zot.
24 Se pour sa rezon ki ler mon al Lespanny, mon swete vwar zot e pas en pe letan avek zot. Apre sa zot ava kapab akonpanny mwan lanmwatye semen.
25 Me la, mon pros pour al Zerizalenm pour servi bann sen.
26 Parski sa bann ki Masedwann ek Akai in kontan pour partaz zot keksoz par fer en kontribisyon pour bann sen ki pov Zerizalenm.
27 Fransman, zot in kontan pour fer li e anfet se konmsi zot ti dwa zot. Parski si bann dimoun lezot nasyon osi in benefisye avek bann keksoz spirityel bann sen, zot osi zot merit pe kontribye pour bann sen avek zot bann keksoz materyel.
28 Alor, mon pou anmenn sa kontribisyon* Zerizalenm e fer sir ki bann sen i ganny li e ler mon pe al Lespanny mon pou pas kot zot.
29 Deplis, mon konnen ki ler mon vin kot zot, mon pou vin avek en kantite benediksyon sorti kot Kris.
30 Alor mon bann frer, mon sipliy zot, gras a nou Senyer Zezi Kri ek lanmour ki lespri sen i donnen, priy Bondye en kantite pour mwan.
31 Priye pour ki mon kapab ganny delivre avek bann ki Zide ki pa krwar dan Zezi e ki bann sen Zerizalenm i kapab aksepte led* ki mon pe anmennen.
32 Koumsa, si i lavolonte Bondye, mon pou vin kot zot avek lazwa e mon pou ganny ankouraze ansanm avek zot.
33 Ki sa Bondye ki donn lape i avek zot tou. Amenn.
Bann not
^ Setadir, Labib.
^ Oubyen “labous.”
^ Oubyen “akey.”
^ Oubyen “mizerikord.”
^ Vwar Leksplikasyon bann mo.
^ Literalman, “rasin.”
^ Oubyen “i fer zot leker deborde avek lespwar.”
^ Oubyen “ansenny.”
^ Oubyen “serviter piblik.”
^ Oubyen “detrwa.”
^ Literalman, “fri.”
^ Oubyen “minister.”
