1, 2. Ki mannyer zapot Pol ti montre ki i ti apresye labonte ekstraordiner Bondye?

ZAPOT Pol ti kapab koz fran ler i ti dir: “Labonte ekstraordiner [Bondye] anver mwan pa ti anven.” (Lir 1 Korentyen 15:9, 10, NW.) ^[1] (Vwar lezot not.) Pol ti konn klerman ki i pa ti merit pitye Bondye. I ti’n persekit bann vre Kretyen.

² Ver lafen son lavi, Pol ti ekri Timote: “Mon remersye Zezi-Kri, nou Senyer ki’n donn mwan lafors pour sa travay. Mon remersye li ki’n met son konfyans dan mwan, e ki’n swazir mwan pour son servis [oubyen “minister,” NW].” (1 Timote 1:12-14) Ki ti sa minister? Pol ti dir bann ansyen dan kongregasyon Efez: “Mon prop lavi pa enportan pour mwan, sa ki enportan se ki mon kapab fini mon lakours ek sa minister ki mon’n gannyen avek Senyer  Zezi, pour rann temwannyaz afon lo sa bon nouvel konsernan labonte ekstraordiner Bondye.”​—Akt 20:24, NW.

3. Ki travay spesyal Pol ti gannyen? (Vwar portre lo paz 22.)

³ Ki sa “bon nouvel” ki Pol ti prese e ki mannyer sa i montre labonte ekstraordiner Zeova? Pol ti dir bann Kretyen Efez: “Sirman zot in tande ki mon’n ganny sa responsabilite pour ed zot benefisye avek labonte ekstraordiner Bondye.” (Efezyen 3:1, 2, NW) Zezi ti’n dir Pol pres sa bon nouvel avek bann ki pa ti Zwif. Sa ti fer li posib pour dimoun dan lezot nasyon pour form parti sa Rwayonm dan lesyel ki ganny dirize par Mesi. (Lir Efezyen 3:5-8, NW.) ^[2] (Vwar lezot not.) Pol ti devoue dan predikasyon e sa i en bon legzanp pour bann Kretyen ozordi. I ti montre ki labonte ekstraordiner Bondye pa ti “anven” oubyen napa okenn valer.

4, 5. Akoz nou kapab dir ki sa “Bonn Nouvel Rwayonm” i parey sa bon nouvel konsernan “labonte ekstraordiner Bondye”?

⁴ Dan sa letan lafen, pep Zeova i annan sa responsabilite pour pres sa “Bonn Nouvel Rwayonm . . . dan lemonn, pour ki tou dimoun i tande.” (Matye 24:14) Sa bon nouvel Rwayonm i osi “bon nouvel konsernan labonte ekstraordiner Bondye.” Ki mannyer sa? Tou sa benediksyon ki nou pou gannyen avek Rwayonm Bondye i akoz labonte Zeova. (Efezyen 1:3) Pol ti demontre lapresyasyon pour labonte ekstraordiner Zeova ler i ti devoue dan predikasyon. Eski nou pe imit legzanp Pol?​—Lir Romen 1:14-16.

⁵ Dan sa lartik avan, nou’n aprann ki mannyer nou, konman bann peser, nou kapab benefisye avek labonte ekstraordiner Zeova dan diferan fason. Vi ki nou’n ganny bokou byenfe, nou annan sa responsabilite pour ansenny lezot ki mannyer Zeova pe demontre son lanmour e ki mannyer zot t kapab benefisye. Dan ki fason nou kapab ed lezot pour apresye labonte ekstraordiner Bondye?

6, 7. Ler nou eksplik sa ranson avek dimoun, ki mannyer nou pe anons sa bon nouvel konsernan labonte ekstraordiner Bondye?

⁶ Ozordi bokou dimoun pa santi zot koupab ler zot fer pese, alor zot pa konpran akoz imen i bezwen en ranson. An menm tan, deplizanpli dimoun i realize ki zot fason viv pa fer zot ere. Bokou dimoun ki pa’n deza koz avek Temwen Zeova pa konnen ki savedir pese, ki lefe pese i annan lo nou e ki nou bezwen fer pour sorti anba lesklavaz pese. Ler zot konpran ki savedir pese, bann dimoun ki senser i kontan pour aprann ki Zeova in anvoy son garson lo later pour liber nou avek pese ek lanmor. Zeova i fer sa akoz son gran lanmour ek son labonte ekstraordiner.​—1 Zan 4:9, 10.

⁷ Remarke ki Pol ti dir konsernan Garson byenneme Zeova: ‘Gras a li, nou ganny libere par en ranson gras a son disan, wi nou fot i ganny pardonnen  dapre gran labonte ekstraordiner’ Zeova. (Efezyen 1:7, NW) Sakrifis Zezi i en gran laprev ki Bondye i kontan nou e i demontre ki kantite I annan labonte ekstraordiner. Pa i rekonfortan pour konnen ki si nou demontre lafwa dan sakrifis Zezi, nou pese pou ganny pardonnen e nou pou annan en bon konsyans! (Ebre 9:14) San dout sa i en bon nouvel pour anons avek lezot!

8. Akoz bann imen ki fer pese i bezwen rekonsilye avek Bondye?

⁸ Si dimoun pa demontre lafwa dan sakrifis Zezi, Bondye pou vwar zot konman bann lennmi. Alor, nou annan sa responsabilite pour dir zot ki zot kapab vin zanmi Bondye. Zapot Zan ti ekri: “Sa enn ki krwar dan son Garson, i ganny lavi eternel. Sa enn ki pa obeir son Garson pa pou ganny sa lavi, me i ekspoz li anba lakoler Bondye.” (Zan 3:36) Nou kontan ki sakrifis Zezi i fer li posib pour nou vin zanmi Bondye. Pol ti dekrir sa koumsa: “Otrefwa, zot ti etranze e lennmi Bondye. Zot ti son lennmi akoz tou bann move aksyon ki zot ti mazinen e ki zot ti komet. Me aprezan, par lanmor ki son Garson in sibir dan son lekor, Bondye in rekonsilye zot avek li.”​—Kolosyen 1:21, 22.

9, 10. (a) Ki responsabilite Kris ti donn son bann frer swazir? (b) Ki mannyer “lezot mouton” i ed bann Kretyen swazir?

⁹ Kris in donn son bann frer swazir lo later sa “misyon pour fer lezot rekonsilye avek li.” Pol ti dir zot: “Tou i sorti kot Bondye ki’n rekonsilye nou avek li par Kris e i’n konfye avek nou sa misyon pour fer lezot rekonsilye avek li. Annefe, par Kris, Bondye in fer tou dimoun rekonsilye avek li menm, san tenir kont zot pese. E i’n konfye nou son Parol rekonsilyasyon. Nou’n vin bann anbasader anvoye par Kris. Atraver nou, Bondye li menm in apel zot. O non Kris, nou sipliy zot, les zot ganny rekonsilye avek Bondye.”​—2 Korentyen 5:18-20.

¹⁰ I en privilez pour “lezot mouton” ed bann Kretyen swazir fer sa travay predikasyon. (Zan 10:16, NW) Konman bann ki ganny anvoye par Kris oubyen bann mesaze, “lezot mouton” pe fer pli gran parti sa travay pour pres sa bon nouvel, ansenny dimoun laverite e ed zot vin pros avek Zeova. Sa i en parti enportan pour pres sa bon nouvel konsernan labonte ekstraordiner Bondye.

11, 12. Akoz i en bon nouvel pour dimoun konnen ki zot kapab priy avek Zeova?

¹¹ Bokou dimoun i priye akoz sa i fer zot santi zot byen, me zot pa vreman krwar ki Bondye i ekout zot lapriyer. Zot bezwen konnen ki Zeova i sa enn ki “ekout nou lapriyer.” Psalmis David ti ekri: “Akoz ou ekout nou lapriyer, tou  zabitan later ava tourn ver ou. Pwa mon fot i tro lour pour mwan. Ou pou pardonn tou nou pese.”​—Psonm 65:2, 3.

¹² Zezi ti dir son bann disip: “Si zot demann nenport kwa an mon non, mon pou fer li.” (Zan 14:14) Sa i vedir ki nou kapab priye e demann “nenport kwa” ki an armoni avek lavolonte Zeova. Zan ti ekri: “Avek konfyans ki nou annan dan li, nou krwar ki si nou demann keksoz dapre son lavolonte, i pou ekout nou.” (1 Zan 5:14) Pa i byen pour ed dimoun konpran ki lapriyer pa zis en keksoz ki fer zot santi zot byen me i en fason pour apros “tronn labonte ekstraordiner”! (Ebre 4:16, NW) Ler nou montre sa bann dimoun ki mannyer pour priy dan sa bon fason, avek sa vre Bondye, pour bann keksoz apropriye, nou pe ed zot pour vin zanmi Zeova e pour ganny rekonforte ler zot dan problenm.​—Psonm 4:1; 145:18.

13, 14. (a) Ki gran privilez bann Kretyen swazir pou annan a lavenir? (b) Ki sa travay merveye bann Kretyen swazir pou fer pour limanite?

¹³ Zeova pou demontre son labonte ekstraordiner plis ankor “dan sa lemonn ki pe vini.” Ki mannyer sa? Bondye pou donn sa 144,000 ki pou renny avek Zezi dan lesyel en gran privilez. Pol ti eksplike ki mannyer sa privilez ti pou ete ler i ti ekri: “Me Bondye ki annan en kantite konpasyon e akoz son gran lanmour pour nou, i’n redonn nou lavi e fer nou ini avek Kris, menm si i ti konmsi nou ti’n mor akoz nou bann fot. Anfet se gras a labonte ekstraordiner ki zot in ganny sove. Deplis, i’n redonn nou lavi, nou tou ansanm e fer nou asiz ansanm dan lesyel, ini avek Kris Zezi, pour ki dan sa lemonn ki pe vini, Bondye pou kapab demontre grander son labonte ekstraordiner ek zenerozite anver nou ki ini avek Kris Zezi.”​—Efezyen 2:4-7, NW.

¹⁴ I pa fasil pour mazin tou sa bann keksoz merveye ki Zeova in prepare pour bann Kretyen swazir ler zot pou renny avek Kris dan lesyel. (Lik 22:28-30; Filipyen 3:20, 21; 1 Zan 3:2) Zeova pou demontre “grander son labonte ekstraordiner” anver zot dan en fason spesyal. Zot pou sa “Nouvo Zerizalenm,” nouvel marye Kris. (Revelasyon 3:12; 17:14; 21:2, 9, 10) Zot pou travay avek Zezi pour “geri tou bann nasyon.” Zot pou liber bann imen avek pese ek lanmor e ed zot vin parfe.​—Lir Revelasyon 22:1, 2, 17.

15, 16. Ki mannyer Zeova pou demontre son labonte ekstraordiner anver “lezot mouton” a lavenir?

¹⁵ Efezyen 2:7 i dir ki Bondye pou demontre labonte ekstraordiner “dan sa lemonn ki pe vini.” Sa letan tou dimoun lo later pou eksperyans “grander son labonte ekstraordiner.” (Lik 18:29, 30) Enn parmi bann pli bon fason ki Zeova pou demontre son labonte  ekstraordiner lo later, i pou ler i resisit bann imen “dan Latonm.” (Zob 14:13-15, NW; Zan 5:28, 29) Lekel ki pou resisite? Bann zonm ek fanm ki’n mor avan Kris e bann ki form parti “lezot mouton” ki mor fidel pandan bann dernyen zour. Tou sa bann dimoun fidel ki pou ganny resisite pou kontinyen servi Zeova.

¹⁶ Plizyer milyon dimoun ki’n mor ki pa ti konn Bondye, pou osi ganny resisite. Zan ti ekri: “Mon ti war bann mor, gran konman pti, pe debout devan tronn, e bann liv ti’n ouver. Ti annan osi en lot liv ki ti’n ouver: Liv lavi. Bann mor ti ganny zize dapre sa ki zot ti’n fer, e dapre sa ki ti’n ganny ekrir dan sa bann liv. Lanmer ti rann son bann mor. Lanmor ek lemonn lanmor ti rann zot bann mor, e zot tou, zot ti ganny zize dapre bann aksyon ki zot ti’n fer.” (Revelasyon 20:12, 13) Bann ki’n ganny resisite pou ganny sa loportinite pour aprann konn Zeova e aksepte son lalwa. Zot pou bezwen aplik konsey Labib ek bann nouvo lenstriksyon ki pou dan bann “liv.” Sa bann nouvo lenstriksyon pou en lot fason ki Zeova pou demontre son labonte ekstraordiner.

17. Ki nou bezwen gard antet ler nou prese?

¹⁷ Plis ki zanmen oparavan, la i lemoman pour pres sa bon nouvel Rwayonm akoz lafen i pros! (Mark 13:10) Nou bezwen gard antet ki ler nou prese, nou  lobzektif i pour onor Zeova. Ki mannyer nou kapab fer sa? Nou bezwen dir dimoun ki tou benediksyon ki nou pou gannyen dan sa nouvo lemonn, i posib gras a labonte ekstraordiner Zeova.

18, 19. Ki mannyer nou glorifye labonte ekstraordiner Zeova?

¹⁸ Ler nou pres avek dimoun, nou kapab eksplik zot ki ler Rwayonm Kris pou rennyen, bann imen pou ganny plis benediksyon e ptitapti zot pou vin parfe gras a sa ranson. Labib i dir: “Sa kreasyon pou ganny libere en zour kont pouvwar destrikter ki pe gard li dan lesklavaz, pour li partisip dan laliberte ek laglwar bann zanfan Bondye.” (Romen 8:21) Sa pou posib zis atraver labonte ekstraordiner Zeova.

¹⁹ Nou annan sa privilez pour dir tou dimoun sa zoli promes ki ganny trouve dan Revelasyon 21:4, 5: “[Bondye] pou eswiy tou larm dan zot lizye. Lanmor pou nepli egziste. Pou nepli annan ni dey, ni larm, ni soufrans, akoz lemonn ansyen in disparet.” Zeova, sa enn ki asiz lo tronn i dir: “La mon refer tou keksoz nouvo.” I ti osi dir: “Ekrir! Sa bann parol i serten e vre.” Ler nou devoue pour pres sa bon nouvel avek lezot, nou glorifye labonte ekstraordiner Zeova.