TOU le-z-an, plis ki sis milyon dimoun i fer en vwayaz pour al dan en landrwa Zapon ki antoure avek lanmer, dan en bwa kot i annan bann gran pye sed. Zot vin kot gran tanp Ise, sa bondye soley ki apel Amaterasu Omikami, ki’n ganny adore pour apepre de mil an. Premyerman, bann adorater i lav zot lanmen ek labous pour pirifye zot lekor. Apre, zot debout devan lasal ladorasyon ki dan sa tanp, zot swiv en seremoni relizye kot zot bes anba, bat lanmen e fer lapriyer avek sa bondye soley. a Larelizyon Shinto i les zot bann fidel partisip dan lezot form ladorasyon, me i osi annan serten Boudis, bann ki dir zot Kretyen e bann dimoun ki sorti dan lezot larelizyon ki pa vwar nanryen mal pour partisip dan sa bann seremoni kot tanp Shinto.

En kantite parmi bann gran larelizyon, i annan bann lagrot, lasapel oubyen tanp b ki ganny vizite par plizyer milyon dimoun. Dan bann pei kot dimoun i dir zot Kretyen, i annan bokou legliz oubyen lagrot ek lasapel ki’n ganny dedye pour Zezi, Mari ek bann sen. Lezot ki parey in ganny mete dan bann landrwa kot swadizan bann levennman biblik oubyen mirak in arive resaman oubyen kot bann lobze relizye i ganny garde. Bokou dimoun i al kot sa bann lagrot, lasapel oubyen tanp akoz zot krwar i annan plis sans ki zot lapriyer i ganny ekoute si zot fer li dan en landrwa sakre. Pour lezot, ariv kot bann landrwa sakre i lafen en gran pelerinaz ki zot in fer pour demontre zot devosyon relizye.

Eski bann lapriyer ek siplikasyon pou pli byen ganny ekoute oubyen reponn si i ganny fer kot bann landrwa sakre? Eski Bondye pou kontan ladorasyon bann dimoun ki fer bann gran pelerinaz pour al laba? Menm si dimoun i fer bann gran pelerinaz pour demontre zot devosyon anver Bondye, eski i fer li plezir? Eski bann Kretyen i devret fer zot ladorasyon kot sa bann ladrwa? Larepons sa bann kestyon pa pou zis dir nou ki mannyer nou devret vwar ladorasyon kot sa bann landrwa sakre me i pou ed nou konpran ki kalite ladorasyon ki Bondye i vreman kontan.

En konversasyon ki Zezi ti fer avek en madanm Samariten i fer konn pwennvi Bondye lo ladorasyon bann landrwa sakre. Zezi ti pas par Samari e i ti aret kot en pwi pour repoze pre avek lavil Sikar. I ti konmans en konversasyon avek en madanm ki ti’n vin  sers delo kot sa pwi. Anmezir ki zot ti pe koze, sa madanm ti fer resorti sa gran diferans ki ti annan ant larelizyon Zwif ek Samariten. Sa madanm ti dir: “Mon bann zanset ti ador Bondye lo sa montanny, me zot Zwif zot dir nou devre ador Bondye Zerizalenm.”​—Zan 4:5-9, 20.

Sa montanny ki sa madanm ti pe koz lo la ti Montanny Gerizim ki trouve apepre 50 kilomet dan nor Zerizalenm. Laba bann Samariten ti deza annan en tanp kot zot ti selebre bann lafet tel parey Lapak. Par kont, olye konsantre lo zot diferans, Zezi ti dir avek sa madanm: “Madanm krwar mwan, letan pe vini kot zot pa pou ador Bondye ni lo sa montanny ni Zerizalenm.” (Zan 4:21) Lefet ki en Zwif ki ti dir sa parol, sa ti sirprenan. Akoz ladorasyon kot tanp Bondye Zerizalenm ti pou arete?

Zezi ti kontinyen: “Ler pe vini e i’n fini arive pour bann vre ladorater ador Bondye an-espri e an verite, parski se koumsa ki Bondye i oule ki nou ador li.” (Zan 4:23) Pour plizyer syek bann Zwif ti vwar sa zoli tanp Zerizalenm konman zot landrwa ladorasyon. Zot ti al laba trwa fwa par an pour ofer sakrifis avek zot Bondye Zeova. (Egzod 23:14-17) Me Zezi ti dir ki tousala ti pou sanze e ki bann “vre adorater” pou ador “ an-espri e an verite.”

Tanp Zwif ti dan en landrwa kot i ti fasil pour vwar. Me nou pa kapab vwar lespri ek laverite, ni menm met li dan en landrwa. Alor, Zezi ti pe fer konpran ki vre ladorasyon Kretyen pa depan lo okenn batiman oubyen landrwa, ki swa Montanny Gerizim, tanp Zerizalenm oubyen lezot landrwa sakre.

Dan son konversasyon avek sa madanm Samariten, Zezi ti osi dir ki “sa ler” kot pou annan en sanzman dan lafason ki nou ador Bondye “pe vini.” Kan ki sa ti pou arive? Sa ti ariv ler Zezi ti sakrifye son lavi e met en lafen avek ladorasyon larelizyon Zwif baze lo Lalwa Moiz. (Romen 10:4) Me Zezi ti osi dir: “Ler . . . i’n fini arive.” Akoz? Parski konman Mesi, Zezi ti pe deza rasanble son bann disip ki ti pou obei sa ki i ti dir apre: “Bondye i Lespri e tou sa ki ador li, i devre ador li an-espri e an verite.” (Zan 4:24) Alor ki i vedir ador an espri e an verite?

Ler Zezi ti koz konsernan ladorasyon avek lespri, i ti pe koz konsernan lespri sen Bondye ki enn parmi lezot keksoz ki gid nou pour nou arive konpran Labib. (1 Korentyen 2:9-12) Laverite ki Zezi ti pe koz lo la i refer avek en konnesans egzakt sorti dan Labib. Alor, Bondye i aksepte en ladorasyon ki  ganny fer dapre lansennyman sorti dan Labib e ki ganny gide par lespri sen olye ganny fer dan okenn landrwa spesyal.

Ki mannyer alor bann Kretyen i devret vwar bann pelerinaz kot bann landrwa sakre? Si nou pran an kont konmannman Zezi ki bann vre adorater pour ador Bondye an espri e an verite, i kler ki bann ladorasyon ki ganny fer kot nenport sa bann landrwa sakre napa okenn valer spesyal pour nou Papa dan lesyel. Deplis, Labib i dir nou ki pwennvi Bondye i annan konsernan demontre en gran respe pour ladorasyon zidol. I dir: “Elwanny zot avek ladorasyon bann zidol.” (1 Korentyen 10:14; 1 Zan 5:21) Sanmenm sa ki en vre Kretyen pa pou zanmen ador Bondye dan okenn landrwa ki ganny vwar konman sen oubyen enn ki ankouraz ladorasyon zidol. Alor, konsernan bann landrwa sakre bann vre Kretyen pa pou fer zot ladorasyon laba.

Sa pa vedir ki Labib i defann en dimoun swazir en landrwa ki i prefere pour priye, etidye e medite. En landrwa respektab e annord, i fer li pli fasil pour aprann e diskit bann keksoz spirityel. I pa mal pour fer en plak kot non sa dimoun ki’n mor in ganny angrave. Sa i kapab senpleman en fason pour demontre rekonesans oubyen lafeksyon pour sa dimoun. Me, si nou konsider sa bann landrwa ladorasyon, ador bann zimaz oubyen lobze relizye konman sen, sa ti pou konpletman pa annakor avek parol Zezi.

Alor, ou pa bezwen fer en gran pelerinaz pour al kot en landrwa sakre avek lespwar ki Bondye pou tann ou lapriyer pli byen. Bondye pa pou ni menm pran plezir avek ou oubyen donn ou bann benediksyon spesyal. Labib i dir ki Zeova “Senyer lesyel ek later, . . . pa reste dan bann tanp ki’n konstri par lanmen zonm.” Me sa pa fer Bondye lwen avek nou. Nenport ki landrwa kot nou pou priy li, i pou tann nou akoz “i pa lwen avek sakenn parmi nou.”​—Akt 17:24-27.