Sa bon nouvel Rwayonm pou ganny anonse partou lo later, zis parey Zezi ti predir. (Matye 24:14) Dapre liv Danyel dan Labib, sa Rwayonm i en gouvernman etablir par Bondye. Sapit 2 sa liv i koz lo en profesi ki montre bann rwayonm oubyen gouvernman imen ki ti dirize depi letan Babilonn ziska nou letan. Verse 44 dan sa menm sapit i predir sa ki pou arive a lavenir ler i dir:

“Bondye lesyel pou etabli en rwayonm ki pa pou zanmen ganny detri; sa rwayonm pa pou zanmen pas avek en lot pep. I pou kraz tou sa bann rwayonm e detri tou konpletman; me li, i pou reste pour touzour.”

Sa verse ek lezot verse Labib i predir ki Rwayonm Bondye pou ranplas tou bann gouvernman imen e i pou anmenn lord ek stabilite pour tou dimoun lo later. Ki mannyer lavi pou ete ler Rwayonm Bondye pou diriz lo later? Annou vwar serten zoli promes ki pou byento vin vre.

• I POU NEPLI ANNAN LAGER

  Psonm 46:9: “[Bondye] i fer lager arete partou lo later; i kas bann fles, i detri bann lans; i met dife dan bann boukliye.”

  Zis mazinen ki mannyer lemonn ti pou ete si tou sa larzan ek konnesans ki pe ganny servi pour fer zarm ti ganny servi pour fer bann keksoz ki pou benefisye imen olye touy zot! Sa promes pou vin vre ler Rwayonm Bondye pou diriz later.

• I POU NEPLI ANNAN MALADI

  Izai 33:24: “Personn pa pou dir: Mon malad!”

  Imazin en lemonn kot personn pa pou soufer avek malad leker, kanser, malarya oubyen okenn lezot maladi. Nou pou nepli bezwen lopital ek latizann. Tou dimoun pou annan en lasante parfe.

• I POU NEPLI ANNAN MANKMAN MANZE

  Psonm 72:16, NWT: “Legren pou annabondans lo later. Anler lo latet bann montanny i pou annabondans.”

  Later pou prodwir ase manze e tou dimoun pour kapab gannyen. I pou nepli annan lafamin ek malnitrisyon.

• I POU NEPLI ANNAN DOULER, DEY EK LANMOR

  Revelasyon 21:4: “[Bondye] pou eswiy tou larm dan zot lizye, i pou nepli annan ni lanmor, ni dey, ni leokri, ni douler ankor. Sa bann keksoz avan in fini disparet.”

   Sa i pou vedir ki nou pou annan en lavi parfe e nou pou viv pour touzour dan paradi lo later. Sanmenm sa ki nou Kreater, Zeova in promet.

Eski ou krwar sa bann promes pou vin vre en zour? Menm si laplipar dimoun ti a kontan vwar sa bann promes vin vre, i annan bokou ki pa kapab konpran ki mannyer imen pou viv pour touzour lo later. Sa pa sirprann nou akoz napa okenn imen ki’n deza viv pour touzour, ki kapab dir nou ki mannyer sa kalite lavi i ete.

Pour bokou lannen, imen in lesklav pese ek lanmor. Sa in anmenn sitan problenm, douler ek soufrans ki bokou dimoun i krwar tou sa la i normal e i zis en par dan lavi. Me pa sa ki nou Kreater, Zeova ti anvi pour limanite.

Pour ed nou apresye e asire ki tou sa bann promes pou vin vre, Bondye in dir: “Parol ki pou sorti dan mon labous pa pour retourn ver mwan san ki i’n fer son lefe, san ki i’n akonpli mon dezir e realiz sa ki mon’n anvoy li fer.”​—Izai 55:11.

Dan Labib, Zeova i ganny dekrir konman sa Bondye “ki pa kapab koz manti.” (Tit 1:2) Vi ki in promet tou sa bann keksoz merveye a lavenir, i ti pou saz pour demann nou lekor: Eski i vreman posib pour imen viv pour touzour dan Paradi lo later? Ki nou devret fer pour ki nou kapab viv pour touzour dan Paradi lo later? Bann lartik ki swiv, pou donn larepons sa bann kestyon.