Zezi ti ansenny dimoun pour fer lape avek kanmarad. Me en fwa, i ti dir son bann zapot: “Pa krwar ki mon’n vin anmenn lape lo later, mon pa’n vin anmenn lape me lepe. Mon’n vin anmenn divizyon, garson kont son papa, fiy kont son manman e belfiy kont son belmer.” (Mat. 10:34, 35) Ki Zezi ti pe esey dir?

Zezi pa ti anvi ki bann fanmir i fase avek kanmarad me i ti konnen ki son lansennyman ti pou fer divizyon dan serten fanmir. Alor, bann ki ti anvi vin disip Kris e batize ti bezwen konnen ki zot desizyon ti pou annan konsekans. Parfwa, zot konzwen oubyen lezot manm fanmir i kapab opoz zot e sa pou fer li difisil pour zot obei bann lansennyman Kris.

Labib i ankouraz bann Kretyen “pour viv anpe avek tou dimoun.” (Rom. 12:18) Me bann lansennyman Zezi i kapab vin parey en “lepe” dan serten fanmir. Sa i arive ler en manm fanmir i aksepte bann lansennyman Zezi tandis ki lezot pa aksepte oubyen zot opoz lansennyman Zezi. Dan en ka koumsa, sa bann manm fanmir i vin “lennmi” sa enn ki pe aprann laverite.​—Mat. 10:36.

Parfwa bann disip Kris ki reste dan menm lakaz avek zot fanmir ki pa servi Zeova, i bezwen deside si zot pou fer sa ki fer plezir Zeova ek Zezi ouswa zot fanmir. Par egzanp, bann manm fanmir ki pa servi Zeova i kapab esey fors zot pour selebre en lafet ki annan pour fer avek fo larelizyon. Ler sa i arive, zot bezwen deside lekel ki zot pou fer plezir. Zezi ti dir: “En dimoun ki annan plis lanmour pour son papa oubyen son manman ki pour mwan pa diny pour vin mon disip.” (Mat. 10:37) Byensir, Zezi pa ti pe dir ki en dimoun ki ti anvi vin son disip i devret kontan son paran mwens. O kontrer, i ti pe ansenny zot ki mannyer pour konnen kwa ki pli enportan. Si bann manm fanmir ki pa servi Zeova i esey anpes nou servi Zeova, nou kontinyen kontan zot me nou realize ki nou lanmour pour Zeova i pli enportan.

Ler nou fanmir i opoz nou, sa i kapab fer nou vreman sagren. Me kantmenm sa, bann disip Zezi i gard sa ki Zezi ti dir antet. Zezi ti dir: “En dimoun ki pa aksepte pour anmenn son poto matir e swiv mwan pa diny pour vin mon disip.” (Mat. 10:38) Andotmo, pour bann Kretyen, ler zot fanmir i opoz zot sa i form parti soufrans ki bann disip Kris i pare pour andire. Me zot osi swete ki zot bon kondwit i motiv zot fanmir ki pa servi Zeova pour sanz zot nide e anvi aprann sa ki Labib i dir.​—1 Pyer 3:1, 2.