Nasyon-z-ini pe ankouraz tou dimoun pour korpere avek kanmarad, pour respe drwa imen e pour protez lanvironnman. Pour ki rezon? Maher Nasser ti ekri dan magazin UN Chronicle ki partou dan lemonn dimoun pe fer fas avek “sanzman klima, aktivite kriminel ki byen organize, lenzistis ki pe ogmante, bann konfli ki pa ganny rezourd, en kantite dimoun ki pe ganny forse pour kit zot landrwa, terorizm partou dan lemonn [e] bann maladi kontazyez.”

Lezot, parey Dante (1265-1321) ki ti en filozof Italyen, poet e politisyen ensi ki Albert Einstein (1879-1955) ki ti en syantis, in menm al pli lwen e rekomande ki i annan en gouvernman mondyal. Dante ti krwar ki lape pa ti pou kapab dire dan en lemonn ki divize lo plan politik. I ti repet sa ki Zezi Kri ti dir dan Lik 11:17, ki “si i annan divizyon dan en rwayonm, i pou ganny detrir.”

Pa lontan apre Dezyenm Lager Mondyal kot de bonm atomik ti’n ganny servi, Albert Einstein ti ekri Lasanble Zeneral Nasyon-z-ini en let, ki ti ganny pibliye dan zournal. I ti dir: “Nasyon-z-ini i bezwen azir vitman pour kree bann kondisyon ki neseser pour annan sekirite enternasyonal, par konmans fer provizyon pour annan en gouvernman ki diriz lemonn antye.”

Eski nou ti pou kapab asire ki bann politisyen ki form parti sa gouvernman pwisan pa pou zanmen vin koronpi, abiz lo lezot e pou kapab anmenn lape lo later? Ouswa eski zot pou parey lezot move dirizan? Sa bann kestyon i fer nou rapel parol en istoryen Angle, Lord Acton, ki ti dir: “Pouvwar i tant pour fer dimoun vin koronpi e annan tou pouvwar i fer dimoun vin koronpi konpletman.”

Kantmenm sa, pour ki limanite i annan vre lape ek larmoni, nou bezwen ini. Me ki mannyer nou kapab atenn sa lobzektif? Eski i posib pour fer sa? Labib i dir wi. I kapab e i pou ganny akonplir. Ki mannyer? Pa avek en gouvernman ki annan bann politisyen koronpi, me atraver en gouvernman ki Bondye in etabli. An plis ki sa, sa gouvernman pou montre ki zis Bondye ki annan drwa diriz lo son kreasyon. Ki gouvernman nou pe koz lo la? Labib i menm donn li sa non, “Rwayonm Bondye.”​—Lik 4:43.

Zezi Kri ti pe mazin lo Rwayonm Bondye dan son lapriyer model, ler i ti dir: “Ki ou Rwayonm i vini. Ki ou lavolonte i ganny fer lo later.” (Matye 6:9, 10) Rwayonm Bondye pou fer sir ki lavolonte Bondye i ganny fer lo later e non pa lavolonte bann ki voras pouvwar e egois.

Rwayonm Bondye i osi ganny apele “Rwayonm lesyel.” (Matye 5:3) Akoz? Parski i dan lesyel e i pou diriz lo later. Reflesi lo ki sa i vedir. Sa gouvernman pa pou bezwen sipor materyel ouswa finansyel. Pa sa pou en soulazman pour bann imen!

Parey sa term “rwayonm” i montre, Rwayonm Bondye i en gouvernman ki rwayal. I annan en Lerwa, Zezi Kri, ki ti resevwar son lotorite avek Bondye. Konsernan Zezi, Labib i dir:

• “Lotorite i repoz lo son zepol . . . Son lotorite pou kontinyen grandi e lape pou rennyen pour touzour.”​—Izai 9:6, 7.

•   “I ti resevwar lotorite, loner ek rwayote; tou bann pep, tou bann nasyon, dimoun ki sorti dan tou langaz ti servi li. . . . Son renny pa pou zanmen fini.”​—Danyel 7:14.

• “Rwayonm nou Senyer [Bondye] e son Kris pe diriz lemonn.”​—Revelasyon 11:15.

Sa ki Zezi ti pe demande dan lapriyer model pou vin vre ler Rwayonm Bondye pou konpletman akonpli lavolonte Bondye lo later. Anba son dominasyon, tou dimoun pou aprann ki mannyer pour pran swen avek nou plannet pour ki i revin parey i ti ete o konmansman.

Par lao tou, Rwayonm Bondye pou ansenny son bann sitwayen. Tou dimoun pou ganny montre ki mannyer pour viv dapre menm standar. I pou napa okenn divizyon. I “pou nepli annan nanryen ki fer dimal” parski “parey delo sale i ranpli losean, konnesans [Zeova] pou ranpli later.”​—Izai 11:9.

Dimoun partou lo later pou ini e viv anpe avek kanmarad. Sanmenm sa ki Nasyon-z-ini ti oule akonpli. “Zot pou trouv bokou plezir dan labondans lape.” (Psonm 37:11, NWT) Avek letan, bann mo parey “krim,” “polisyon,” lapovrete” ek “lager” pou nepli egziste dan nou vokabiler. Me kan ki sa pou arive? Kan ki Rwayonm Bondye pou konmans diriz later antye? Ki mannyer i pou fer sa? Ki mannyer ou pou benefisye anba son dominasyon? Annou vwar.