Ou non ek ou laparans pa vreman dir ki kalite dimoun ou ete. Me sa ki en dimoun i ete i enkli son valer, krwayans, personnalite ansanm avek son non ek laparans.

Ler ou konnen ki kalite dimoun ou ete, ou pou defann ou krwayans dan plas les ou bann dalon kontrol ou.

“Bokou dimoun i parey mannken ki ou vwar dan vitrin. Zot pa swazir ki lenz zot pou mete me lezot ki deside.”​—Adrian.

“Mon’n aprann ki mannyer pour defann sa ki byen menm si i difisil. Mon kapab konnen lekel ki vreman mon zanmi par fason ki zot azir e ki mannyer mon fer ler mon avek zot.”​—Courtney.

PRENSIP LABIB: “Pa les sa lemonn enfliyans zot, me transform zot par sanz zot fason panse.”​—Romen 12:2.

Konnen ki kalite dimoun ou ete la konmela e sa ki ou anvi vini par reflesir lo ou pwen for, ou pwen feb e sa ki ou krwar ladan. En fason pour fer sa i par reponn sa bann kestyon swivan.

Mon pwen for: Ki abilite mon annan? Ki mon pwen for? (Par egzanp: Eski mon abitye ariv aler? kapab kontrol mon lekor? travay dir? kontan partaze?) Ki bann bon keksoz ki mon fer?

SIZESYON: Eski ou vwar li difisil pour mazin bann bon keksoz lo ou menm? Demann ou paran oubyen en zanmi ki ou annan konfyans ladan ki ou pwen for e akoz i krwar sa i ou pwen for.

PRENSIP LABIB: “Sakenn i devret egzamin son prop aksyon e apre sa, i pou kontan akoz sa ki li menm in fer e pa akoz i pe konpar li avek en lot dimoun.”​—Galat 6:4.

Mon pwen feb: Ki laspe dan mon personnalite ki mon pli bezwen travay lo la? Kan ki i pli fasil pour mwan ganny tante pour fer sa ki mal? Dan ki sityasyon mon kapab demontre plis kontrol lo mon lekor?

PRENSIP LABIB: “Si nou dir, ‘Nou pa fer pese,’ nou pe anbet nou lekor.”​—1 Zan 1:8.

Sa ki mon krwar ladan: Ki standar moral mon swiv e akoz? Eski mon krwar dan Bondye? Kwa ki fer mon asire ki i egziste? Kwa ki mon konsider enzis e akoz? Ki mon krwar pou arive dan lavenir?

PRENSIP LABIB: “Refleksyon ava protez ou, larezon ava vey lo ou.”​—Proverb 2:11.