Pa les nanryen anpes ou ganny laglwar

“Sa enn ki annan limilite pou ganny laglwar.”​—PROV. 29:23.

KI OU POU REPONN?

Ki laglwar nou gannyen avek Bondye?

Kwa ki kapab anpes nou ganny laglwar?

Dan ki sans nou landirans i kapab vedir laglwar pour lezot?

1, 2. (a) Ki sinifikasyon sa mo orizinal pour “laglwar”? (b) Ki kestyon nou pou egzaminen dan sa lartik?

KAN ou tann sa mo “laglwar,” kwa ki vin dan ou lespri? Eski se labote ekstraordiner kreasyon? (Ps. 19:1) Eski se louanz ek laglwar ki bann imen ki vreman ris, saz e ki’n akonplir bokou i annan? Dan Labib, sa mo orizinal ki’n ganny tradwir “laglwar” i donn sa lide en keksoz lour. Dan letan lontan, kan larzan ti ganny fer avek bann metal presye, pli en konny ti lour pli i ti annan valer. Avek letan, bann mo ki ti ganny servi pour en keksoz ki ti annan pwa in refer avek en keksoz ki annan gran valer, ki manifik oubyen enpresyonan.

² Petet nou enpresyonnen par pouvwar, pozisyon ouswa repitasyon en lot dimoun, me kwa ki Bondye i rode dan bann imen? Anfet, Labib i koz lo en laglwar ki Bondye i akord bann imen. Par egzanp, Proverb 22:4 i dir: “Limilite ek lakrent pour Zeova i anmenn larises ek laglwar ek lavi.” Disip Zak ti ekrir: “Imilye zot devan Senyer e i ava elev zot.” (Zak 4:10) Ki sa laglwar ki Zeova i akord bann imen? Kwa ki kapab anpes nou ganny sa laglwar? Ki mannyer nou kapab ed lezot ganny sa laglwar?

3-5. Ver ki kalite laglwar Zeova i diriz nou?

³ En psalmis ti annan konfyans ki Zeova ti pou tyonbo son lanmen drwat e gid li ver sa vre laglwar. (Lir Psonm 73:23, 24. *) Ki mannyer Zeova i fer sa? Zeova i gid son bann serviter ki annan limilite ver laglwar par onor zot dan plizyer fason. I beni zot avek konnesans konsernan son lavolonte. (1 Kor. 2:7) Sa bann ki ekout son parol e obeir li, i donn zot sa loner pour annan en relasyon personnel avek li.​—Zak 4:8.

 ⁴ Zeova in konfye son bann serviter en trezor presye e sa se predikasyon. (2 Kor. 4:1, 7) Sa minister i anmenn ver laglwar. Avek bann ki profit zot privilez servis pour loue Zeova e pour ed lezot, Zeova i fer sa promes: “Mon pou onor bann ki onor mwan.” (1 Sam. 2:30) Sa bann dimoun i ganny onore par annan en bon repitasyon devan Zeova e lezot serviter Zeova i koz an byen lo zot.​—Prov. 11:16; 22:1.

⁵ Me ki lavenir i annan pour bann ki “met lespwar dan Zeova e swiv son semen”? Zot annan sa promes: “[Zeova] pou elev ou pour ki ou posed later. Ou pou vwar kan bann mesan i ganny detrir.” (Ps. 37:34) Zot pe esper avek enpasyans sa loner pour ganny lavi eternel.​—Ps. 37:29.

‘MON PA AKSEPTE LAGLWAR ZONM’

6, 7. Akoz bokou pa ti met lafwa dan Zezi?

⁶ Kwa ki kapab anpes nou ganny sa laglwar ki Zeova in pare pour akord nou? En fakter se si nou donn plis valer lopinyon sa bann ki napa en relasyon avek Bondye. Get sa ki zapot Zan ti ekrir konsernan serten ki ti annan lotorite dan letan Zezi: “Plizyer sef Zwif ti krwar dan Zezi, me akoz bann Farizyen zot pa ti deklar sa an piblik, pangar zot ti a kapab ganny met deor sinagog. Parski zot ti prefer felisitasyon [oubyen “laglwar,” NW] zonm plis ki felisitasyon [oubyen “laglwar,” NW] Bondye.” (Zan 12:42, 43) Pa i ti pou’n pli bon si sa bann sef pa ti’n atas tro gran lenportans avek panse bann Farizyen.

⁷ Pli boner dan son minister, Zezi ti montre klerman akoz bokou pa ti aksepte li e met lafwa dan li. (Lir Zan 5:39-44.) Pour plizyer syek, nasyon Izrael ti pe esper larive Mesi avek bokou enpasyans. Ler Zezi ti konmans ansennyen, serten dimoun ti’n kapab konpran dapre profesi Danyel ki sa letan ti’n arive pour Kris aparet. Plizyer mwan pli boner, kan Zan Batis ti pe prese, bokou ti pe dir: “Zan pa limenm Mesi.” (Lik 3:15) Aprezan, sa Mesi ki lontan zot ti pe espere ti parmi zot. Me, bann ki ti konn byen Lalwa pa ti oule aksepte li. Zezi ti montre ledwa lo sa rezon akoz an dizan: “Ki mannyer zot a kapab krwar mwan? Zot ki kontan resevwar felisitasyon [oubyen “laglwar,” NW] avek kanmarad, me felisitasyon [oubyen “laglwar,” NW] ki sorti kot sel Bondye zot pa rode?”

8, 9. An servan sa legzanp lo lalimyer, montre ki mannyer bann imen i kapab en lobstak pour laglwar Bondye?

⁸ Pour kapab konpran dan ki fason laglwar imen i kapab anpes nou ganny laglwar avek Bondye, annou konpar laglwar avek lalimyer. Nou liniver i vreman glorye dan li menm. Eski ou rapel ki dernyen fwa ou ti get dan lesyel en zour swar kot lesyel ti kler e ou’n vwar sa ta zetwal ki alim lesyel? “Labote bann zetwal” i vreman enpresyonan. (1 Kor. 15:40, 41) Me, kan ou get lesyel dan en lavil kot i annan lalimyer partou, eski i parey? Be, lalimyer dan sa lavil i kapab fer li preski enposib pour nou vwar lalimyer bann zetwal. Eski se akoz lalimyer lo semen, lo batiman ek bann moniman i pli for ouswa pli zoli ki laklerte bann zetwal? Non. Sa i arive akoz lalimyer dan lavil i pli pros avek nou e zot enterfer avek sa ki nou vwar dan kreasyon Zeova. Pour kapab get byen bann mervey pandan lannwit, fodre nou pa get ouswa les lezot lalimyer distrer nou vizyon.

⁹ Pareyman, si nou tro kontan laglwar zonm, sa ti kapab anpes nou apresye e get sa laglwar eternel ki Zeova i pare pour akord nou. Bokou dimoun pa reisi aksepte mesaz Rwayonm, akoz zot per  sa ki lezot ouswa zot fanmir i kapab mazinen lo zot. Me eski sa dezir pour ganny laglwar bann imen i kapab annan lefe lo bann serviter Bondye ki’n dedye zot lavi avek li? Meton, en zenn onm in ganny demande pour pres dan en landrwa kot dimoun i konn li ase byen me personn pa konnen i en Temwen Zeova. Eski i pou per? Ouswa si en dimoun i ganny sikannen akoz i pe pourswiv bann lobzektif spirityel, eski i pou les sa bann ki napa en bon vizyon spirityel enfliyans son bann swa dan lavi? Ouswa en Kretyen in fer en pese grav, eski i pou kasyet son pese akoz i per pangar i perdi son privilez dan kongregasyon ouswa akoz i pa anvi dezapwent bann ki kontan li? Dan sa dezyenm ka, si i premyerman anvi aranz son relasyon avek Zeova, i pou “apel bann ansyen” dan kongregasyon e rod zot led.​—Lir Zak 5:14-16.

10. (a) Dan ki fason en tro gran konsern lo lafason ki lezot i vwar nou i kapab annan en move lefe lo nou zizman? (b) Ki nou kapab asire si nou annan limilite?

¹⁰ I kapab ki nou pe progrese pour vin pli matir spirityelman, me enn nou konpanyon Kretyen i konsey nou. Son obzervasyon onnet i kapab ed nou si nou pa esey defann nou lekor akoz lorgey, dezir pour pa perdi nou repitasyon ouswa sa tandans pour zistifye nou lekor. Ouswa, fer krwar ou pe travay lo en proze avek en lot Kretyen. Eski ou lentere pou plis baze lo lekel ki pou ganny plis rekonesans pour sa bann bon nide ouswa travay dir? Si ou trouve ki ou dan enn sa bann sityasyon, asire ki “sa enn ki annan limilite pou ganny laglwar.”​—Prov. 29:23.

11. Ki mannyer nou devret reazir anver felisitasyon e akoz?

¹¹ Bann sirveyan ek bann ki anvi plis responsabilite dan kongregasyon i devret fer atansyon osi ki zot pa rod laglwar imen. (1 Tim. 3:1; 1 Tesa. 2:6) Ki mannyer en frer i devret reazir kan i ganny felisite pour en bon travay ki i’n fer? Tre probab, i pa pou fer en moniman pour son lekor parey Lerwa Sail. (1 Sam. 15:12) Me, eski i pare pour realize ki se akoz labonte ekstraordiner Zeova ki i’n reisi akonplir sa latas e ki nenport kwa ki i pou reisi fer dan lavenir pou depan lo benediksyon ek led Zeova? (1 Pyer 4:11) Lafason ki nou menm nou santi dan nou leker anver en felisitasyon pou montre ki kalite laglwar nou pe rode.​—Prov. 27:21.

“DEZIR ZOT PAPA KI ZOT OULE REALIZE”

12. Kwa ki ti anpes serten Zwif pour ekout Zezi?

¹² En lot fakter ki kapab anpes nou ganny laglwar Bondye se nou dezir. Bann move dezir i kapab anpes nou tann laverite. (Lir Zan 8:43-47.) Zezi ti dir serten Zwif ki zot pa ti pe ekout son mesaz akoz ‘se dezir zot papa Dyab ki zot ti oule realize.’

13, 14. (a) Ki bann serser i dir konsernan lafason ki nou lespri i fonksyonnen anver parol lezot? (b) Kwa ki determinen lekel ki nou pou ekoute?

¹³ Nou dezir i enfliyans lafason ki nou ekoute. (2 Pyer 3:5) Zeova in kre nou avek sa abilite ekstraordiner pour pa ekout sa ki nou pa anvi. Pran en pti moman e konsantre lo kantite diferan son ou kapab tande la konmela. Petet ou pa ti pe tann zot avan ki nou mansyonn sa. Dan ou lespri, i annan en sistenm ki ed ou pour konsantre lo zis en keksoz menm si i annan diferan son otour ou. Me bann serser in vwar ki i difisil pour konn fer diferans ant diferan son an menm tan sirtou kan nou pe ekout bann imen koze. Sa i vedir ki ler de dimoun pe koz an menm tan, ou bezwen swazir  lekel ki ou pou ekoute. Sa ki ou swazir pou depan lo sa enn ki ou anvi ekoute. Bann Zwif ki ti swete fer lavolonte zot papa Dyab pa ti ekout Zezi.

¹⁴ Nou ganny bann mesaz avek ‘lakaz lasazes’ ek ‘lakaz enbesilite.’ (Prov. 9:1-5, 13-17) Lasazes ek enbesilite i touzour kriy nou, e sa i fer nou annan en swa pour fer. Lenvitasyon lekel nou pou aksepte? Larepons i depan lo lavolonte lekel ki nou anvi fer. Bann mouton Zezi i ekout son lavwa e swiv li. (Zan 10:16, 27) Zot “pour laverite.” (Zan 18:37) ‘Zot pa konn lavwa en etranze.’ (Zan 10:5) Bann dimoun koumsa ki annan limilite i ganny laglwar.​—Prov. 3:13, 16; 8:1, 18.

“I A POUR ZOT PROP LAGLWAR”

15. Dan ki fason soufrans Pol ti ‘pour laglwar’ lezot?

¹⁵ Nou perseverans pour fer lavolonte Zeova pou ed lezot ganny laglwar. Pol ti ekrir kongregasyon Efez: “Mon sipliy zot pa bezwen dekouraze akoz mon bann soufrans ki mon pe pas ladan pour zot tou: i a pour zot prop laglwar.” (Efe. 3:13) Dan ki sans bann soufrans Pol ti ‘pour laglwar’ bann Efezyen? Lefet ki Pol ti kontinyen anons sa bon nouvel avek zot malgre leprev, sa ti montre bann Efezyen ki zot ti annan en gran privilez ki annan gran valer konman Kretyen. Si Pol ti’n les persekisyon dekouraz li, eski sa mesaz konsernan zot relasyon avek Zeova, zot minister ek zot lespwar ti pou annan valer? Landirans Pol ti donn valer bann krwayans Kretyen e i ti demontre ki sakrifis konman en disip Zezi ti annan plis valer ki okenn lezot keksoz.

16. Ki soufrans Pol ti eksperyanse Lis?

¹⁶ Mazin lefe ki devouman ek landirans Pol ti annan. Akt 14:19, 20 i dir: “Bann Zwif sorti Antyos an Pisidi ek Ikonyonm, ti vini e zot ti persiad lafoul e fer ganny konfyans dan zot. Answit zot ti anvoy ros avek Pol pour touy li. Ler zot ti’n fini, zot ti trenn li an deor lavil [Lis], akoz zot ti krwar ki i ti’n mor. Me kan bann krwaryan ti rasanble otour li, i ti leve e antre dan lavil. Lannmen i ti al Derb avek Barnabas.” Zis mazinen ki ou ti’n ganny kite pour mor en zour e son lannmen ou ti pou mars 100 kilomet san bann mwayen transpor modern!

17, 18. (a) Dan ki sans Timote ti swiv byen soufrans Pol Lis? (b) Ki lefe landirans Pol ti annan lo Timote?

¹⁷ Eski Timote ti enn “bann krwayan” oubyen disip ki ti rasanble otour Pol pour ed li? Sa resi dan liv Akt pa presize, me i posib. Get sa ki Pol ti ekrir dan son dezyenm let pour  Timote: “Me ou, ou’n swiv byen mon bann lansennyman, mon kondwit, . . . ek mon bann soufrans, ki kalite soufrans mon’n pas ladan Antyos, [ganny pouse dan lavil] Ikonyonm, [pros pour ganny saboule avek ros] [Lis], [saboule avek ros] ek tou sa bann persekisyon ki mon’n siporte? Me Senyer in delivre mwan dan tou.”​—2 Tim. 3:10, 11; Akt 13:50; 14:5, 19.

¹⁸ Timote ti “swiv byen” sa bann levennman e i ti konn tre byen landirans Pol. Sa ti annan en gran lefe lo lespri Timote. Kan Pol ti vizit Lis, i ti trouv Timote konman en Kretyen egzanpler ki “bann frer ki ti reste Lis ek Ikonyonm ti dir bokou dibyen lo li.” (Akt 16:1, 2) Avek letan, Timote ti kalifye pour ganny plis responsabilite.​—Fili. 2:19, 20; 1 Tim. 1:3.

19. Ki lefe nou landirans i kapab annan lo lezot?

¹⁹ Nou perseverans pour fer lavolonte Bondye i kapab annan preski menm lefe lo lezot, sirtou lo bann zenn, ki bokou pou grandi e vin bann serviter vreman presye Zeova. Bann zenn disip pa zis obzerv nou e aprann konman pour byen koze e devlop bann abilite avek nou dan predikasyon, me zot osi benefisye kan zot vwar nou pe fer fas avek bann difikilte lavi. Pol ti “siport tou” pour ki tou sa bann ki reste fidel i kapab ‘ganny sove e ganny laglwar eternel.’​—2 Tim. 2:10.

20. Akoz nou devret kontinyen rod laglwar sorti kot Bondye?

²⁰ Alor, eski pa nou devret kontinyen rod “felisitasyon [oubyen “laglwar,” NW] ki sorti kot sel Bondye”? (Zan 5:44; 7:18) Definitivman! (Lir Romen 2:6, 7.) Zeova i donn “lavi eternel pour bann ki resers laglwar.” Deplis, nou “perseverans dan sa ki byen” i ankouraz lezot pour reste ferm pour zot benefisye eternelman. Alor, pa les nanryen anpes ou ganny sa laglwar ki Bondye i donnen.

[Not anba lo paz]

[Kestyon]

[Portre lo paz 25]

[Portre lo paz 28]

[Portre lo paz  29]

Bann zenn i apresye perseverans bann Kretyen aze