Aprezan ki ou’n “konn Bondye,” ki ou pou fer?

“Aprezan zot konn Bondye.”​—GAL. 4:9.

KI OU POU REPONN?

Akoz i kapab ede pour repas lo en lalis lenspeksyon spirityel tanzantan?

Akoz en Kretyen matir i devret kontinyen progrese spirityelman?

Akoz nou devret reflesir lo nou lafwa ek nou dedikasyon anver Zeova?

1. Akoz en pilot i bezwen swiv en lalis lenspeksyon avan avyon pe al leve?

BANN pilot ki reisi anmenn en avyon ver son destinasyon i fer en lenspeksyon baze lo en lalis plis ki 30 keksoz ki i bezwen tyeke. Si zot pa verifye byen sa lalis sak fwa avan ki avyon pe al leve, risk pour annan en aksidan trazik i ogmante. Ou konnen ki kalite pilot ki sirtou ganny ankouraze pour konplet sa lalis a sak fwa? En pilot eksperyanse. En pilot eksperyanse i kapab tant pour tro konfidan ouswa pa reisi swiv sa lalis dan tou son pti detay.

2. Kwa ki bann Kretyen i bezwen verifye?

² Parey en pilot ki touzour mazin byen sekirite aeryen, ou kapab servi en lalis pour fer sir ki ou lafwa pa afebli kan ou pli bezwen li. Ki swa ou fek batize ouswa ou pe servi Zeova pour plizyer lannen, i enportan pour regilyerman verifye profonder ou lafwa ek devosyon pour Zeova. Si ou pa fer sa lenspeksyon byen e regilyerman, ou relasyon avek Zeova i kapab ganny afekte. Labib i averti nou: “Sa ki krwar i pe debout, fer atansyon ki i pa tonbe.”​—1 Kor. 10:12.

3. Ki bann Kretyen Galasi ti bezwen fer?

³ Bann Kretyen Galasi ti bezwen egzamin profonder zot lafwa e apresye zot liberte spirityel. Atraver son sakrifis, Zezi ti ouver semen pour sa bann ki demontre lafwa dan li pour konn Bondye dan en fason vreman ekstraordiner, zot ti kapab vin bann garson Bondye! (Gal. 4:9) Pour reste dan sa relasyon spesyal, bann Galat ti pou bezwen rezet lansennyman bann Zwif ki ti ensiste ki zot obeir Lalwa Moiz. Bann dimoun lezot nasyon dan bann kongregasyon pa ti’n zanmen anba sa Lalwa! Bann Zwif ensi ki bann non Zwif ti bezwen fer bann progre spirityel.  Sa ti enplik rekonnet ki i pa ti neseser pour zot swiv lalwa Moiz pour zot ganny konsidere konman drwat.

BANN PREMYE PA POUR KONN BONDYE

4, 5. Ki konsey Pol ti donn bann Galat e konman i aplikab pour nou?

⁴ Konsey zapot Pol pour bann Galat ti ganny rikorde pour en bi: pour anpes bann vre Kretyen dan nenport ki lepok tourn zot ledo avek bann larises ki dan Labib e pour pa retourn ver bann keksoz lepase. Zeova ti enspir sa zapot pour pa zis ankouraz sa bann ki dan kongregasyon Galasi, me pour ankouraz tou Son bann adorater pour reste ferm.

⁵ Nou tou nou merit rapel ki mannyer nou ti ganny libere avek lesklavaz spirityel e vin en Temwen Zeova. Pour fer sa, get sa bann kestyon: Eski ou rapel bann pa ki ou ti pran pour kalifye pour batenm? Eski ou rapel ki mannyer ou ti konn Bondye e li i ti konn ou? Eski pa sa i fer ou santi ou lib spirityelman?

6. Ki lalis nou pou egzaminen?

⁶ Anfet, nou tou nou ti swiv nef letap. Sa bann letap, ki parey en lalis lenspeksyon spirityel i dan en bwat  “Letap ki anmenn ver batenm ek progre spirityel.” Si tanzantan nou rapel nou lekor sa nef letap, sa pou ed nou pour evite retourn ver bann keksoz dan sa lemonn. Zis parey sa pilot eksperyanse ki osi pridan i kontinyen anmenn en avyon sen e sof apre ki i’n tyek son lalis, ou osi ou pou ganny led pour persevere dan ou servis fidel par fer sa lenspeksyon spirityel tanzantan.

BANN KI BONDYE I KONNEN I GRANDI SPIRITYELMAN

7. Ki model nou bezwen swiv e akoz?

⁷ Lalis lenspeksyon i fer en pilot rapel ki i annan en keksoz ki i bezwen fer labitid avan ki avyon pe al leve. Nou osi nou kapab fer sa lenspeksyon regilyerman ouswa egzamin nou lekor ek labitid ki nou’n etablir depi nou batenm. Pol ti ekrir Timote: “Tenir byen for konman en model, parol laverite ki mon’n ansenny ou, e reste ferm dan lafwa ek lanmour ki nou posede dan Kris Zezi.” (2 Tim. 1:13) Sa bann “parol laverite” i ganny trouve dan Parol Bondye. (1 Tim. 6:3) Zis parey sketch en artis i donn nou en lide lo sa portre an zeneral, ‘model laverite’ i donn nou en lide zeneral pour nou konpran e swiv sa ki Zeova i ekspekte avek nou. Alor, annou get detrwa letap ki nou ti pran avan batize pour vwar ki zistans nou’n arive avek model laverite.

8, 9. (a) Akoz nou devret kontinyen progrese dan konnesans ek lafwa? (b) Donn legzanp valer progre spirityel e akoz nou bezwen kontinyelman fer li.

⁸ Premye lo nou lalis lenspeksyon se konnesans. Apre sa nou kapab devlop lafwa. Me, nou devret kontinyen progrese dan tou le de domenn. (2 Tesa. 1:3) “Progrese” i vedir ogmante oubyen grandi e i enplik en kantite sanzman. Alor, apre batenm nou bezwen kontinyen devlop nou spirityalite pour ki nou progre pa sezi lanmenm.

⁹ Nou kapab konpar nou progre spirityel avek fason ki en pye dibwa i grandi. En pye dibwa i vin gran sirtou ler son rasin i profon e gro. Par egzanp, bann pli gran pye sed Liban i kapab ariv oter en bilding 12 letaz e i annan bann rasin for e profon, e son tron i 12 met ronder. (Sal. 5:15) Apre ki sa kalite pye dibwa i aret pouse, sa pye i kontinyen grandi, me dan en fason ki pa sitan evidan. Lannen apre lannen,  son tron i grosi e son rasin i al pli profon e file, e sa i fer sa pye dibwa pli stab. Menm zafer i kapab ganny dir konsernan progre spirityel en Kretyen. Nou kapab progrese vitman apre ki nou’n etidye Labib pour premye fwa e apre ganny batize. Bann dimoun dan kongregasyon i kontan pour vwar nou progre. Petet nou menm kapab kalifye konman en pionye oubyen ganny lezot privilez. Bann lannen ki swiv apre, nou kontinyen progrese spirityelman me i pa touzour evidan. Kantmenm sa, nou bezwen kontinyen progrese dan lafwa ek konnesans pour vin “bann adilt e nou a konn en devlopman konplet parey Kris.” (Efe. 4:13) Alor, nou grandi sorti en pti bourzon pour vin en Kretyen matir, ki parey en gro pye dibwa byen for.

10. Akoz progre i neseser, menm pour en Kretyen matir?

¹⁰ Nou progre pa devret aret la. Nou merit ogmant nou konnesans e nou lafwa i devret vin pli for. Dan sa fason, nou rasin pou vreman o profon dan Parol Bondye. (Prov. 12:3) Dan kongregasyon, i annan en kantite frer ek ser ki’n fer sa. Par egzanp, en frer ki’n en ansyen pour plis ki trant an i dir ki i ankor pe progrese spirityelman. I dir: “Mon lapresyasyon pour Labib in ogmant en kantite. Souvan mon trouv bann nouvo loportinite pour aplik bann prensip Labib ek lalwa dan plizyer fason. Mon lapresyasyon pour predikasyon i kontinyen ogmante tou.”

PROGRESE POUR VIN ZANMI AVEK BONDYE

11. Ki mannyer nou kapab pli byen konn Zeova avek letan?

¹¹ Nou progre i osi enplik apros pli pre avek Zeova konman nou Zanmi ek Papa. I anvi ki nou santi son laprouvasyon. I oule ki nou konnen ki i kontan nou e ki nou an sekirite zis parey en zanfan i santi kan son paran i anmay li ouswa kan nou dan konpanni nou bon zanmi fidel. Parey ou kapab konnen, sa latasman avek Zeova pa ariv zis koumsa menm. Letan i devret pase pour ki nou konn li e kontan li. Alor, pour arive konn Zeova pli byen, reste determinen pour met letan dekote pour lir son Parol sak zour. Lir sak nimero Latour Veyer ek Awake! ensi ki lezot piblikasyon baze lo Labib.

12. Kwa ki neseser pour ki Zeova i konn nou?

¹² Bann zanmi Bondye i progrese spirityelman atraver zot lapriyer senser ek bon frekantasyon. (Lir Malaki 3:16. *)  Zorey Zeova “i ouver pour ekout zot lapriyer.” (1 Pyer 3:12) Parey en bon paran, Zeova i ekout nou lapriyer kot nou demann li led. Alor, nou bezwen “priye tou letan.” (Rom. 12:12) Nou pa pou reste en Kretyen matir si nou pa ganny led Bondye. Presyon sa lemonn i tro bokou pour reziste e sirmont li nou tousel. Si nou pa persevere dan lapriyer, nou pa pou ganny sa lafors ki Bondye i pare pour donnen volonterman. Eski ou satisfe avek kalite ou lapriyer ouswa ou vwar ki ou kapab fer serten progre dan sa domenn?​—Zer. 16:19.

13. Akoz asosye avek lezot Kretyen i enportan pour progrese spirityelman?

¹³ Zeova i kontan sa bann ki “rod refiz dan li,” alor, menm apre ki nou’n konn Zeova, nou anvi kontinyen regilyerman asosye avek lezot dan kongregasyon ki konn li. (Nao. 1:7) Dan en lemonn kot i fasil pour dekouraze, i byen pour nou antoure avek bann frer ek ser ki ankouraz nou. Ki byenfe nou gannyen? Dan kongregasyon ou pou trouv bann endividi ki pou ankouraz ou pour “annan lanmour e fer sa ki byen.” (Ebr. 10:24, 25) Ler i ti ekrir bann Kretyen Ebre, Pol ti koz lo en lanmour ki egziste dan en kongregasyon, parmi en group adorater ki annan en menm leta lespri e ki konsider kanmarad konman frer ek ser. Pour demontre sa kalite lanmour, fodre nou asosye avek lezot Kretyen. Lo ou lalis, regilyerman mark renyon ek partisipasyon dan renyon.

14. Dan ki sans repantans e sanz nou lavi i en prosedir ki kontinyen?

¹⁴ Avan ki nou vin en Kretyen nou bezwen repantir e aret fer sa ki mal ouswa fer pese. Me, nou bezwen kontinyelman repantir. Konman bann imen enparfe, pese i touzour la pe ale vini parey en serpan ki pare pour atake. (Rom. 3:9, 10; 6:12-14) Annou gard nou lizye byen ouver e pa inyor nou bann defo. Erezman, Zeova i pasyan avek nou anmezir nou fer bokou zefor pour lalit avek nou febles e fer bann sanzman neseser. (Fili. 2:12; 2 Pyer 3:9) Sa ki kapab ed bokou se si nou annan kontrol lo lafason ki nou servi nou letan ek resours, ki enkli pa tay deryer bann dezir egois. En ser ti ekrir: “Mon ti grandi dan laverite, selman, mon ti grandi avek en diferan kalite pwennvi lo Zeova konpare avek lezot. Mon ti vreman per li e mon ti santi ki zanmen mon ti pou kapab fer li plezir.” Avek letan, sa ser ti santi li pe “lalit spirityelman” akoz bann defi personnel ki i ti pe rankontre. I kontinyen: “Se pa akoz mon pa ti kontan Zeova, me se akoz mon pa ti vreman konn li byen. Me apre ki mon ti priy bokou, mon ti konmans sanz mon pwennvi.” I ti azoute: “Mon ti vwar ki Zeova ti gid mwan parey en zanfan. I ti ed mwan sirmont en lobstak alafwa dan en fason byen dous e i ti montre mwan ki fodre fer.”

15. Ki Zezi ek son Papa i obzerve?

¹⁵ Kontinyen ‘anons lepep’ konsernan sa bon nouvel. Lanz Zeova ti dir Pyer ek lezot zapot sa parol apre ki zot ti eksperyans en liberasyon mirakile dan prizon. (Akt 5:19-21) En lot pwen lo nou lalis pour verifye se nou partisipasyon dan predikasyon sak semenn. Zezi ek son Papa i remark nou lafwa ek nou minister. (Rev. 2:19) Sa ansyen ki ti ganny mansyonnen pli boner i dir: “Predikasyon, i form parti nou lavi.”

16. Akoz i byen pour reflesir lo nou dedikasyon avek Zeova?

¹⁶ Reflesir lo ou dedikasyon. Posesyon pli presye ki nou annan se nou relasyon avek Zeova. I konn sa bann ki pour li. (Lir Izai  44:5. *) Atraver lapriyer, egzamin kalite ek profonder ou relasyon avek li. An plis ki sa, rapel byen zour ki ou ti batize. Sa osi pou ed ou rapel ki ou batenm i senboliz sa desizyon pli enportan ki ou’n deza fer.

RESTE PROS AVEK ZEOVA ATRAVER LANDIRANS

17. Akoz landirans i neseser pour reste pros avek Zeova?

¹⁷ Dan son let pour bann Galat, Pol ti met lanfaz lo sa lenportans pour annan landirans. (Gal. 6:9) Sa i vreman enportan pour en Kretyen konmela osi. Ou pou fer fas avek bann leprev, me Zeova pou ed ou. Kontinyen priye pour ganny lespri sen. Ou pou santi soulazman anmezir i ranplas sa latristes avek lazwa, soufrans avek lape. (Mat. 7:7-11) Zis mazin sa: Si Zeova i enterese avek bann zwazo, eski pa i pou pli enterese avek ou akoz ou kontan li e dedye ou lavi avek li? (Mat. 10:29-31) Malgre nenport ki presyon ki ou gannyen, pa retourn an aryer, pa bes lebra. Pa i vreman en gran benediksyon ki Zeova i konn nou!

18. Apre ki ou’n konn Bondye, ki ou pou fer prezan?

¹⁸ Pour sa rezon, si ou’n aprann konn Zeova tou dernyenman e ou’n batize, ki ou devret fer aprezan? Kontinyen konn Zeova plis, progrese ver matirite spirityel. Si i fer bokou lannen depi ki ou’n batize, ki ou devret fer? Ou osi ou devret kontinyen aprofondi e ogmant ou konnesans lo Zeova. Annou pa zanmen krwar ki nou’n ase konn Bondye e ki nou pa bezwen fer nanryen pour amelyor nou relasyon avek li. Plito, tanzantan nou tou nou devret revwar nou lalis lenspeksyon spirityel pour fer sir ki nou relasyon avek nou Papa, Zanmi ek Bondye Zeova i kontinyen vin pli for.​—Lir 2 Korentyen 13:5, 6.

[Not anba lo paz]

[Kestyon]

[Portre lo paz 13]

 [Portre lo paz 15]

Parey en pye dibwa bann kretyen i kontinyen grandi

[Bwat lo paz 17]

LETAP KI ANMENN VER BATENM EK PROGRE SPIRITYEL

1 Nou konmans par “aprann konn” Zeova ek son Garson, Zezi Kri. ​—Zan 17:3, nou ki’n met an italik.

2 Nou lafwa i ogmante anmezir nou konnesans ti agrandi.​—Zan 3:16

3 Nou kriy Zeova regilyerman atraver lapriyer.​—Akt 2:21

4 Nou apresye lenportans pour asosye regilyerman avek lezot ki annan menm lafwa ki nou.​—Ebr. 10:24, 25

5 Nou repantir nou bann pese. ​—Akt 17:30

6 Nou sanz nou lavi e aret fer bann move pratik.​—Akt 3:19

7 Nou lafwa i pous nou pour koz avek lezot an piblik.​—2 Kor. 4:13

8 Nou dedye nou lekor avek Zeova pour ki nou swiv Zezi dan sa bon fason. ​—1 Pyer 4:2

9 Nou senboliz nou dedikasyon atraver batenm dan delo.​—1 Pyer 3:21