Kestyon lekter

Akoz Zezi ti plere avan ki i ti resisit Lazar, parey i ganny dekrir dan Zan 11:35?

▪ I normal pour plere ler en dimoun ki nou kontan i mor akoz nou pou mank li. Menm si Zezi ti annan lafeksyon pour Lazar, i pa ti plere akoz Lazar ti’n mor. I ti plere akoz i ti pran pitye pour fanmir ek zanmi Lazar, parey konteks dan resi Zan i montre.​—Zan 11:36.

Ler Zezi ti fek tande ki Lazar ti malad, i pa ti al vwar Lazar deswit pour geri li. Sa resi i dir: “Ler [Zezi] ti ganny mesaz ki Lazar ti malad, i ti reste dan sa landrwa kot i ti ete pour de zour ankor.” (Zan 11:6) Akoz Zezi pa ti al vwar Lazar deswit? I ti annan en rezon akoz i ti fer sa. I ti dir: “Sa maladi pa pou anmenn lanmor. I la pour laglwar Bondye e ki Garson Bondye i a ganny glorifye.” (Zan 11:4) Sa ki ti enportan pa ti lanmor Lazar. Zezi ti annan lentansyon servi lanmor Lazar “pour laglwar Bondye.” Ki mannyer sa? Zezi ti pe al fer en mirak ekstraordiner par resisit son bon zanmi.

Ler i ti pe koz avek son bann disip sa zour, Zezi ti konpar lanmor avek ler en dimoun i dormi. I pour sa rezon ki i ti dir zot ki i ti “pe al lev [Lazar] dan son sonmey.” (Zan 11:11) Pour Zezi, resisit Lazar dan son sonmey ti pou zis parey ler en paran i lev son zanfan ki’n fer en pti sonm. Alor i ti napa okenn rezon pour li sagren ki Lazar ti’n mor.

Me kwa ki ti fer Zezi plere? Ankor enn fwa, nou ganny larepons par egzamin konteks. Ler Zezi ti zwenn Mari, ser Lazar e vwar li ek lezot pe plere, i “ti touse e i ti emosyonnen.” Son leker ti sitan fermal ler i ti vwar zot dan sagrinasyon ki i “ti emosyonnen.” I pour sa rezon ki “Zezi ti plere.” Zezi ti tris pour vwar son bann zanmi ki i ti kontan en kantite dan sagrinasyon.​—Zan 11:33, 35.

Sa resi i montre ki Zezi i annan pouvwar ek abilite pour resisit bann dimoun ki nou kontan ki’n mor e redonn zot en lasante parfe dan nouvo lemonn. I osi montre nou ki Zezi i konpran santiman bann dimoun ki’n perdi en fanmir oubyen zanmi ki zot kontan dan lanmor. En lot leson nou kapab aprann avek sa resi se ki nou devret annan konpasyon pour bann ki dan sagrinasyon akoz lanmor en dimoun ki zot kontan.

Zezi ti konnen ki i ti pe al resisit Lazar. Kantmenm sa, i ti plere akoz son gran lanmour ek konpasyon pour son bann zanmi. Pareyman, ler nou konpran santiman lezot e santi parey zot, sa pou fer nou pran “lapenn [pour] sa ki dan lapenn.” (Rom. 12:15) Si en dimoun i eksprim son sagrinasyon, sa pa vedir ki i napa lafwa dan rezireksyon. Alor, pa i apropriye ki Zezi in kit en legzanp kot i’n demontre konpasyon pour bann dimoun ki dan dey ler i ti plere, menm si i ti konnen ki i ti pou resisit Lazar.

[Portre lo paz 32]