Lanmour Bondye i ganny demontre dan lanmour en manman

“Eski en madanm i kapab oubliy son pti baba e i pa ava pran pitye pour garson sorti dan son vant? Kantmenm sa bann madanm i kapab oubliye, me mwan mon pa pou oubliy ou.”—Izai 49:15.

EN PTI baba i byen enstal li dan lebra son manman pandan ki son manman i donn li tete. Sa senn i ranpli avek tandres ek lanmour. En manman ki apel Pam ti dir: “Premye fwa ki mon ti pran mon pti baba dan lebra, mon ti santi mwan ranpli avek lanmour ek responsabilite pour sa nouvo ne.”

Bann serser in konfirmen ki lanmour en manman i annan en gran lefe lo devlopman son baba. World Health Organization Programme ti pibliy en dokiman lo Lasante Mantal ki ti dir: “Resers in montre ki bann zanfan ki ganny abandonnen e separe avek zot manman i pli malere e pli deprimen e parfwa zot menm kapab panik. Sa menm dokiman i mansyonn en letid ki endike ki i annan plis posibilite ki bann zanfan ki’n ganny lanmour ek lafeksyon depi ptipti i pli entelizan ki lezot zanfan ki’n ganny neglize.

An rapor avek lenportans lanmour en manman, en profeser psikyatri kot Lekol medsin UCLA, Leta-z-ini ki apel Alan Schore i dir: “Premye relasyon ki en zanfan i annan i avek son manman, e sa i azir konman en model akoz i prepar sa zanfan pour lezot relasyon emosyonnel pli tar.”

Malerezman, depresyon, maladi ouswa presyon i kapab fer en manman negliz son zanfan oubyen menm “oubliy  son pti baba.” (Izai 49:15) I vreman drol pour en manman oubliy son baba. Anfet, bann manman i otomatikman kontan zot zanfan. Bann serser in dekouver ki pandan nesans, bann manman i prodwir en kantite ormonn ki apel oxytocin, ki ogmant douler e pli tar ed zot lekor pour prodwir dile pour zot pti baba. Sa menm ormonn ki ganny prodwir par zonm ek fanm, i osi zwe en rol pour fer sa manman pa egois anver son baba, me plito azir avek lanmour.

Kote lanmour i sorti?

Bann ki promot sa krwayans dan evolisyon i ansennyen ki sa lanmour ki pa egois dan ka en manman ek son zanfan in vin par azar e pandan ki imen in evolye sa lanmour in ganny prezerve akoz i ti anmenn byenfe pour bann ki ti pratik li. Zournal Mothering Magazine lo Internet i dir: “Premye bout lanmwel ki ti evolye ansanm avek sa lanmwel ki nou’n erite avek nou zanset ki ti bann reptil i sa sistenm limbic ki prodwir santiman. I sanmenm sa bout nou lanmwel ki permet en manman annan en relasyon pros avek son baba.”

I vre, resers in montre ki nou sistenm lim­bic i zwe en rol dan nou bann lemosyon. Parkont, eski i fer sans pour ou krwar ki lanmour en manman pour son zanfan in ariv akoz lanmwel en reptil ki’n tro grosi par azar?

Reflesir lo sa lot leksplikayon. Labib i dir ki imen ti ganny kree dan resanblans Bondye, setadir avek sa abilite pour demontre bann kalite ki Bondye i annan. (Zenez 1:27) Sa kalite pli dominan ki Bondye i annan se lanmour. Zapot Zan ti ekrir: “Sa ki pa kontan son prosen, pa kontan Bondye.” Akoz? “Parski Bondye i lanmour.” (1 Zan 4:8) Silvouple remarke ki sa verse Labib pa zis dir ki Bondye i annan lanmour. O kontrer, i dir ki Bondye i lanmour. Li menm i Sours lanmour.

Labib i dekrir lanmour dan sa fason: “Lanmour i pasyan, e i bon; lanmour pa zalou ou vant son prop lekor. I pa arogan e i pa fer nanryen ki fer onte. Lanmour pa rod son prop lentere; i pa pran lakoler, e i pa gard rankin. Lanmour pa montre kontantman dan lenzistis, me i rezoui dan laverite. Lanmour i pardonn tou, i krwar tou, i esper tou, i siport tou. Lanmour i reste pour touzour.” (1 Korentyen 13:4-8) Eski i vreman fer sans pour krwar ki sa kalite vreman presye ti vin an egzistans par azar?

Ki lefe i annan lo ou?

Pandan ki ou’n lir deskripsyon lanmour dan sa paragraf anler, eski ou leker ti vreman anvi ki en dimoun i demontre sa kalite lanmour anver ou? I normal pour ou annan sa dezir. Akoz? Akoz “nou zanfan [Bondye].” (Akt 17:29) Nou’n ganny kree pour ganny e eksprim sa kalite lanmour. E nou kapab asire ki Bondye i annan en profon lanmour pour nou. (Zan 3:16; 1 Pyer 5:6, 7) Sa verse Labib ki’n ganny site o konmansman sa lartik i dir ki lanmour ki Bondye i annan pour nou i pli for e pli dirab ki sa lanmour ki en manman i annan pour son zanfan!

Me i kapab ki ou pe mazinen: ‘Si Bondye i saz, pwisan e kontan nou, akoz i pa met en lafen avek soufrans? Akoz i les bann zanfan mor? Akoz i les labi pouvwar kontinyen e later ganny detrir par move dominasyon ek vorasite?’ Sa i bann kestyon vreman enportan ki merit ganny bann bon larepons.

Malgre sa ki bann agnostic i kapab dir, i posib pour trouv larepons satisfezan pour sa bann kestyon. Plizyer dimoun dan plis ki en santenn pei in konn larepons pour sa bann kestyon par etidye Labib avek Temwen Zeova. Ou osi ou ganny envite pour fer parey. Pandan ki ou konnesans lo Bondye i agrandi atraver en letid lo son Parol e lo kreasyon, ou pou vwar ki i pa lwen avek ou e i pa difisil pour konn li. O kontrer, ou pou konvenki ki Bondye “pa lwen avek sakenn parmi nou.”—Akt 17:27.

[Pwen adisyonnel]

Lanmour ki Bondye i annan pour nou i pli dirab ki lanmour en manman pour son zanfan