Protez ou kont bann move lespri

JAMES in grandi dan en landrwa elwannyen lo zil Malaita ki form parti zil Salomon. Depi ptipti, i ti aprann pour onor bann lespri. I dir: “Mon pa ti pou zanmen demann bann lespri pour fer ditor lezot, me mon pa ti krwar ki i ti posib pour annan en lavi ere san servi rarafono [bann koutim ki ganny pratike pour demann led avek bann lespri] pour ganny proteze kont danze.”

Parey i leka pour en kantite dimoun dan lezot parti lemonn, bann zabitan zil Salomon i krwar ki bann lespri i kapab swa ed en dimoun oubyen fer li ditor. Anfet, en kantite zabitan zil Malaita pa per sa bann swadizan bon lespri me plito annan lafeksyon pour zot.

Krwayans dan sa ki bann lespri i fer i evidan dan diferan fason. Par egzanp kan James ti zenn, bann madanm dan son vilaz ti fer zot bann zanfan antre an tayan dan lakaz sak fwa ki zot ti tann sa zwazo ki apel korokoro (en kalite koukou) kriye. Akoz? Zot ti krwar ki letan sa zwazo i kriye en maler ti pou arive avek en dimoun.

Serten dimoun dan sa vilaz i met en ros blan ki spesyal parlao zot laport lakaz. James ti fer sa an krwayan ki sa ros ti pou protez li kont bann move lespri. Kan James ti pe travay i ti anmas bann restan manze apre son repa midi e gard li dan en sak pour li zete pli tar. Sa ki ti fer li pli enkyet, se si en dimoun ki fer mazik ti vwar sa restan manze ki i ti’n zete e servi sa restan manze pour zet en sor lo li pour fer li tonm malad.

Menm si i kapab ki sa bann pratik spesifik pa komen dan landrwa kot ou pe reste, petet parey James ou santi sa bezwen pour swiv bann koutim pour ou ganny proteze kont bann move lespri. Petet ou krwar ki i enportan pour reste atase avek sa bann koutim pour ou prop byennet.

Si ou annan respe pour Labib, san dout ou anvi konnen ki larepons i donnen pour sa bann kestyon swivan: (1) Ki mannyer bann move lespri i kapab fer ou ditor? (2) Eski si ou swiv serten koutim sa i kapab fer ou tonm anba lenfliyans bann demon? (3) Ki mannyer ou kapab trouv vre proteksyon kont bann move lespri e vin ere?

 Ki mannyer bann move lespri i koz ditor?

Labib i dir ki i pa posib ki bann move lespri i lespri bann mor. Parol Bondye i dir: “Bann vivan i konnen ki zot pou mor me bann mor, zot pa konn nanryen ditou.” (Eklezyast 9:5) Anfet, bann move lespri i bann lanz rebel ki’n zwenn avek Satan pour esey tronp imen.—Revelasyon 12:9.

Labib i klerman montre ki nou bezwen protez nou kont bann move lespri. Zapot Pol ti ekrir bann Kretyen Efez: “Nou pa pe lit kont dimoun, me kont bann pouvwar move lespri dan ler.” Zapot Pyer ti dekrir sef bann move lespri, Satan, konman “en lyon ki kriye, pe rode ki i pou devore.”—Efezyen 6:12; 1 Pyer 5:8.

Satan i koz ditor prensipalman par tronp dimoun, trik zot oubyen tant zot pour azir dan en fason ki ofans Bondye. Labib i dir ki Satan “limenm i degiz konman lanz lalimyer.” (2 Korentyen 11:14) I pretann ki i en lespri ki protez dimoun kan sa ler i annan move lentansyon. Satan i avegle lentelizans bann dimoun pour ki zot pa konn laverite lo li, ni lo Bondye. (2 Korentyen 4:4) Pour ki rezon i tronp dimoun?

Satan i vreman anvi ganny adore e sanmenm ki i oule dimoun i fer ki swa zot konnen oubyen non. Ler Zezi, Garson Bondye ti lo later, Satan ti oule ki i “azenou e . . . ador” li. Zezi ti dir “Sorti la ale Satan! I’n ekri: ‘Se Senyer ou Bondye ki ou devre adore e li tousel ki ou devre servi!’” (Matye 4:9, 10) Zezi ti refize pour fer okenn keksoz ki ti pou enplik soumet avek Satan e ador li.

Zeova i pli pwisan ki tou bann lespri e i pa pou les bann ki obeir li ganny okenn domaz pour touzour. (Psonm 83:18; Romen 16:20) Me si nou anvi fer plezir Zeova parey Zezi ti fer, nou bezwen evite azir dan okenn fason ki pou fer nou soumet avek Satan oubyen son bann demon. Alor, pour sa rezon nou bezwen rekonnet bann koutim ki onor bann move lespri dan en fason, ki parey en ladorasyon. Ki mannyer ou kapab fer sa?

Rekonnet bann koutim ki Bondye pa kontan

Dan letan lontan Zeova ti averti son pep setadir bann Izraelit pour pa imit serten koutim bann nasyon dan zalantour. I ti dir: “Fodre pa ki i annan personn parmi zot ki . . . devinen, ki fer mazik oubyen ki enterpret bann siny oubyen ki sorsye, oubyen en dimoun ki zet en sor lo lezot.” Konsernan bann dimoun ki ti swiv sa bann koutim, Labib i dir: “Tou dimoun ki fer sa bann keksoz i en keksoz detestab pour Zeova.”—Deterononm 18:10-12.

Alors, ler ou egzamin bann koutim ki komen dan ou rezyon, reflesir lo sa bann kestyon swivan: Eski sa koutim i ankouraz dimoun pour annan krwayans dan bann dimoun ki enterpret bann siny ki pou arive dan lavenir? Eski sa koutim i fer zot krwar ki i annan bann lobze ki annan pouvwar mazik pour protez zot? Eski i enplik zet en sor lo en dimoun oubyen protez li kont en sor ki ganny zete lo li? Eski i osi enplik soumet avek en lot lespri apard ki Zeova oubyen son reprezantan Zezi?—Romen 14:11; Filipyen 2:9, 10.

I vreman enportan pour rezet okenn koutim ki ankouraz bann pratik koumsa. Akoz? Zapot Pol ti ganny enspire pour ekrir: “Zot pa kapab bwar an menm-tan lakoup Senyer [“Zeova,” NW] ek lakoup demon.” I ti averti ki bann dimoun ki ti esey fer plezir Bondye ek lezot lespri an menm tan, ti pou fer Zeova “zalou.” (1 Korentyen 10:20-22) Zeova i demann e i merit ganny en devosyon zis pour li tousel.—Egzod 20:4, 5.

Annou osi konsider sa kestyon: Eski sa koutim i promot sa lide ki en dimoun pa responsab pour son prop aksyon? Par egzanp, adilter ek relasyon seksyel avan maryaz pa ganny aksepte dan serten kominote e i osi ganny kondannen dan Labib. (1 Korentyen 6:9, 10) Me dan serten kiltir dan Pasifik, bann pratik koumsa i ganny aksepte si en fiy i dir ki i’n  ganny “green leafed,” * setadir en sor ti’n ganny zete lo li, e sa in pous li pour annan relasyon seksyel.

Me parkont Labib i ansennyen ki nou responsab pour nou bann aksyon. (Romen 14:12; Galat 6:7) Par egzanp, Ev sa premye madanm ti santi ki i ti’n ganny tronpe par Satan pour li dezobeir Bondye, par dir: “Sa serpan in tronp mwan e alor mon’n manze.” Me Zeova ti fer li rann kont pour son aksyon. (Zenez 3:13, 16, 19) I osi vwar nou responsab pour fason ki nou azir.—Ebre 4:13.

Ki ou devret fer?

Si ou anvi fer plezir Bondye e viv an armoni avek son bann prensip, ou bezwen pran bann mezir neseser e azir deswit. Bann dimoun senser ki ti pe viv Efez dan premye syek in kit en bon legzanp dan sa domenn. Pour evit tou lenfliyans bann move lespri, zot ti anmas tou liv ki zot ti annan an rapor avek bann pratik demonyak e ‘bril zot devan tou dimoun.’—Akt 19:19.

Avan bril zot bann liv, sa bann dimoun “ti vini e konfes tou sa ki zot ti’n fer.” (Akt 19:18) Zot ti ganny touse par lansennyman Pol konsernan Kris, e sa ti pous zot pour detrir zot bann liv demonyak. Zot ti osi sanz zot pwennvi lo sa bann koutim.

I vre petet ki i pa fasil pour abandonn sa bann koutim. James ki ti ganny mansyonnen pli boner ti fer fas avek sa menm defi. I ti konmans etidye Labib avek bann Temwen Zeova e i ti kontan sa ki i ti aprann. Me i ti kontinyen pratik rarafono. Ler i ti reflesir lo pwennvi ki i ti annan an rapor avek sa bann pratik i ti rekonnet ki i ti krwar dan promes Zeova pour lavenir me i ti touzour santi ki i ti bezwen depan lo sa bann koutim pour ganny proteze kont bann maler.

Kwa ki ti ed James pour sanz son pwennvi? I dir: “Mon ti priy Zeova pour ganny son proteksyon ek led pour met mon konfyans dan li. Sa menm moman, mon ti rezet sa bann koutim.” Eski i’n sibir okenn ditor? “Non,” James i dir. “Sel keksoz ki’n arive avek mwan, se ki mon’n aprann pour annan konfyans dan Zeova. Mon’n vwar ki kantite pros Zeova i kapab vini konman en zanmi.” Anfet, pour sa set lannen ki’n pase James in servi konman en minis relizye aplentan pour ed lezot aprann sa ki Labib i dir.

Akoz ou pa swiv legzanp James? Egzamin bann koutim ki dimoun dan ou kominote i atase avek, e servi ou “kapasite pour rezonnen” pour determinen si zot an armoni avek “lavolonte Bondye.” (Romen 12:1, NW, 2) Apre, ganny sa kouraz pour abandonn sa bann pratik demonyak. Si ou fer sa, ou kapab annan konfyans ki Zeova pou “resevwar [ou]” e protez ou. (2 Korentyen 6:16-18) Parey James, ou pou eksperyans sa promes ki sorti dan Labib ki diny konfyans: “Non Zeova i en latour for. Bann dimoun drwat i tay ladan e zot ganny proteksyon.”—Proverb 18:10.

[Not anba lo paz 32]

[Portre lo paz 30]

Courtesy of Dr. Bakshi Jehangir “Korokoro”

[Portre lo paz 30]

En fiy i anmas restan manze pour zot pa kapab servi sa restan manze pour zet en sor lo li