Ki ou lapriyer i revele lo ou?
Ki ou lapriyer i revele lo ou?
“Ou ki ekout lapriyer, tou kalite dimoun pou vin ver ou.”—PS. 65:2.
1, 2. Akoz bann serviter Zeova i kapab apros li dan lapriyer avek konfyans?
ZEOVA i touzour ekout demann son bann serviter fidel. Nou kapab asire ki i tann nou. Menm si plizyer milyon Temwen Zeova ti pou priy li an menm tan, napa ni enn ki ti pou ganny dir ki ‘laliny i okipe.’
2 Psalmis David ti annan konfyans ki Bondye ti’n ekout son siplikasyon, alor i ti sante: “Ou ki ekout lapriyer, tou kalite dimoun pou vin ver ou.” (Ps. 65:2) Bann lapriyer David ti ganny reponn akoz i ti en adorater ki ti fidel avek Zeova. I byen pour nou demann nou lekor: ‘Eski mon bann siplikasyon i montre ki mon annan konfyans dan Zeova e ki vre ladorasyon i sa keksoz pli enportan pour mwan? Ki mon lapriyer i revele lo mwan?’
Apros Zeova avek limilite
3, 4. (a) Ki latitid nou devret annan ler nou apros Bondye dan lapriyer? (b) Ki nou devret fer si nou ‘annan bann panse ki pe trouble nou’ akoz pese grav ki nou’n fer?
3 Si nou anvi nou lapriyer i ganny reponn, nou devret apros Bondye avek limilite. (Ps. 138:6) Nou devret demann Zeova pour egzamin nou, parey David ti fer ler i ti dir: “Egzamin mwan, O Bondye, e konn mon leker. Egzamin mwan, e konn bann panse ki pe trouble mwan. Gete si ou vwar okenn semen ki anmenn douler dan mwan, e kondir mwan dan sa semen letan endefini.” (Ps. 139:23, 24) Annou pa zis priye, nou devret osi les Bondye egzamin nou e obeir konsey sorti dan son Parol. Zeova i kapab gid nou dan “sa semen letan endefini,” par ed nou pourswiv sa bon direksyon ki anmenn ver lavi eternel.
4 Me si nou pe soufer avek ‘bann panse ki pe trouble nou’ an rapor avek en pese grav? (Lir Psonm 32:1-5.) Fer fas avek en konsyans sarze i kapab pran tou nou lafors parey en pye dibwa ki vin sek dan gro ker soley. Akoz son pese, David ti perdi son lazwa e petet i ti malad. Me pa i ti vreman en soulazman pour li kan i ti konfes son pese avek Bondye! Mazin lazwa ki David ti resanti ler Zeova ti pardonn li pour ‘son rebelyon.’ Ler en dimoun i konfes son pese avek Bondye sa i kapab anmenn soulazman, e led bann ansyen dan kongregasyon pou osi ed en dimoun ki’n fer fot reganny son lasante spirityel.—Prov. 28:13; Zak 5:13-16.
Sipliy Bondye e remersye li
5. Ki savedir siplikasyon?
5 Si pour okenn rezon nou annan lenkyetid, nou devret aplik konsey Pol: “Pa bezwen enkyet pour nanryen, me dan tou sirkonstans par lapriyer ek siplikasyon demann Bondye tou sa ki zot bezwen avek en leker rekonesan.” (Fili. 4:6) “Siplikasyon” i vedir “abes nou e sipliy en dimoun.” Nou devret sipliy Zeova pour son led ek gidans, sirtou ler nou dan danze ouswa pe ganny persekite.
6, 7. Pour ki rezon nou devret remersye Bondye dan nou lapriyer?
6 Si nou priy zis ler nou bezwen keksoz, ki sa pou revele lo nou motivasyon? Pol ti dir ki nou devret demann Bondye tou sa ki nou bezwen “avek en leker rekonesan,” setadir nou bezwen remersye Bondye. Sirman nou annan rezon pour eksprim bann santiman parey pour David: “I pour ou, O Zeova, grander ek pwisans ek labote ek siperyorite ek dinyite; akoz tou keksoz dan lesyel e lo later i pour ou. Rwayonm i pour ou, O Zeova, sa Enn ki osi met son lekor anler konman sef lo tou. . . . Nou Bondye, nou remersye ou e nou loue ou non merveye.”—1 Kron. 29:11-13.
7 Zezi ti remersye Bondye pour nouritir e osi pour sa dipen ek diven ki ti ganny servi pandan Repa Senyer. (Mat. 15:36; Mark 14:22, 23) Apard eksprim bann santiman parey, nou devret “remersye Zeova” pour “son bann travay merveye an faver bann garson zonm,” pour son “bann zizman ki drwat” e pour son parol ouswa mesaz ki aprezan disponib dan Labib.—Ps. 107:15; 119:62, 105.
Priy pour lezot
8, 9. Akoz nou devret priy pour nou frer ek ser Kretyen?
8 San okenn dout, nou priy pour nou lekor, me nou devret osi priy pour lezot, menm pour bann Kretyen ki nou pa konn zot non. Menm si zapot Pol pa ti neseserman konn tou bann krwayan Kolos, i ti ekrir: “Ler nou priy pour zot nou touzour remersi Bondye, Papa nou Senyer Zezi-Kri. Nou’n tann koz lo zot lafwa dan Kris Zezi ek zot lanmour pour tou bann sen.” (Kol. 1:3, 4) Pol ti osi priy pour bann Kretyen Tesalonik. (2 Tesa. 1:11, 12) Bann lapriyer koumsa i revel en kantite lo nou e lafason ki nou vwar nou bann frer ek ser dan lafwa.
9 Ler nou priy pour bann Kretyen swazir ek zot konpanyon ‘lezot mouton,’ sa i montre ki nou konsernen avek lorganizasyon Bondye. (Zan 10:16) Pol ti demann son bann frer ek ser Kretyen pour priye ‘pour ki Bondye i fer li konnen ki fodre dir, pour li kapab koz avek lasirans pour anons sekre levanzil.’ (Efe. 6:17-20) Eski personnelman nou priy koumsa pour lezot Kretyen?
10. Ki lefe priy pour lezot i kapab annan lo nou?
10 Priy pour lezot i kapab sanz nou latitid anver zot. Si nou partikilyerman pa tro dakor avek en dimoun me nou priy pour li, ki mannyer nou kapab kontinyen annan sa menm santiman anver li? (1 Zan 4:20, 21) Bann lapriyer koumsa i ankourazan e i promot linite parmi nou bann frer ek ser. Deplis, sa kalite lapriyer i montre ki nou annan lanmour parey pour Kris. (Zan 13:34, 35) Sa kalite i form parti fri lespri Bondye. Eski endividyelman nou priye pour ganny lespri sen par demann Zeova pour ed nou demontre son fri ki enplik lanmour, lazwa, lape, pasyans, labonte, lafwa, ladouser ek kontrol lo nou prop lekor? (Lik 11:13; Gal. 5:22, 23) Si wi, nou parol ek aksyon pou montre ki nou pe viv par lespri e nou pe les li gid nou.—Lir Galat 5:16, 25.
11. Akoz ou kapab dir ki i apropriye pour demann lezot pour priy pour nou?
11 Si nou tande nou zanfan pe ganny tante pour kopye dan bann tes ki ganny fer kot lekol, nou devret priy pour zot e osi servi Labib pour ed zot pour ki zot azir onnetman e pa fer okenn keksoz mal. Pol ti dir bann Kretyen Korent: “Nou priy Bondye pour ki zot pa fer okenn keksoz mal.” (2 Kor. 13:7) Bann lapriyer koumsa ki demontre limilite i fer plezir Zeova e i montre ki nou en bon dimoun. (Lir Proverb 15:8.) Parey zapot Pol ti fer, nou kapab demann lezot pour priy pour nou. I ti ekrir: “Priy pour nou. Nou sir ki nou annan en konsyans kler, parski nou oule fer sa ki byen dan tou sirkonstans.”—Ebr. 13:18.
Nou lapriyer i revel plis ki sa
12. Kwa ki devret pli enportan dan nou lapriyer?
12 Eski nou lapriyer i endike ki nou ere e devoue konman Temwen Zeova? Eski nou lapriyer i premyerman montre ki nou siport lavolonte Bondye, predikasyon sa mesaz Rwayonm, zistifikasyon drwa Zeova pour dirize e sanktifikasyon son non? Sa bann keksoz i devret bann laspe pli enportan ler nou priye, parey model lapriyer Zezi ti montre. Sa lapriyer i konmans koumsa: “Nou Papa ki dan lesyel Ki ou non sen i ganny glorifye; Ki ou Renny i ganny etabli; Ki ou lavolonte i ganny akonpli lo later parey dan lesyel.”—Mat. 6:9, 10.
13, 14. Ki nou lapriyer i revele lo nou?
13 Nou lapriyer i revel nou motivasyon, lentere ek dezir. Zeova i konn sa ki nou ete anndan. Proverb 17:3 i dir: “En marmit ki rafinen i pour larzan e en fourno pour lor, me Zeova i sa enn ki egzamin leker.” Bondye i vwar sa ki dan nou leker. (1 Sam. 16:7) I konnen ki mannyer nou santi anver nou bann renyon, nou minister ek nou bann frer ek ser spirityel. Zeova i konnen ki nou panse lo “bann frer” Kris. (Mat. 25:40) I konnen si nou vreman anvi sa ki nou priy lo la ouswa si nou pe zis resit menm parol. Vi ki bann dimoun dan son letan ti annan en move pwennvi lo lapriyer, Zezi ti dir: “Kan zot priye, pa servi en kantite parol parey bann payen: zot krwar ki Bondye i ekout zot si zot koz en kantite.”—Mat. 6:7.
14 Sa ki nou dir dan nou lapriyer i montre ki kantite nou depan lo Bondye. David ti dir sa lo Zeova: “Ou’n vin en refiz pour mwan, en latour for devan mon lennmi. Mon anvi vin en envite dan ou latant pour en letan endefini; mon anvi kasyet anba ou lezel.” (Ps. 61:3, 4) Dan en sans senbolik, kan Bondye i ‘tal son latant lo nou,’ sa i vedir ki nou an sekirite e annan son proteksyon. (Rev. 7:15, NW) Pa i vreman rekonfortan alor pour apros Zeova dan lapriyer avek konviksyon ki i ‘dan nou kote’ ler nou lafwa i ganny teste dan okenn fason!—Lir Psonm 118:5-9.
15, 16. Lapriyer i kapab ed nou konpran kwa konsernan nou dezir pour ganny lezot privilez dan servis?
15 Lapriyer onnet ki nou fer avek Zeova konsernan nou bann motivasyon i kapab ed nou pour konpran zot pli byen. Par egzanp, eski lanvi pour servi konman en sirveyan parmi pep Bondye i en dezir ki nou annan pour ed lezot avek limilite e fer tou sa ki nou kapab pour promot lentere Rwayonm? Ouswa i zis ki nou anvi “plas sef” oubyen menm swete annan “lotorite” lo lezot? Pa koumsa ki keksoz i devret ete parmi pep Zeova. (Lir 3 Zan 9, 10; Lik 22:24-27.) Si nou annan bann move dezir, lapriyer onnet avek Zeova i kapab devwal zot e ed nou sanze avan zot pran rasin.
16 Bann madanm Kretyen ki’n marye i kapab vreman anvi ki zot msye i vin en asistan ministeryel oubyen finalman petet en sirveyan ouswa ansyen. Sa bann ser i kapab azir an armoni avek santiman ki zot eksprimen dan zot lapriyer personnel, par fer bokou zefor pour vin en legzanp dan lafason zot konport zot. Sa i vreman enportan akoz parol ek konportman fanmir sa msye i annan lefe lo lafason ki lezot i vwar li dan kongregasyon.
Reprezant lezot dan lapriyer an piblik
17. Akoz i bon pour tousel kan nou priy an prive?
17 Zezi ti souvan elwanny li avek lafoul pour ki i kapab priy avek son Papa an prive. (Mat. 14:13; Lik 5:16; 6:12) I neseser pour nou osi tousel parfwa. Ler nou priy dan en fason kalm dan en landrwa trankil, i tre probab ki nou pou fer bann desizyon ki fer plezir Zeova e ki dan nou prop lentere spirityel. Me Zezi ti osi priy an piblik e i bon pour vwar ki mannyer sa i kapab ganny fer dan en fason apropriye.
18. Ki serten pwen bann frer i devret gard antet kan zot pe reprezant kongregasyon dan lapriyer?
18 Dan renyon, bann zonm fidel i reprezant kongregasyon dan lapriyer an piblik. (1 Tim. 2:8) Lezot frer ek ser i devret kapab dir “amenn” ki vedir “dakor,” a lafen sa lapriyer. Par kont, pour kapab fer sa, zot devret dakor avek sa ki’n ganny dir. Napa nanryen ki sokan ouswa ki ofans lezot dan model lapriyer Zezi. (Lik 11:2-4) Deplis, i pa ti mansyonn an detay tou bezwen oubyen problenm sak dimoun ki ti pe ekout li. Bann konsern personnel i bann size ki devret ganny diskite dan lapriyer an prive e pa an piblik. Kan pe reprezant en group dan lapriyer, nou devret evite enkli bann keksoz konfidansyel.
19. Ki mannyer nou devret konport nou pandan lapriyer an piblik?
19 Kan nou pe ganny reprezante dan lapriyer, nou devret demontre respe ek “lakrent pour Bondye.” (1 Pyer 2:17, NW) I annan bann moman ek landrwa apropriye pour serten aksyon ki pa apropriye dan renyon kongregasyon. (Ekle. 3:1) Par egzanp, fer krwar en dimoun i anvi ki tou dimoun dan en group i may lebra ouswa tyonbo lanmen pandan lapriyer an piblik. Sa i kapab ofans ouswa distrer serten, enkli bann viziter ki pa partaz menm krwayans avek nou. Serten koup marye i kapab atrap lanmen kanmarad dan en fason diskre, me si zot anmay kanmarad pandan ki lapriyer piblik pe ganny fer, sa bann ki vwar sa kalite kondwit i kapab tonbe spirityelman. Zot kapab krwar ouswa ganny lenpresyon ki sa koup pe met plis lanfaz lo zot relasyon romantik olye respe pour Zeova. Akoz en profon respe pour li, annou alor “fer tou pour laglwar Bondye” e evit bann kondwit ki kapab distrer, sok ouswa fer tonbe lezot.—1 Kor. 10:31, 32; 2 Kor. 6:3.
Priy pour kwa?
20. Ki mannyer ou pou eksplik Romen 8:26, 27?
20 Parler, nou kapab pa konnen ki pour dir dan nou lapriyer personnel. Pol ti ekrir: “Nou pa konnen sa ki bon pour demande kan nou fer lapriyer. Me Lespri i pled pour nou avek bann soupir ki nou pa kapab eksprimen par parol. E Bondye ki war dan leker i konpran sa ki Lespri i oule demande.” (Rom. 8:26, 27) Zeova in permet ki plizyer lapriyer i ganny rikorde dan Lekritir. I aksepte sa bann demann enspire konmsi zot sorti kot nou e apre i reponn zot. Bondye i konn nou e sinifikasyon sa bann parol ki atraver son lespri sen i’n fer bann ekriven Labib ekrir. Zeova i reponn nou bann siplikasyon kan lespri i “pled” oubyen koz dan nou plas. Me anmezir nou vin pli familye avek Parol Bondye, sa ki nou devret priy lo la i kapab vin pli fasilman dan nou lespri.
21. Ki nou pou egzaminen dan prosen lartik?
21 Parey nou’n aprann, nou lapriyer i revel en kantite lo nou. Par egzanp, zot kapab revele ki degre pros nou ete avek Zeova e ki kantite nou konn son Parol. (Zak 4:8) Dan lot lartik, nou pou egzamin serten lapriyer ek lekspresyon dan lapriyer ki ganny rikorde dan Labib. Lefet ki nou pou egzamin Labib, ki lefe sa i kapab annan ler nou pe apros Bondye dan lapriyer?
Ki ou pou reponn?
• Ki latitid nou devret annan ler nou apros Zeova dan lapriyer?
• Akoz nou devret priy pour bann frer ek ser Kretyen?
• Nou lapriyer i kapab revel kwa lo nou ek nou motivasyon?
• Ki mannyer nou devret konport nou ler pe fer lapriyer an piblik?
[Kestyon]
[Portre lo paz 11]
Eski ou loue e remersye Zeova regilyerman?
[Portre lo paz 13]
Ler nou fer lapriyer an piblik nou latitid i devret touzour anmenn loner pour Zeova