Konman bann minis Bondye demontre lapolites

“Fer tou parey [Bondye].”—EFE. 5:1.

1, 2. (a) Akoz lapolites i enportan? (b) Ki nou pou diskit lo la dan sa lartik?

AN RAPOR avek kondwit respektab, en ekriven ki apel Sue Fox i ekrir: “Nou devret toultan demontre lapolites. Lapolites i mars partou e toultan.” Ler dimoun i annan sa labitid pour demontre lapolites, sa i fer annan mwens problenm e sa i souvan rezourd problenm. Me lekontrer i osi vre. Si nou tret lezot san okenn respe sa i anmenn dezakor, mekontantman, ek sagrinasyon.

² Normalman bann frer ek ser dan kongregasyon Kretyen i demontre respe anver kanmarad. Kantmenm sa, nou bezwen veye pour pa devlop en mank lapolites ki komen dan lemonn ozordi. Annou vwar ki mannyer nou kapab aplik bann prensip Labib ki kapab protez nou dan sa domenn e atir dimoun ver vre ladorasyon. Pour konpran kwa ki enplike pour demontre lapolites, annou vwar legzanp Zeova ek son Garson.

Legzanp Zeova ek son Garson lo lapolites

3. Ki legzanp lapolites Zeova in kite?

³ Zeova in kit en legzanp parfe an rapor avek lapolites. Malgre son o pozisyon konman Souvren liniver, i tret bann imen avek gran labonte ek respe. Ler i ti koz avek Abraam ek Moiz, Zeova ti servi en term Ebre ki souvan ganny tradwir konman “silvouple.” (Zen. 13:14; Egz. 4:6) Ler son bann serviter i fer fot, Zeova i “annan mizerikord ek konpasyon, [i] pa ankoler vitman, e [i] annan en kantite labonte leker ek laverite.” (Ps. 86:15) I tre diferan avek serten imen ki pran en gran lakoler ler lezot pa arive fer sa ki zot pe ekspekte.

4. Ki mannyer nou kapab imit Zeova letan lezot i koz avek nou?

⁴ Nou kapab aprann konsernan lapolites ki Bondye i annan dan lafason ki i ekout bann imen. Ler Abraam ti demann bann kestyon konsernan bann dimoun Sodonm, Zeova ti reponn sak kestyon avek pasyans. (Zen. 18:23-32) Pour Zeova sa pa ti en gaspiyaz letan. Zeova i ekout lapriyer son bann serviter e bann ki’n repantir ki kriy ver li pour ganny led. (Lir Psonm 51:11, 17. *) Eski pa nou devret imit Zeova par ekout lezot letan zot koz avek nou?

5. Ki mannyer imit legzanp Zezi konsernan lapolites i kapab amelyor nou relasyon avek lezot?

⁵ Lapolites ti enn parmi sa kantite keksoz ki Zezi Kri ti aprann avek son Papa. Menm si parler son minister ti pran bokou son letan ek lenerzi, Zezi ti touzour pasyan e bon. Bann dimoun ki ti annan lalep, bann aveg ki ti bezwen mandyan e lezot dimoun ki ti dan bezwen ti remarke ki Zezi ti pare e anvi ed zot. I pa ti inyor zot, menm si zot pa ti dir li davans ki zot ti pe vin vwar li. I ti souvan aret sa ki i ti pe fer pour ed en dimoun ki ti vreman dezespere. Zezi ti demontre en konsiderasyon ekstraordiner anver bann ki ti annan lafwa dan li. (Mark 5:30-34; Lik 18:35- 41) Konman Kretyen, nou swiv legzanp Zezi ler nou bon e pare pour ede. Nou fanmir, vwazen e lezot pou remarke ki nou annan en tel kondwit. Deplis, en kondwit koumsa i rann glwar Zeova e fer nou ere.

6. Ki legzanp lafeksyon ek lanmitye Zezi in kite?

⁶ Zezi ti osi demontre respe anver bann dimoun par servi zot non. Eski bann sef relizye Zwif ti demontre respe anver lezot dan sa menm fason? Non. Zot ti konsider bann ki pa ti konn Lalwa konman “bann dimoun modi” e tret zot dan sa fason. (Zan 7:49) I pa ti leka avek Garson Bondye. Mart, Mari, Zase e plizyer lezot ankor ti tann li apel zot par zot non. (Lik 10:41, 42; 19:5) Petet kiltir ek sirkonstans ki etablir bann lareg lo ki mannyer nou pou abord dimoun ozordi, par kont bann serviter Zeova i devlop lafeksyon pour lezot. * Zot pa les okenn diferans ant zot diminyen respe ki zot merit annan pour bann frer ek ser Kretyen e pour lezot.—Lir Zak 2:1-4.

7. Ki mannyer bann prensip Labib i ed nou pour kapab demontre lapolites anver bann dimoun ki sorti dan nenport ki landrwa?

⁷ Zeova ek son Garson i tret dimoun sorti dan tou nasyon ensi ki bann group etnik avek lapolites e sa i montre ki zot respekte dinyite sa bann dimoun e i atir bann ki annan sa bon kondisyon leker ver laverite. Byensir, sinifikasyon lapolites i varye dapre landrwa. Alor, nou pa devret swiv bann lareg strik an rapor avek lapolites. O kontrer, nou devret les bann prensip Labib ed nou aziste fason ki nou demontre respe anver lezot dan nenport ki landrwa. Annou vwar ki mannyer ler nou tret lezot avek lapolites sa i kapab fer nou annan en pli bon rezilta dan nou minister Kretyen.

Dir bonzour lezot e koz avek zot

8, 9. (a) Ki labitid ki kapab ganny konsidere konman en mank lapolites? (b) Akoz nou devret les parol Zezi dan Matye 5:47 enfliyans lafason ki nou tret lezot dimoun?

⁸ Dan sa lemonn kot dimoun i prese, souvan zot pas o bor kanmarad san dir “bonzour” oubyen demande “konman ou sava?” Byensir personn pa oblize koz avek sak  dimoun ki i zwenn lo trotwar kot i annan en lafoul dimoun. Me dan en kantite lezot sityasyon, i apropriye e byen pour dir bonzour lezot. Eski ou abitye dir bonzour lezot? Oubyen eski ou souvan pas o bor zot san fer en sourir oubyen dir en mo zantiy? San okenn move lentansyon, en dimoun i kapab devlop sa labitid ki an realite i en mank lapolites.

⁹ Zezi ti donn nou en rapel ler i ti dir: “Si zot koz zis avek zot bann frer, eski zot in fer keksoz ekstraordiner? Eski bann payen pa i fer parey!” (Mat. 5:47) Dan menm laliny avek sa parol ki Zezi ti dir, Donald Weiss en konseye ti ekrir: “Dimoun pa kontan ler lezot i zis pas o bor zot konmsi zot pa egziste. Napa okenn leskiz ki nou kapab donn en dimoun ki nou’n inyore. Solisyon i senp: Dir bonzour lezot. Koz avek zot.” Si nou amikal e pare pour apros lezot nou pou ganny bon rezilta.

10. Ki mannyer lapolites i kapab ed nou pour annan en pli bon rezilta dan predikasyon? (Vwar sa bwat “ Konmans avek en zoli sourir.”)

¹⁰ Annou vwar legzanp en koup Kretyen ki apel Tom ek Carol, ki viv dan en gran lavil dan Nor Lanmerik. Zot in fer konversasyon agreab avek zot vwazen dan kad zot predikasyon. Ki mannyer zot fer sa? Par refer avek Zak 3:18, Tom i dir: “Nou esey vin amikal e anpe avek bann dimoun. Nou apros bann ki deor dan zot lakour oubyen bann ki travay dan zanmirant. Nou fer zot en sourir e dir zot bonzour. Nou koz avek zot konsernan keksoz ki enteres zot, savedir zot zanfan, zot lisyen, zot lakour, zot travay. Avek letan, zot konsider nou konman zot zanmi.” Carol i azoute: “Plitar lo en lot vizit, nou dir zot nou non e nou demann zot sa ki pour zot. Nou fer zot konnen ki nou pe fer dan vwazinaz me nou gard nou konversasyon bref. Avek letan, nou kapab donn zot en bon temwannyaz.” En kantite vwazen i annan konfyans dan Tom ek Carol. En kantite zot in aksepte piblikasyon baze lo Labib e serten in montre en pli gran lentere pour aprann laverite.

Demontre respe dan bann sirkonstans difisil

11, 12. Akoz nou devret ekspekte ganny maltrete ler nou pe pres sa bon nouvel e ki mannyer nou devret reakte ler sa i arive?

¹¹ Parler, nou ganny trete san respe ler nou  pres sa bon nouvel. Nou ekspekte sa, akoz Kris Zezi ti averti son bann disip: “Si zot in persekit mwan, zot osi, zot pou ganny persekite.” (Zan 15:20) Me ler nou rann laparey anver bann remark dezagreab, sa pa anmenn bon rezilta. Ki mannyer nou devret reakte? Zapot Pol ti ekrir: “Rann glwar dan zot leker Kris konman zot Senyer. Zot devre touzour pare pour donn en repons bann ki demann zot leksplikasyon konsernan lesperans ki dan zot. Me fer li avek labonte ek respe.” (1 Pyer 3:15, 16) Ler nou demontre respe setadir reponn avek douser, sa i kapab fer bann ki pe ensilte nou reazir byen anver nou mesaz.—Tit 2:7, 8.

¹² Eski nou kapab prepar nou pour reakte dan en fason ki Bondye i aprouve ler nou ganny bann remark negatif? Wi. Pol ti donn sa konsey: “Ki zot parol i touzour agreab e enteresan, pour zot kapab donn bann repons valab tou dimoun.” (Kol. 4:6, nou ki’n met an italik.) Si nou fer li en labitid pour annan respe anver manm lafanmir, kanmarad lekol, koleg travay, bann frer ek ser dan kongregasyon e bann dimoun dan vwazinaz, nou pou pli byen prepare pour fer fas avek sikannri ek lensilt parey en Kretyen i devret.—Lir Romen 12:17-21.

13. Donn en legzanp lo ki mannyer lapolites i kapab fer bann opozan sanz zot latitid.

¹³ Ler nou demontre lapolites dan bann sityasyon difisil sa i anmenn bon rezilta. Par egzanp, Zapon en Temwen ti ganny sikannen avek en met lakour ek son envite. Dan en fason poli, sa frer ti kit sa lakour. Anmezir ki i ti pe kontinyen pres dan sa teritwar i ti remarke ki sa envite ki pa ti tro lwen ti pe get li. Ler sa frer ti apros li, sa zonm ti dir: “Eskiz mwan pour sa ki’n arive. Menm si nou’n dir bann keksoz ki pa zantiy avek ou, mon’n remarke ki ou’n kontinyen sourir. Ki mon bezwen fer pour vin koumsa?” Vi ki sa zonm ti’n perdi son travay e son manman ti’n fek mor, i ti napa okenn lespwar pour li vreman ere. Sa Temwen ti ofer li en letid Labib e sa zonm ti aksepte. En pti pe letan apre i ti pe etidye de fwa par semenn.

Sa pli bon fason pour devlop lapolites

14, 15. Ki mannyer bann serviter Zeova dan letan lontan ti elve zot zanfan?

¹⁴ Bann paran Kretyen dan letan lontan ti fer sir ki zot zanfan ti aprann lapolites depi dan lakour. Egzamin sa fason poli ki Abraam ek son garson Izaak ti koz avek kanmarad dan Zenez 22:7. I ti osi evidan ki paran Zozef osi ti’n elve li dan sa bon fason. Ler i  ti ganny met dan prizon, i ti demontre lapolites menm anver son bann kanmarad prizonnyen. (Zen. 40:8, 14) Sa ki i ti dir avek Faraon, i montre ki i ti’n aprann sa bon fason pour koz avek en dimoun ki dan en o pozisyon.—Zen. 41:16, 33, 34.

¹⁵ Dan sa dis komannman ki ti ganny donnen avek bann garson Izrael ti annan sa enn: “Respekte ou papa ek ou manman pour ki ou a viv lontan lo later ki Zeova ou Bondye pe donn ou.” (Egz. 20:12) En fason pour bann zanfan respekte zot paran ti par demontre lapolites kot lakour. Fiy Yifta ti demontre respe anver son papa dan en fason ekstraordiner par azir dapre ve ki son papa ti’n fer dan en sityasyon difisil.—Ziz 11:35-40.

16-18. (a) Kwa ki kapab ganny fer pour ansenny bann zanfan lapolites? (b) Akoz i enportan pour ansenny zanfan lapolites?

¹⁶ I vreman enportan pour elve nou zanfan pour annan lapolites. Pour keksoz al byen ler zot vin adilt, bann zenn i bezwen aprann sa bon fason pour akey bann viziter, reponn telefonn e manz avek lezot. Zot devret ganny led pour konpran akoz zot bezwen tenir laport pour les dimoun pase, demontre labonte anver bann dimoun aze e malad e ofer led bann ki pe anmenn bann pake lour. Zot bezwen konpran lenportans pour dir “silvouple,” “mersi,” “pa dekwa,” “mon kapab ed ou?” ek “eskiz mwan.”

¹⁷ I pa merit difisil pour elve zanfan pour vin poli. Sa meyer fason i par donn en bon legzanp. Kurt ki annan vennsenk an i dir ki mannyer li ek son trwa frer ti aprann pour vin poli: “Nou ti obzerve e ekoute ler Manmi ek Dadi ti koz dan en fason zantiy avek kanmarad e tret lezot dimoun avek pasyans ek konsiderasyon. Kot Lasal Rwayonm, Dadi ti anmenn mwan avek li avan e apre renyon pour koz avek bann frer ek ser aze. Mon ti tann fason ki i ti akey lezot e vwar respe ki i ti annan pour zot.” Kurt i kontinyen: “Avek letan, mon ti demontre lapolites parey li. Tret lezot avek lapolites ti vin en keksoz otomatik. I pa sa fason ki ou bezwen azir, me sa fason ki ou anvi azir.”

¹⁸ Ki pou arive si paran i ansenny zot zanfan lapolites? Bann zanfan pou kapab fer zanmi e pou reste anpe avek lezot. Zot pou byen ekipe pour travay avek bann anplwayer ek koleg travay. Deplis, bann zanfan ki demontre respe, ki poli, e drwat pou donn lazwa ek satisfaksyon zot paran.—Lir Proverb 23:24, 25. *

Lapolites i fer nou diferan

19, 20. Akoz nou devret determinen pour imit legzanp nou Bondye ek son Garson ki annan lapolites?

¹⁹ Zapot Pol ti ekrir: “Zot bann zanfan ki Bondye i kontan, fer tou zot zefor pour fer tou parey li.” (Efe. 5:1) Imit Zeova ek son Garson i vedir aplik bann prensip Labib parey sa bann ki’n ganny egzaminen dan sa lartik. Par fer sa, nou pou evite montre lapolites dan en fason ipokrit zis pour ganny faver en dimoun ki annan en pli o pozisyon oubyen pour benefisye lo plan materyel.—Zid 16.

²⁰ Dan sa bann dernyen zour son move dominasyon, Satan i determinen pour elimin bann standar lo kondwit respektab ki Zeova in etablir. Me Dyab pa pou reisi elimin lapolites ki bann vre Kretyen i annan. Fotespere sakenn de nou i determinen pour swiv legzanp nou Bondye ek son Garson ki annan lapolites. Dan sa fason nou parol ek kondwit pou touzour diferan avek bann ki swazir pour pa demontre lapolites. Nou pou anmenn loner lo non nou Bondye Zeova ki poli e sa pou atir bann dimoun senser ver son vre ladorasyon.

[Not anba lo paz]

Eski ou rapel?

• Ki nou aprann avek Zeova ek son Garson lo demontre lapolites?

• Akoz dir bonzour dimoun dan en fason zantiy i annan en bon lefe lo nou konman Kretyen?

• Ki mannyer lapolites i kontribye pour ganny bon rezilta dan predikasyon?

• Ki rol bann paran i zwe pour ansenny zot zanfan lapolites?

[Kestyon]

[Bwat lo paz 30]

 Konmans avek en zoli sourir

En kantite dimoun i ezite pour konmans en konversasyon avek en dimoun ki zot pa konnen. Me akoz lanmour pour Bondye e pour zot prosen, Temwen Zeova i fer bokou zefor pour aprann ki mannyer pour fer konversasyon pour kapab partaz laverite ki dan Labib avek lezot. Ki ou kapab fer pour amelyore dan sa domenn?

I annan en prensip enportan dan Filipyen 2:4, ki lir koumsa: “Zot pa devre pran ka zis avek zot prop lentere, me osi avek lentere lezot.” Mazin lo sa parol dan sa fason: Si ou pa’n zanmen zwenn en serten dimoun avan, i vwar ou konman en etranze. Ki mannyer ou kapab fer li santi li alez? En zoli sourir ek en bonzour amikal i kapab ede. Me, i annan lezot keksoz pour pran an konsiderasyon.

Par fer zefor pour konmans en konversasyon avek en dimoun, petet ou’n enteronp li dan sa ki i ti pe mazinen. Si ou esey fer li koz lo sa ki ou pe mazinen san enterese avek sa ki li i pe mazinen, petet i pa pou byen reazir. Alor, si petet ou kapab konnen kwa ki i pe mazinen, akoz ou pa servi sa pour konmans en konversasyon avek li? Sanmenm ki Zezi ti fer ler i ti zwenn en madanm kot en pwi Samari. (Zan 4:7-26) I ti pe mazin lo anmas delo. Zezi ti konmans son konversasyon avek li lo sa baz e byen vit i ti diriz sa konversasyon ki ti vivan ver en diskisyon baze lo bann keksoz spirityel.

[Portre lo paz 29]

Vin amikal anver bann dimoun i kapab permet nou donn en bon temwannyaz

[Portre lo paz 31]

Lapolites i touzour apropriye