Apros avek Bondye

Eski Bondye i kapab santi regre?

ZIZ 2:11-18

KONMAN bann imen enparfe, nou parfwa santi regre. Par egzanp, nou regrete apre ki nou’n realize ki nou’n fer en fot. Labib i dir ki Zeova osi i santi regre. Me nou dir ‘Bondye i parfe, I pa fer fot!’ Alor, dan ki fason Bondye i santi regre? Larepons sa kestyon i kapab ed nou pour konpran en keksoz enteresan: Zeova i annan santiman, e nou aksyon i kapab annan lefe lo son santiman. Egzamin sa bann parol ki ganny rikorde dan Ziz 2:11-18.

Liv Ziz dan Labib i rakont en moman difisil dan listwar bann Izraelit. Sa nasyon ti’n fini etabli zot Kanaan, sa later ki Bondye ti’n promet Abraam. Dan sa plizyer syek ki ti swiv apre, lafason ki bann Izraelit ti pe toultan refer menm kekoz ki ti enplik kat fason: Zot ti abandonn Zeova, sibir move konsekans, fer siplikasyon e zot ti ganny delivre. *

Zot ti abandonn Zeova. Bann Izraelit ti les zot ganny enfliyanse par bann Kananeen. Zot ti “abandonn Zeova” e konmans swiv lezot bondye. Zot ti “konmans servi Baal ek bann zidol Astoret.” * Zot aksyon ti en form lapostazi. I pa drol alor ki bann Izraelit ti “ofans Zeova” sa Bondye ki ti delivre nasyon Izrael Lezip!—Verse 11-13; Ziz 2:1.

Zot ti sibir move konsekans. Sa pep ti’n rezet Zeova e sa ti provok son lakoler ki zistifye, alor i ti retir son proteksyon lo zot. Nasyon Izrael ti alor tonm dan “lanmen zot bann lennmi,” ki ti vini e ravaz sa pei.—Verse 14.

Zot ti fer siplikasyon. Lefet ki zot ti pe soufer en kantite, bann Izraelit ti regrete pour bann keksoz mal ki zot ti’n fer, e zot ti rod led avek Zeova. Zot siplikasyon ti montre ki zot ti pe ‘plennyen akoz zot ti pe ganny abize.’ (Verse 18) Zot ti sipliy Bondye parey zot ti abitye fer. (Ziz 3:9, 15; 4:3; 6:6, 7; 10:10) Ki mannyer Bondye ti reazir?

Zot ti ganny delivre. Zeova ti tann bann Izraelit pe plennyen e i ti “santi regre.” Lorizin sa mo Ebre “santi regre” i kapab osi vedir “ler en dimoun i sanz son lespri ouswa lentansyon.” En liv referans i dir: “Zeova ti tann zot plennyen, e touse par sa i ti sanz son plan pour pini zot e ranplas li par delivre zot.” Son mizerikord ti fer Zeova “etabli bann ziz” ki ti delivre son pep kont zot bann lennmi.—Verse 18.

Eski ou’n remarke kwa ki ti pous Bondye pour santi regre, oubyen sanz son nide? Sa ti akoz sanzman dan latitid son pep. Mazin li dan sa fason: En papa ki annan lanmour i kapab disiplin son zanfan pour en fot ki i’n fer petet par retir serten son bann privilez. Me letan i remarke ki sa zanfan i vreman regrete sa ki i’n fer, sa papa i deside pour retir sa pinisyon lo li.

Ki nou kapab aprann lo Zeova dan sa resi? Pese ki ganny fer par ekspre i fer li ankoler, me en leker ki’n repantir i pous li pour demontre mizerikord. I fer sans alor ki nou aksyon i kapab annan lefe lo santiman Bondye. Akoz ou pa aprann ki mannyer pour fer leker Zeova “rezwir”? (Proverb 27:11) Ou pa pou zanmen regrete.

[Not anba lo paz 11]