Eski tou bon dimoun i al dan lesyel?

APRE son dernyen repa avek son bann zapot sa zour swar avan son lanmor, Zezi ti promet pour rekonpans zot avek en plas dan lesyel. I ti dir zot: “I annan en kantite lasanm dan lakaz mon Papa. Si pa ti vre, eski mon ti ava dir zot, ki mon pe al prepar en plas pour zot?” (Zan 14:2) Akoz Zezi ti pou donn zot en plas dan lesyel? Ki zot pou fer laba?

Zezi ti annan antet en travay spesyal pour son bann disip. Sa menm zour swar, i ti dir zot: “Zot, zot bann ki’n reste fidel anver mwan dan tou mon difikilte ek soufrans. Parey mon Papa in donn mwan pouvwar pour gouvern son Rwayonm, mwan osi, mon donn zot menm pouvwar.” (Lik 22:28, 29) Bondye ti’n promet Zezi ki i ti pou vin sa Lerwa ki ti pou donn limanite enn zot pli gran bezwen e sa i en bon gouvernman. Zezi pou soulaz bann ki pe soufer e i pou kraz bann ki pe fer zot soufer. Menm si bann sitwayen anba dominasyon Zezi pou ganny trouve “ziska kot bann bout later,” son tronn pou dan lesyel.—Psonm 72:4, 8; Danyel 7:13, 14.

Par kont, Zezi pa pou diriz li tousel. Se pour sa rezon ki i ti promet son bann zapot en plas dan lesyel. Zot ti premye pour ganny swazir konman bann lerwa pour “rennyen lo later.”—Revelasyon 5:10.

Konbyen ki pou al dan lesyel? Parey dan nenport ki gouvernman, bann ki pou dirize dan Rwayonm Bondye i en ptigin konpare avek tou bann dimoun ki pou viv anba son dominasyon. Zezi ti dir bann ki pou diriz avek li: “Pa bezwen per, pti troupo, akoz zot Papa i’n war bon pour donn zot son Rwayonm.” (Lik 12:32) Sa “pti troupo” pou finalman ariv 144,000 an tou. (Revelasyon 14:1) Sa sif i ptigin konpare avek sa milyon dimoun ki pou rezwir lavi lo later pour touzour konman bann sitwayen fidel sa Rwayonm.—Revelasyon 21:4.

Alor, pa tou bon dimoun ki pou al dan lesyel. Zapot Pyer ti klerman dir sa konsernan Lerwa David ki ti en bon dimoun: “David limenm pa ti mont osyel.” (Akt 2:34) Zan Batis ti en bon dimoun. Pourtan, Zezi ti fer resorti ki i pa ti pou al dan lesyel pour dirize konman lerwa. Zezi ti dir: “Parmi bann ki’n ne lo later napa enn ki pli gran ki Zan-Batis. Pourtan sa ki pli pti dan Rwayonm lesyel i pli gran ki li.”—Matye 11:11.

Eski ou pou resevwar sa rekonpans bann bon dimoun?

Ki en dimoun i merit fer pour resevwar sa rekonpans pour viv pour touzour lo later? Zezi ti dir: “Bondye in telman kontan lemonn ki i’n donn son sel Garson, pour ki nenport ki, ki krwar dan li, pa pou mor, me i a ganny lavi eternel.” (Zan 3:16) Remarke ki lanmour ki Bondye i annan pour lemonn i pous li pour fer en laranzman pour ki tou dimoun i kapab ganny lavi eternel, me zis bann ki “krwar” oubyen annan lafwa ki pou vreman ganny sa rekonpans.

Lafwa ki en dimoun i annan i bezwen baze lo konnesans egzakt. (Zan 17:3) Ou kapab prouve ki ou en bon dimoun par aprann plis konsernan plan Bondye pour bann imen. Les lafwa ki ou’n devlope pous ou pour met an pratik sa ki ou aprann. Annan sa lasirans ki i vreman posib pour ou viv pour touzour.

[Bwat lo paz 7]

Ki Labib i dir?

Kestyon:

Ki i arive avek bann bon dimoun ler zot mor?

Larepons:

“Bann mor, zot pa konn nanryen ditou.”—EKLEZYAST 9:5.

Kestyon:

Ki lespwar bann bon dimoun i annan pour lavenir?

Larepons:

“Sa ler pe arive kan tou bann mor ki dan tonbo pou tann son lavwa [Zezi], e zot pou sorti dan zot tonbo.”—ZAN 5:28, 29.

Kestyon:

Kote laplipar bon dimoun pou reste?

Larepons:

“Bann dimoun drwat pou posed later e zot pou reste lo la pour touzour.”—PSONM 37:29.