Kestyon 3: Akoz Bondye i les mwan soufer?

PAPA Ian ti en soular. Menm si Ian ti annan tou sa ki i ti bezwen materyelman, i ti mank sa sipor emosyonnel ki i ti vreman anvi avek son papa. I dir: “Mon pa’n zanmen annan bokou lafeksyon pour li akoz i ti en soular e lafason ki i ti tret mon manman.” An grandisan, Ian ti konmans doute si Bondye ti egziste. I ti demande: “Si Bondye i vreman egziste, akoz i les dimoun soufer?”

Akoz sa kestyon? Menm si ou napa okenn problenm pour le moman, petet ou santi ki i en lenzistis kan ou vwar bann dimoun inosan pe soufer. Annefe, sa kestyon lo soufrans pou vin pli enportan si ou eksperyans bann moman difisil parey Ian, oubyen si en dimoun ki ou kontan i tonm malad oubyen mor.

Ki larepons serten i donnen? Serten i panse ki Bondye i permet soufrans akoz i anvi nou aprann konman pour abes nou e annan konpasyon. Lezot i santi ki dimoun i soufer dan lavi akoz pese ki zot in komet dan lepase.

Ki sa bann larepons i montre? I montre nou ki soufrans imen napa okenn lefe lo Bondye e sa i fer li difisil pour nou kontan li. I osi montre ki i en Bondye kriyel.

Ki Labib i dir? Labib i eksplik klerman ki Bondye pa responsab pour soufrans imen. I dir: “Pa les okenn dimoun dir ler i ganny teste, Bondye pe teste mwan; parski i enposib pour Bondye ganny teste par sa ki mal, e li menm i pa teste okenn dimoun.” (Zak 1:13, The Bible in Basic English) Anfet, sa lide ki Bondye i responsab pour soufrans pa an armoni avek lafason ki Labib i dekrir personnalite Bondye. Ki mannyer?

Enn parmi bann kalite pli dominan ki Bondye i annan i lanmour. (1 Zan 4:8) Pour met lanfaz lo sa pwen, Labib i dir ki Bondye i annan santiman parey en manman ki pe pran swen avek son pti baba. Bondye i demande: “Eski en madanm i kapab oubliy son pti baba, e i pa ava pran pitye pour garson sorti dan son vant? Kantmenm bann madanm i kapab oubliye, me mwan mon pa pou oubliy ou.” (Izai 49:15) Eski ou kapab  mazin en manman ranpli avek lanmour pe fer ditor son zanfan par ekspre? O kontrer, en paran ki ranpli avek lafeksyon pour son zanfan pou esey anpes li soufer. Pareyman, Bondye pa fer bann dimoun inosan soufer.​—Zenez 18:25.

Me, bann dimoun inosan pe soufer. Ou kapab demande, ‘Si Bondye i enterese avek nou e i annan tou pouvwar, akoz i les nou soufer?’

Bondye i permet soufrans kontinyen pour plizyer bon rezon. Annou vwar en rezon: Souvandfwa se dimoun ki fer lezot soufer. Bokou sa bann dimoun dominer e brit ki fer soufer lezot pa anvi sanz zot latitid. Alor pour Bondye retir enn bann lakoz soufrans, i pou bezwen detri sa bann kalite dimoun.

Pour eksplike akoz Bondye pa detri bann move dimoun la konmela, zapot Pyer ti ekrir: “Nou Senyer pa tarde pour akonpli son promes parey serten i mazinen, me i pran pasyans avek zot, i pa oule ki personn i ganny detri, me ki tou dimoun i arive repantir.” (2 Pyer 3:9) Sa pasyans ki Zeova i annan i montre ki i annan lanmour ek mizerikord.

Byento Zeova pou azir. I pou “repey par soufrans bann ki fer . . . soufer” bann inosan. Bann ki fer soufer lezot “pou ganny konman pinisyon destriksyon eternel.”​—2 Tesalonisyen 1:6-9.

Ian, ki’n ganny mansyonnen o konmansman sa lartik, in vwar bann larepons satisfezan pour son bann kestyon lo soufrans. Sa ki i’n aprann in sanz fason ki i vwar lavi. Lir son leksperyans dan Latour Veyer le 1 Novanm 2012 paz 13 an Angle.

Pour aprann plis lo akoz Bondye i les nou soufer, vwar sapit 11 dan liv Ki Labib i vreman dir? Ou kapab download li lo www.mt1130.com

[Bwat lo paz 9]

Ki Zezi ti dir lo soufrans?

Zezi pa ti blanm Bondye pour sa bann soufrans ki ti tout otour li. O kontrer i ti fer sa bann keksoz swivan:

Zezi ti montre ki Bondye pa pini dimoun inosan par fer zot soufer. Zezi ti geri bann dimoun malad, bwate, e aveg. (Matye 15:30) Bann mirak ki i ti fer, i ansenny nou de keksoz enportan: Premyerman, Zezi ti servi pouvwar Bondye pour retir soufrans, pa pour kre plis soufrans. Dezyenmman, Zezi ti enplik son santiman kan i ti geri dimoun. Kan i ti vwar dimoun pe soufer, i ti “pran pitye” pour zot. (Matye 20:29-34) Lafason ki Zezi ti santi konsernan soufrans ti egzakteman parey son Papa. Alor, atraver parol ek aksyon Zezi, nou aprann ki Bondye i sagren kan I vwar nou soufer e I anvi retir nou dan sa bann soufrans.​—Zan 14:7, 9.

Zezi ti montre ki se Satan vre sours soufrans imen. I ti dir: “Depi okonmansman i en kriminel.” (Zan 8:44) Zezi ti osi idantifye Satan konman “sef lemonn” ek sa enn ki “tronp lemonn antye.”​—Zan 12:31; Revelasyon 12:9.

Zezi in donn nou lespwar ki tou soufrans pou fini en zour. I ti ansenny son bann disip pour priye: “Nou Papa ki dan lesyel . . . Ki ou Renny i ganny etabli; Ki ou lavolonte i ganny akonpli lo later parey dan lesyel.” (Matye 6:9, 10) Kan Renny oubyen Rwayonm Bondye pou diriz later antye, i pou nepli annan soufrans lo later, zis parey i napa soufrans dan lesyel.

Dan en vizyon ki Zezi ti donn zapot Zan, i ti dekrir ki mannyer lavi bann dimoun pou ete anba dominasyon Rwayonm Bondye. Sa letan, Bondye “pou eswiy tou larm dan zot lizye. Lanmor pou nepli egziste. Pou nepli annan ni dey, ni plere, ni soufrans, parski lemonn ansyen in disparet.”​—Revelasyon 1:1; 21:3, 4.