Labib i sanz lavi

“Zot ti anvi mon aprann pour mwan menm ki Labib i vreman dir”

Rakonte par Luis Alifonso

NE: 1982

PEI NATAL: REPIBLIK DOMINIKEN

LEPASE: ELVE DAN LARELIZYON MORMON

MON LAVI DAN LEPASE: Mon ti ne Santo Domingo, Repiblik Dominiken. Mon dernyen dan en fanmir kat zanfan. Mon paran ti byen edike e ti anvi elve zot zanfan dan en bon lanvironnman. Kat-r-an avan mon ti ne, mon manman ek mon papa ti zwenn bann misyonner Mormon. Zot ti byen enpresyonnen ki sa bann dimoun ti sanz byen kare kare e annan en bon konportman. Alor zot ti deside deswit ki nou fanmir ti pou vin sa premye fanmir lo zil pour vin en manm Church of Jesus Christ of Latter-day Saints oubyen Mormon Church.

Anmezir mon ti pe grandi, mon ti kontan sa bann aktivite sosyal kot legliz e respekte sa lanfaz ki bann Mormon ti mete lo lavi fanmir ek valer moral. Mon ti fyer ki mon ti en Mormon e mon lobzektif e mon ti anvi vin en misyonner.

Kan mon ti annan 18 an, nou ti al reste Leta-z-ini pour mwan kapab al dan en bon liniversite. Apepre enn an plitar, mon tantin ek tonton ki Temwen Zeova, ti vin vizit nou Florida. Zot ti envit nou pour asiste enn zot sesyon lo Labib. I ti enpresyonan pour vwar ki tou dimoun ti pe pran not e rod bann verse dan zot prop Labib. Alor, mon ti demann pret en bolpenn ek en papye, e konmans fer parey.

A lafen sa lazournen, mon tantin ek tonton ti dir ki zot kapab ed mwan aprann serten keksoz lo Labib vi ki mon ti enterese pour vin en misyonner. Mon ti vwar ki sa ti en bon lide akoz sa letan, mon ti konn plis lo liv Book of Mormon ki lo Labib.

KI MANNYER LABIB IN SANZ MON LAVI: Pandan nou bann diskisyon lo Labib ki nou ti fer atraver telefonn, mon tantin ek tonton ti toultan ankouraz mwan pour konpar mon krwayans avek sa ki mon ti pe aprann dan Labib. Zot ti  anvi mon aprann pour mwan menm ki Labib i vreman dir.

I ti annan bokou lansennyman bann Mormon ki mon ti’n aksepte me mon pa ti tro asire ki mannyer Labib i siport sa bann lansennyman. Mon tantin ti anvoy mwan en kopi Awake! le 8 Novanm 1995 pibliye par Temwen Zeova, ki ti annan serten lartik lo lafwa bann Mormon. Mon ti sirprann pour dekouver ki i ti annan bokou keksoz lo lansennyman bann Mormon ki mon pa ti konnen. Alor, sa ti pous mwan pour al lo sit ofisyel bann Mormon pour verifye si sa ki magazin Awake! ti pe dir i vre. Sa bann keksoz ti vre, mon ti pli konvenki kan mon ti vizit bann mize Mormon Utah.

Mon’n touzour krwar ki liv Book of Mormon ek Labib ti annakor avek kanmarad. Me kan mon ti konmans etidye Labib, mon ti remarke ki i ti annan kontradiksyon ant lansennyman bann Mormon ek sa ki Labib i dir. Par egzanp, Labib dan Ezekyel 18:4 i dir ki nanm i mor. Par kont, liv Book of Mormon dan Alma 42:9 i dir: “Nanm pa zanmen mor.”

An plis ki sa bann kontradiksyon, zot lansennyman lo nasyonalizm ti fatig mwan. Par egzanp, bann Mormon i ansennyen ki zarden Edenn ti Jackson County, Missouri, Leta-z-ini. Bann profet dan legliz i dir ki kan “Rwayonm Bondye pou konmans dirize, paviyon Leta-z-ini pou flote avek lafyerte lo poto laliberte ek legalite,” setadir ki Rwayonm Bondye pou diriz later antye atraver gouvernman Leta-z-ini.

Mon ti konmans mazinen ki mannyer sa ti pou arive. Mon ti lev sa topik dan en konversasyon avek en zenn Mormon ki ti pe ganny formen pour vin misyonner kan i ti telefonn mwan en zour apre midi. Mon ti demann li direkteman si i ti pou pare pour lager avek lezot Mormon si son pei ti pe lager avek zot pei. Mon ti sirprann kan i ti dir wi! Mon ti etidye pli profon bann lansennyman mon larelizyon e menm konsilte mon bann dirizan. Zot ti dir mwan ki larepons mon bann kestyon ti bann mister ki pou ganny eklersi anmezir ki lalimyer i vin pli kler.

Mon ti dezapwente avek larepons e konmans analiz mon lekor pour vwar pour ki rezon mon ti anvi vin en misyonner Mormon. Mon ti realize ki rezon akoz mon ti anvi vin en misyonner, i akoz mon ti anvi ed lezot e ki dimoun ti pou respe mwan. Me mon pa ti konn bokou lo Bondye. Menm si mon ti’n lir Labib plizyer fwa, i ti napa en sitan gran valer pour mwan. Mon pa ti ni menm konnen ki plan Bondye pour later oubyen imen.

KI BYENFE MON’N GANNYEN: Atraver mon letid Labib avek Temwen Zeova, mon’n aprann bokou keksoz parey non Bondye, ki arive avek nou ler nou mor, e ki rol Zezi dan lakonplisman plan Bondye. A lafen de fen mon ti konmans vin pli familye avek sa zoli liv, e mon ti kontan partaz avek lezot sa laverite ki mon ti pe aprann. Mon’n toultan konnen ki Bondye i egziste, me aprezan mon ti kapab apros li dan lapriyer konman mon bon Zanmi. Mon ti batize konman en Temwen Zeova le 12 Zilyet 2004, e sis mwan plitar mon ti konmans anons sa bon nouvel a plen tan.

Pandan senk an mon’n travay kot biro prensipal Temwen Zeova Brooklyn, New York. Mon ti vreman kontan pour ganny sa sans pour ede prodwir Labib ek bann piblikasyon baze lo Labib ki benefisye plizyer milyon dimoun dan lemonn antye, e mon ankor kontan pour ed lezot konn lo Bondye.

[Portre lo paz 8]

[Portre lo paz 9]