LO KOUVERTIR | ESKI SATAN I VREMAN EGZISTE?

Eski Satan i zis en reprezantasyon tou sa ki mal?

I fasil pour dir ki sa Satan ki Labib i koz lo la i zis en reprezantasyon tou sa ki mal. Me eski sanmenm ki Labib i vreman ansennyen? Si wi, akoz ki Labib i dekrir Satan konman sa enn ki ti koz avek Zezi Kri ek sa Bondye Tou Pwisan? Annou egzamin sa de konversasyon.

KAN SATAN TI KOZ AVEK ZEZI

Ler Zezi ti konmans son minister, Dyab ti esey met li dan pyez atraver trwa tantasyon. Premyerman, Satan ti esey met presyon lo Zezi pou servi son bann pouvwar ki Bondye ti donn li dan en fason egois pour satisfer son dezir pour manze. Apre sa, Dyab ti esey fer Zezi met son lavi dan risk e port latansyon lo li menm. Finalman, Satan ti ofer Zezi dominasyon lo tou bann Rwayonm lo later si i ti azenou e ador li. Zezi ti reziste tou le trwa sa bann tantasyon par servi en verse Labib sak fwa.​—Matye 4:1-11; Lik 4:1-13.

Avek ki Zezi ti pe koze? Eski i ti pe koz avek en keksoz mal ki ti dan li? Dapre Labib, Zezi ti “enn ki’n ganny tante dan tou keksoz, parey nou, pourtan san fer pese.” (Ebre 4:15) Labib i osi dir: “I pa’n zanmen fer okenn pese, e zanmen okenn mansonz in sorti dan son labous.” (1 Pyer 2:22) Zezi ti touzour parfe e i ti gard son lentegrite. I pa ti zanmen les okenn keksoz mal devlope dan li. I kler alor, ki Zezi pa ti pe koz avek serten keksoz mal dan li me i ti pe koz avek en vre personnaz.

Sa menm konversasyon i donn plis levidans ki Satan i en vre personnaz.

• Rapel ki Dyab ti ofer Zezi dominasyon lo later antye si i ti zis azenou e ador li. (Matye 4:8, 9) Sa pa ti pou fer okenn sans si Satan pa ti reel. An plis, Zezi pa ti demanti Satan konsernan son lotorite.

• Apre ki Zezi ti’n reziste sa bann tantasyon, Dyab “ti kit li ziska en pli bon lokazyon.” (Lik 4:13) Eski Satan i en reprezantasyon tou sa ki mal, oubyen en adverser ki persiste?

• Remarke ki ‘bann lanz ti vin port Zezi swen.’ (Matye 4:11) Eski sa bann lanz ti aktyelman bann personnaz envizib ki ti pe donn Zezi led ek lankourazman? Evidaman. Alor, akoz ki nou devret krwar ki Satan pa ti en personnaz envizib?

 KAN SATAN TI KOZ AVEK BONDYE

Sa dezyenm konversasyon i baze lo legzanp Zob, sa zonm ki ti annan lakrent pour Bondye. Sa resi i rakont de konversasyon ant Dyab ek Bondye. Dan tou le de ka, Bondye ti felisit Zob pour son lentegrite. Satan ti dir ki Zob ti servi Bondye zis pour bann rezon egois, andotmo i ti oule dir ki Bondye ti pe aste fidelite Zob. Anfet, Dyab ti dir i konn Zob pli byen ki Bondye. Zeova ti les Satan fer Zob perdi son bann byen, son zanfan e menm son lasante. * Avek letan, i ti vin evidan ki Zeova ti annan rezon konsernan Zob e ki Satan ti en manter. Bondye ti beni Zob pour son lentegrite.​—Zob 1:6-12; 2:1-7.

Dan bann konversasyon ant Bondye ek Satan, eski Zeova ti pe koz avek en keksoz mal dan li? Labib i dir, “Semen sa vre Bondye i parfe.” (2 Samyel 22:31) Parol Bondye i osi dir: “Sen, sen, sen, Senyer Bondye Toupisan.” (Revelasyon 4:8) Sen i vedir pir, sakre e separe avek pese. Zeova i parfe e san defo. I zis pa kapab annan lemal dan li.

Kantmenm sa, serten i kapab dir ki Zob pa ti en vre dimoun, alor sa konversasyon ti zis senbolik. Me eski sa largiman i fer sans? Lezot verse Labib i endike ki Zob ti en vre dimoun. Par egzanp, dan Zak 5:7-11 Zob i ganny servi konman en legzanp pour motiv bann Kretyen andire dan bann moman difisil e i ed nou rapel ki Zeova i rekonpans nou ler nou andire. Ki lefe sa legzanp ti pou annan si Zob pa ti en vre dimoun e ki sa bann latak sorti kot Satan ti zis en keksoz envante? Deplis, dan Ezekyel 14:14, 20, Zob i enkli ansanm avek Noe ek Danyel dan sa lalis sa trwa zonm drwat. Parey Noe ek Danyel, Zob osi ti en dimoun reel ki ti annan en gran lafwa. Si Zob ti vre, pa son ataker, sa en ki ti responsab pour son persekisyon, ti bezwen vre li osi?

I kler alor ki Labib i reprezant Satan konman en personnaz reel ki envizib. Petet ou kapab mazinen, ‘Eski i en danze pour mwan ek mon fanmir ozordi?’

ME, KI PE ARIVE OZORDI?

Mazin en sel kou en group kriminel i antre dan ou lavil. Byensir, sekirite personnel ek moralite pou deteryore. Aprezan, annou egzamin sa senaryo: Satan ek son bann demon ki’n rebele kont Bondye i en sel kou ganny zete lo later. Avek ki rezilta? Mazin sa ki ou vwar dan nouvel lokal ek enternasyonal.

• Eski ou vwar en ogmantasyon dan vyolans, malgre lakantite zefor ki pe ganny fer pour met en lafen avek tou sa la?

• Eski ou vwar en ogmantasyon dan bann video, film ek lanmizik ki baze lo bann keksoz demonyak, malgre konsern bokou paran?

• Eski ou remarke ki lanvironnman pe de pli an pli ganny detri, malgre lakantite zefor pour prezerv li?

• Eski pa i paret ki i annan en keksoz ki vreman mal ki pe arive avek lasosyete, konmsi en lafors pe anmenn limanite ver dezas?

Remarke lekel ki Labib i dir i par deryer sa bann problenm ki nou pe gannyen ozordi: “Sa gro dragon, ti ganny zet ater. Limenm li sa serpan lantikite, ki apel dyab ou satan, e ki tronp lemonn antye. I ti ganny zete lo later, e son bann lanz ansanm avek li . . . Me maler, later ek lanmer, parski dyab in desann kot zot avek en gran lakoler, akoz i konnen ki i reste li ankor zis en pti pe letan.” (Revelasyon 12:9, 12) Apre ki nou’n egzamin sa levidans, bokou dimoun i remarke ki Satan i en personnaz envizib ki danzere, i pe fer en kantite pou enfliyans dimoun partou dan lemonn otour nou.

Petet ou pe mazinen ki mannyer ou kapab ganny proteksyon. I pa drol pour ou trakase. Sa lot lartik pour donn ou led pratik.

[Not anba lo paz]

[Portre lo paz 4]

Konversasyon Satan avek Bondye ti anmenn bann vre konsekans lo Zob