EN KONVERSASYON AVEK EN VWAZEN

Akoz nou devret komemor lanmor Zezi?

Sa konversasyon ki swiv i enn ki Temwen Zeova i kapab gannyen avek en vwazen. Meton en Temwen ki apel Megan in vin kot lakour en madanm ki apel Shirley.

“FER SA AN MON MEMWAR”

Megan: Alo Shirley. Mon ti vreman kontan vwar ou vin asiste Memoryal lanmor Zezi Kri semenn pase. * Ki mannyer ou’n vwar sa renyon?

Shirley: Mon ti byen kontan pour vini, me fransman mon pa ti konpran tou keksoz ki ti ganny dir. Mon konnen ki dimoun i fet nesans Zezi pandan Nwel ek son rezireksyon pandan Pak, me mon pa’n zanmen konn personn ki komemor son lanmor.

Megan: I vre ki Nwel ek Pak i bann lafet ki popiler partou dan lemonn. Me Temwen Zeova i santi ki i enportan pour rapel lanmor Zezi. Si ou annan detrwa minit, mon ti pou kontan montre ou akoz ki nou fer sa.

Shirley: Oke.

Megan: Anfet, Temwen Zeova i komemor lanmor Zezi akoz i ti demann son bann disip pour fer li. Annou vwar kwa ki ti arive sa zour swar avan Zezi ti mor. Eski ou’n deza tann konsernan en repa spesyal ki i ti pran avek son bann disip fidel?

Shirley: Ou pe dir sa repa Lapak?

Megan: Sanmenm. I osi apel Repa Senyer. Pandan sa repa, Zezi ti donn son bann disip bann lenstriksyon byen kler. Silvouple, ou kapab lir son bann parol dan Lik 22:19?

Shirley: Oke. “Apre i ti pran dipen, e apre ki i ti’n remersi Bondye, i ti kas li an morso e i ti donn zot an dizan, ‘Sa i mon lekor ki’n ganny ofer pour zot. Fer sa an mon memwar.’”

Megan: Mersi. Remark byen sa lenstriksyon ki Zezi ti donnen dan dernyen fraz sa verse: “Fer sa an mon memwar.” Zis avan ki i ti demann son bann disip pour rapel li, Zezi ti fer li kler konsernan kwa ki zot ti devret rapel lo li. I ti dir ki i ti pou donn son lavi pour son bann disip. Zezi ti dir sanmenm dan Matye 20:28. Sa verse i dir “Fis-de-Lonm pa’n vin pour ganny servi, me pour servi e donn son lavi konman pri pour liberasyon bokou dimoun.” An bref, se pour sa rezon ki tou le-z-an Temwen Zeova i zwenn ansanm zour Memoryal lanmor Zezi, pour rapel sa sakrifis ranson Zezi. Atraver son lanmor, tou bann imen ki obeisan i kapab ganny sove.

AKOZ NOU TI BEZWEN EN RANSON?

Shirley: Mon’n tann dimoun dir ki Zezi in mor pour ki nou kapab ganny sove. Me fransman, mon pa’n zanmen konpran ki mannyer sa ti posib.

Megan: Pa zis ou Shirley. Sa topik konsernan sakrifis ranson Zezi i vreman profon. Me an menm tan i enn parmi bann pli zoli lansennyman dan Parol Bondye. O kontrer, i oke pour nou kontinyen koze?

 Shirley: Wi i oke li.

Megan: Bon. Mon fek pe lir lo ranson e mon pou esey eksplik li dan en fason senp.

Shirley: Oke.

Megan: Premyerman pour konpran sa ranson, nou bezwen byen konpran sityasyon ki Adan ek Ev ti met zot lekor ladan, kan zot ti fer pese dan zarden Edenn. Pour ed nou konpran kwa ki sa sityasyon ti enplike, annou lir ansanm Romen 6:23. Eski ou ti a kontan lir sa verse?

Shirley: Oke. I dir: “Rekonpans pour pese i lanmor, me don gratwit ki Bondye i donnen i lavi eternel dan Kris-Zezi nou Senyer.”

Megan: Mersi. Annou egzamin sa ki nou’n lir. Premyerman, gete ki mannyer sa verse i konmanse: “Rekonpans pour pese i lanmor.” Sa i en senp lareg ki Bondye ti met an plas o konmansman listwar imen, sa rekonpans oubyen pinisyon pour pese i lanmor. Byensir, o konmansman personn pa ti fer okenn pese. Adan ek Ev ti ganny kree dan en fason parfe e tou zot zanfan ti pou’n ne parfe. Alor, ti pou napa okenn rezon pour dimoun mor. Adan ek Ev ek tou zot desandans ti annan sa posibilite pour viv eternelman dan lazwa. Me nou konnen ki keksoz pa ti deroul koumsa, pa i vre?

Shirley: Me wi, Adan ek Ev ti manz sa fri ki Bondye ti defann zot manze.

Megan: Egzakteman. Kan zot ti fer sa, Adan ek Ev ti swazir pour dezobei Bondye alor zot ti fer pese. Anfet, zot ti swazir pour vin enparfe, pour vin bann peser. Sa swa ti anmenn bann konsekans byen grav pa zis pour Adan ek Ev me osi pour zot desandans.

Shirley: Ki ou pe esey dir?

Megan: Ma donn ou en legzanp. Dir mwan, eski ou kontan fer gato?

Shirley: Wi! Mon kontan.

Megan: Dizon ki ou’n ganny en zoli moul nef. Me avan ki ou ganny sans pour servi li, i bat ater e ganny en defo. Alor, kwa ki pou arive avek okenn gato ki ganny fer dan sa moul? Pa zot osi zot pou annan sa menm defo ki sa moul?

Shirley: Me wi!

Megan: Dan menm fason, kan Adan ek Ev ti swazir pour dezobei Bondye, zot ti ganny sa defo oubyen “tas” atraver pese ek lenperfeksyon. Vi ki zot ti vin peser avan ki zot ti ganny sans pour fer zanfan, tou zot bann zanfan ti pou ne avek sa menm defo. Zot tou zot ti pou ne dan sa leta pese. Dan Labib, sa mo “pese” pa zis vedir en aksyon me i enkli sa kondisyon ki nou’n erite. I vre ki nou pa’n fer okenn keksoz mal, akoz nou pa ti ankor ne ler sa ti arive. Selman kan Adan ek Ev ti fer pese, zot ti kondann nou ek tou zot bann desandans ensi ki nou desandans pour viv en lavi enparfe dan pese ki ti pou fini avek lanmor. Zis parey nou lir dan Romen 6:23, konsekans pour pese i lanmor.

Shirley: Me sa pa zis. Akoz tou imen i bezwen soufer pour touzour zis akoz pese Adan ek Ev?

Megan: Ou annan rezon, i pa zis. Me i pa fini la. Dan son lazistis parfe, Bondye ti predir ki Adan ek Ev i devret mor pour zot bann pese, me i pa ti pou les nou konman zot bann desandans san okenn lespwar. Bondye ti fer en fason pour nou sorti dan sa sityasyon. Se la ki sakrifis ranson Zezi i annan son lenportans. Annou get ankor Romen 6:23. Apre ki i dir “rekonpans pour pese i lanmor,” sa verse i dir: “Me don gratwit ki Bondye i donnen i lavi eternel dan Kris-Zezi nou Senyer.” Alor, se lanmor Zezi ki liber nou dan pese ek lanmor. *

 SA RANSON​—PLI GRAN DON GRATWIT KI BONDYE I DONNEN

Megan: I annan en lot detay dan sa verse ki mon ti a kontan koz lo la.

Shirley: Kisisa?

Megan: Get byen sa ki sa verse i dir: “Don gratwit ki Bondye i donnen i lavi eternel dan Kris-Zezi nou Senyer.” Alor, si Zezi ti sa enn ki ti soufer e mor pour nou e donn son lavi pour nou, akoz ki sa verse i koz lo sa ranson konman “don gratwit ki Bondye i donnen”? Akoz i pa dir “don gratwit ki Zezi i donnen”? *

Shirley: Mmm. Mon pa tro asire.

Megan: Anfet, Bondye ti kree Adan ek Ev e zot ti fer pese kont Bondye kan zot ti dezobei dan zarden Edenn. I ti bezwen vreman sagren ler son de premye zanfan imen ti rebel kont li. Me deswit Zeova ti trouv en solisyon. * I ti fer plan pour enn son bann kreatir spirityel vin lo later, viv konman en imen parfe e finalman donn son lavi konman en sakrifis ranson. Alor, sa ranson ti vreman en don sorti kot Bondye. I annan en lot fason osi ki sa ranson ti en don sorti kot Bondye. Eski ou’n deza mazinen ki mannyer Bondye ti santi ler Zezi ti ganny met a mor?

Shirley: Non, mon pa’n deza mazin lo la.

Megan: Mon vwar detrwa pti zouzou la anba lavarang. I bezwen ki ou annan zanfan.

Shirley: Wi mon annan de, en pti garson ek en pti fiy.

Megan: Konman en paran, zis mazinen ki mannyer Zeova, Papa Zezi dan lesyel, ti bezwen santi zour ki Zezi ti mor. Andotmo, ki mannyer I ti santi ler I ti vwar son Garson presye lo later pe ganny arete, boufonnen e ganny koudpwen? Ki mannyer Papa ti santi anmezir son Garson ti ganny kloute lo en poto dibwa e ganny les koumsa pour soufer en lanmor kriyel?

Shirley: I ti bezwen vreman fermal pour li get sa. Mon pa’n deza mazin lo sa oparavan!

Megan: Byensir, i enposib pour nou dir egzakteman ki mannyer Bondye ti santi sa zour. Me sa ki nou konnen se ki I annan santiman e nou osi konnen akoz I ti les tousala arive. I’n ganny byen eksplike pour nou dan en verse ki bokou dimoun i konnen, sa i Zan 3:16. Ou kapab lir li silvouple?

Shirley: Wi. I dir: “Bondye in telman kontan lemonn ki i’n donn son sel Garson, pour ki nenport ki, ki krwar dan li, pa pou mor, me i a ganny lavi eternel.”

Megan: Mersi. Get ankor konmansman sa verse. I dir: ‘Bondye in kontan lemonn.’ Sanmenm sa keksoz prensipal, lanmour. Lanmour in pous Bondye pour anvoy son Garson lo later pour mor pour nou. An realite, sa sakrifis ranson i sa pli gran lekspresyon lanmour ki’n deza ganny demontre. Se pour sa rezon ki Temwen Zeova i zwenn ansanm sak lannen pour komemor Memoryal lanmor Zezi. Eski sa pti diskisyon in ed ou?

Shirley:Wi i’n byen ed mwan. Mersi pour pran ou letan pour pas lo tousala avek mwan.

Eski ou annan bann kestyon lo serten topik lo Labib? Eski i annan keksoz ki ou ti a kontan konnen lo krwayans oubyen aktivite bann Temwen Zeova? Si i le ka pa ezite pour demann en Temwen Zeova. I pou kontan pour donn ou plis lenformasyon.

[Not anba lo paz]

[Ekstre lo paz 11]

Sakrifis ranson i sa pli gran lekspresyon lanmour ki’n deza ganny demontre