Petet ou deza konnen ki en ladyet ki pa balanse i pa bon pour ou lasante. Bann zenn ki pa an bonn sante pou vin bann adilt ki pa an bonn sante, alor i bon pour devlop en bon labitid manz byen depi la konmela menm.

•  Kwa sa en ladyet balanse?

•  Ki mannyer mon kapab toultan annan en ladyet balanse?

•  Ki lezot zenn i dir?

Labib i dir nou devret “annan kontrol dan tou keksoz” e sa i enkli kontrol dan nou ladyet. (1 Timote 3:11) Avek sa prensip antet, i bon pour konnen ki . . .

• En ladyet balanse i enkli manz tou le senk group manze: Sa senk group manze i enkli prodwi dile, protein, fri, legim ek bann legren. Serten dimoun i deside pour pa manz enn oubyen plis dan sa group manze akoz zot krwar sa pou fer zot perdi pwa. Me sa i kapab fer ou lekor mank bann eleman ki i bezwen.

  Esey sa: Fer resers oubyen koz avek ou dokter pour aprann plis lo benefis sa bann diferan group manze. Par egzanp:

  Bann manze ki ris dan idratkarbonn oubyen carbohydrates i kapab donn ou lenerzi. Bann manze ki ris dan protein i kapab ed ou lekor lalit kont lenfeksyon e osi devlop e repar bann misk. Serten lagres, me en kantite ki rezonnab, i kapab menm redwir risk pour ganny maladi leker e fer ou santi ou byen.

  “Mon eseye pour manz bann manze dan tou group manze. E osi, mon pa krwar i mal pour manz en bar sokola oubyen en manze gra parfwa. Me i pa devret annan zis sa dan ladyet en dimoun. I toultan bon pour manz avek moderasyon.”​—Brenda.

• En ladyet balanse i pa enn ki al lo ekstrenm. Setadir, pa manz ase, manz tro bokou oubyen pa manz ditou bann pti keksoz ki ou kontan.

  Esey sa: Pour sa mwan, gard en rikord bann keksoz ki ou manze. Ki kantite fwa ki ou fer enn sa bann keksoz ekstrenm ki’n ganny mansyonnen anler? Ki azisteman ou kapab fer pour annan en ladyet balanse?

  “I ti annan zour kot mon ti pe manz tro bokou bann manze ki annan en kantite kalori ladan e bann zour kot mon ti pe manz manze ki annan zis en pti gin kalori. Finalman, mon ti deside pour aret kont bann kalori ki mon manze, aret toultan veye si mon manz tro bokou e aret manze ler mon santi mon vant i plen. I ti pran en pe letan, me aprezan mon annan en ladyet balanse.”​—Hailey.

• Reflesir avan ou deside. Labib i dir: “Plan sa enn ki aktif i fer li vin ris; me sa enn ki azir an vites pour konn lapovrete.” (Proverb 21:5) Savedir, pour reisi annan en bon labitid pour manz byen, ou bezwen fer en plan.

  “Ou bezwen fer plan pour byen manze pour ou pli an bonn sante e souvandfwa ou bezwen prepar bann bon manze kot lakour. Me avek letan i vo lapenn e i osi fer ou pa gaspiy larzan.”​—Thomas.

• Ranplas bann manze ki pa bon pour lasante par sa ki bon. Labib i dir: “Gard ou lizye fikse lo lasazes.” (Proverb 3:21) Lasazes pou ed ou trouv bann bon lide ek metod ki pou marse pour ou.

  “Tou le zour mon ti manz en manze ki bon pour lasante sante dan plas enn ki pa bon. Par egzanp, dan plas manz en sokola, mon ti manz en ponm. I pa ti pran bokou letan pour mwan konmans manz plizyer keksoz ki bon pour lasante dan en lazournen!”​—Kia.

• Gard en ekspektasyon rezonnab. Labib i dir: “Manz ou dipen avek lazwa e bwar ou diven avek en leker kontan.” (Eklezyast 9:7) En ladyet balanse pa vedir ki ou manze ki ou a fer. I pa ni menm vedir ki ou bezwen vey sak pti keksoz ki ou manze. Menm si ou bezwen perdi pwa, rapel ki ou lobzektif se ki ou manz bann keksoz ki pour bon pour lasante. Ou bezwen annan en ekspektasyon rezonnab avek ou lekor.

  “Resaman mon’n perdi 13 kilo, e pandan sa letan mon pa’n zanmen priv mon lekor manze, pa manz en kalite group manze, oubyen ankoler avek mon lekor akoz mon’n manz en deser. Mon ti aksepte lefet ki i ti pou pran en pe letan pour mwan megri e ki mon ti pou bezwen sanz mon bann labitid.”​—Melanie.