“Ler mon ti ankor lekol, si en dimoun ti dir i’n fer sèks, tou dimoun ti anvi fer parey. Napa personn ki anvi paret diferan.”​—Elaine, 21.

Eski ou’n deza santi ki ou bezwen fer sèks zis akoz i paret tou dimoun pe fer sèks?

Eski ou’n deza santi ki ou bezwen fer sèks akoz en dimoun ki ou kontan pe met presyon lo ou pour fer sèks?

Si wi, sa lartik pou ed ou reziste presyon. Ki swa presyon sorti kot lezot oubyen presyon sorti kot ou menm.

•  Fo konsep ek laverite

•  Ki mannyer pour reziste presyon pour fer sèks

•  Ki lezot zenn i dir?

FO KONSEP: Tou dimoun pe fer sèks (zis mwan).

LAVERITE: En serve ti montre ki de dan trwa zenn aze 18 an i dir zot in deza fer sèks. Be sa i vedir ki en bon poursantaz zenn, 30 poursan zot pa’n fer sèks. Pa tou dimoun pe fer sèks.

FO KONSEP: Sèks pou fer nou relasyon vin pli for.

LAVERITE: Serten garson i kontan dir sa pour fors bann fiy pour fer sèks avek zot, me i pa vre. I ariv tro souvan kot en garson i kite avek en fiy apre ki zot in fer sèks. Sa i fer sa fiy vreman mekontan akoz i ti krwar ki sa garson ti anmoure avek li e i ti pou reste avek li. *

FO KONSEP: Labib i dir sèks i mal.

LAVERITE: Labib i koz an byen lo sèks, me i dir zis en msye ek madanm ki’n marye avek kanmarad ki kapab fer sèks.​—Zenez 1:28; 1 Korentyen 7:3.

FO KONSEP: Mon lavi pou mizerab si mon ekout Labib.

LAVERITE: Si ou espere ziska ki ou marye pour fer sèks, ou pou pli ere akoz ou pou napa okenn lenkyetid, regre ek lafreyer ki bann dimoun ki fer sèks avan maryaz i souvan gannyen.

A lafen dizour: I pa’n fer personn ditor pour esper maryaz avan fer sèks. Me bann ki’n fer sèks avan maryaz in ganny plizyer problenm.

• Annan lasirans dan sa ki ou krwar. Labib i dir ki bann dimoun matir in “aprann servi zot abilite pour zize pour zot kapab fer diferans ant sa ki byen ek sa ki mal.” (Ebre 5:14) I pa fasil pour lezot fors zot fer sa ki mal, akoz zot vreman asire dan sa ki Labib i dir.

  “Mon fer bokou zefor pour fer sa ki byen e pour annan en bon repitasyon. Mon fer sir ki mon pa met mwan dan en sityasyon ki pou gat sa.”​—Alicia, 16.

  Mazin lo sa: Ki kalite repitasyon ou ti a kontan annan? Eski i vo lapenn gat ou bon repitasyon zis pour fer plezir en dimoun?

• Reflesir lo konsekans. Labib i dir: “Sa ki en dimoun pe senmen, sanmenm ki i pou rekolte osi.” (Galat 6:7) Mazin ou dan lavenir, ki mannyer ou lavi e osi lavi sa lot dimoun pou kapab sanze si ou tonm dan sa presyon pour fer sèks. *

  “Souvan en dimoun ki’n fer sèks avan maryaz i santi li koupab, i annan regre e menm santi ki personn pa kontan li. Deplis i annan lansentman ki pa ti’n plàn oubyen posibilite ganny en maladi seksyel ki atrape.”​—Sienna, 16.

  Mazin lo sa: Liv Sex Smart i demande: “Si ou bann zanmi pe fer ou fer bann keksoz ki kapab met ou dan problenm, eski zot sa kalite dimoun ki ou devret pe pas letan avek oubyen zot sa bann dimoun ki devret donn ou konsey lo bann size enportan dan lavi?”

• Annan en pwennvi ekilibre. Problenm i pa avek sèks. Anfet, Labib i montre ki i en laspe dan relasyon en koup marye ki zot devret pran plezir ladan.​—Proverb 5:18, 19.

  “Sèks i form parti bann zoli keksoz ki Bondye in kree. I anvi ki nou pran plezir ladan, me selman dan fason ki i anvi, setadir dan maryaz.”​—Jeremy, 17.

  Mazin lo sa: Si en zour ou marye, ou pou kapab fer sèks. Ou pou kapab vreman pran plezir ladan, san fer fas avek sa bann move konsekans ki’n ganny mansyonnen pli boner.