МАТФЕЙ 13:24—26-мӗшӗсенче Иисусӑн сӑмахӗсене ҫырнӑ: «Ҫӳлти Патшалӑха ҫакӑнпа танлаштарма пулать. Пӗр ҫын хӑй хирне ырӑ вӑрлӑх акнӑ; ҫынсем ҫывӑрнӑ вӑхӑтра унӑн тӑшманӗ пынӑ та тулӑ хушшине пукра акса хӑварнӑ; калчи ӳссе пуҫ кӑларсассӑн, пукри те палӑрнӑ». Хӑш-пӗр ҫыравҫӑсем ҫакӑн пекки чӑнах та пулма пултарни пирки иккӗленеҫҫӗ. Анчах та римсен хальхи вӑхӑтченех упранса юлнӑ саккунсемпе ҫыхӑннӑ документсене пӑхсан, чӑнах та ҫапла пулма пултарни курӑнать.

Пӗр Библи словарӗнче акӑ мӗн каланӑ: «Ҫынна усалпа тавӑрас тесе ун ани ҫине ҫумкурӑк акакан... Рим саккунӗ тӑрӑх, преступлени тӑвакан шутланнӑ. Ҫак саккун пурриех ҫавнашкал ӗҫ сайра-хутра ҫеҫ пулманнине кӑтартса парать». Паллӑ юрист Аластэр Керр ӑнлантарса панӑ тӑрӑх, пирӗн эрӑри 533 ҫулта Рим императорӗ Юстиниан Дигестӑсем — Рим саккунӗсен пуххине тата паллӑ юристсем ҫырса кӑларнӑ ӗҫсенчи хӑш-пӗр шухӑшсене — пичетлесе кӑларнӑ (пирӗн эрӑри 100—250 ҫулсенче). Унта асӑннӑ юристсенчен пӗри, Ульпиан ятлӑскер, римсен патшалӑх деятелӗ Цельс пӑхса тухнӑ пӗр ӗҫ ҫинчен ҫырнӑ (Дигестӑсем, 9.2.27.14). Такам ҫын ани ҫине ҫумкурӑк акнӑ пулнӑ, лешӗн вара тыр-пулӗ пӗтнӗ. Дигестӑсенче палӑртнӑ тӑрӑх, хуҫа е уя арендӑна илекен фермер хӑйне шар кӑтартнӑшӑн тӑкаксене саккунпа шыраттарса илме пултарнӑ.

Рим империйӗнче ҫакнашкал усал ӗҫсем пулса иртни Иисус каласа кӑтартнӑ ӗҫ чӑнах та пулма пултарнине кӑтартать.