ˈDHƐ Eblö ˗nu ˗wo ˗lo ˈˈsɛ ˈö ˗Zlan ˗ya ˈˈplüün bho ˗an ˗dhɛ bhë ˗a ˈgü, ˗an ˗bha ˗kwɛ dhʋŋˈˈ ˗sü zü ˗yö ˗dɔ ˈkee˗ kë ˈˈtʋ̈ŋ waa ˗mlü ˈˈkan ˈˈtʋ̈ŋ ˗bha. ˗A ˈˈtʋ̈ŋ ˈö ˈˈdhʋ̈, ˗yö Sɛtanblö waa Ɔtɔblö ˈˈsu ˈwo ꞊dɛɛ ˗an ꞊zinŋgü.

Mɛn ˗nu ˗bha ˈˈsu ˗dhɛkpaɔyi dhʋŋˈˈ ˗sü ˗yö ˗kun ˗gban ˗sü ˈka ˗gbɔdë ˗bha. ˗Gbɔdë ˗ya ˗gban ˗dhɛkpaɔyi 29 ɛɛnˈˈ 30 ˗ya ʒiö ˗a ˗gbɔdë ˗ya ˈdho, ˈyö ˈwo˗ pö ˈˈsu ˗ya yö ˈko ˈˈdhiʋ̈. ꞊Waa˗ pö ˈwo ˗kwɛ dhʋŋˈˈ, ˗ya kë ꞊dhɛ ˗wo blɛɛˈˈ ˈˈtʋ̈ŋ ˈgü, ˗a blɛɛˈˈ ˈˈtʋ̈ŋ ˗dhɛ ˈö dɔ ˗a ˈˈpiʋ̈ bhë, ˈyö ˗tɔ ˗an ˗bha ˗kwɛ do yö ˈko ˈˈdhiʋ̈ ˈˈtʋ̈ŋ. ˗Wa ˗kwɛ dhʋŋˈˈ ˗sü ˈsü blɛɛˈˈ ˈˈtʋ̈ŋ ˗bha, ˗yö ˗kë ꞊gblɛɛn ˈö ˗ʒiö ˗a ˈka ˗a ˗dhɛ ˈwo˗ ꞊dhʋŋ ˗gbɔdë ˗bha ˗gban ˗sü ˈka bhë ˗a ˗ta. ˗A ˗dhɛ ˗kun ˗a ˗bha kö ˗kɔ ˈwo dho ˗a kë ˗a ˈka kö ˈˈtʋ̈ŋ ꞊plɛ ˈwo bhë ˗wo ˗an ˈdho ˈkwëë˗, ˗wa mɛɛnˈˈ. ˗A ˗wɔn ˈgü ˗wa ˗kwɛ dhʋŋˈˈ, ˗wo ˗dhɛkpaɔyi ˗nu ɛɛnˈˈ ˈˈsu do ˗da ˗a ˗ta. ꞊Waa˗ kë ꞊dhɛ ˗kɔ bhë ˗a ˈdhö, ˗an ˗bha ˗kwɛ zü ˗yö ˗dɔ ˈkee˗ kë ˈˈtʋ̈ŋ ˗bha ˈö˗ ˈˈdhiʋ̈ ˗yö ta ˗mlü ˈˈkan ˈˈtʋ̈ŋ ˗bha.

ˈˈKɛɛ Moizö ˗bha ˈˈtʋ̈ŋ ˈgü, ˗Zlan ˗ya ˗pö ö ˗dhɔkëmɛn ˗nu ˗dhɛ ꞊dhɛ ˗an ˗bha ö ˗dhɔkë ˗kwɛ zü ˗dho dɔ ˈˈsu ˈwo˗ Abibö ɛɛnˈˈ Nisan ˗kë bhë ˗a ˈgü. ˈˈSu ˗nu bhë ˈyö ˈkwa ˗an ˗dhɛ ꞊dɛɛ Masö waa Avlidhö. (Ex. 12:2; 13:4) ˈˈTʋ̈ŋ ˈö ˈˈdhʋ̈ ˗a ˈgü, ˗wo ˈˈklëënga ˗nu ˈˈkan ˗sü ˈwlaan˗ ˗kë.—Ex. 23:15, 16.

꞊Klaŋ ˈkpii˗ do ˈbha ˗ya ˗pö ꞊dhɛ ˈö kun ꞊kwɛŋzü, ˗ya kë ꞊dhɛ ˗wo ˗dho ˈˈsu do ˗da ˗an ˗bha ˗kwɛ dhʋŋˈˈ ˗sü ˗ta, ˗kɔ ˈwo˗ ˗kë ˗a ˗bha ˈwo˗ ˈwɔn dɔ ˈyaa kun ˈˈgbɩɩ˗. ˗Wo ˗kun Pakö ˈwlaan˗ kë ˗ni ˈgü Nisan ˈˈsu ˗dhɛkpaɔyi 14 ˈka kö ˗gbɔdë ˗ya yö ˈko ˈˈdhiʋ̈. ˗An dua ˗mü kö ˗wa kë ˈˈtʋ̈ŋ ˈö ˈˈɲënŋgüyi waa gbeŋyi ˗an ꞊duaan ˈdhö do ˗a ˈka bhë, ˗a ˈgü. ꞊Ya kë ꞊dhɛ ˗kɔ bhë ˗a ˈdhö, ˗wa ˗kwɛ dhʋŋˈˈ ˗sü zübho ˈˈtʋ̈ŋ ˈö bhë ˗a ˗bha, ˗yö dɔ kö Nisan ˈˈsu ˗dɛɛ ˗yö ˗gban, ˗wo ˈˈsu do ˗da ˗a ˗ta.

ˈˈTʋ̈ŋ dhʋŋˈˈ ˗kɔ do ˈö bhë ˈyö Zoova ˗bha ꞊Gbɛkiö ˗nu ˗wo to ˗a ˈˈpiʋ̈ ˈyö ˈwo Dëmɛn ˗bha ˗bhöpë ˗dhɛkpaɔyi ˈö bhë ˗a ˗ya, kë ˈˈdhʋ̈ kö ˗yö ˗bɛ Nisan ˈˈsu ˗dhɛkpaɔyi 14 ˈö Zuifö ˗nu ˗bha kadhaŋdrie ˈgü bhë ˗a ˗bha. ꞊Ya kë ˈˈdhʋ̈, ˈyö ˈwo ˗dhɛkpaɔyi ˈö bhë ˗a pö ˗zlanwokɔdhi ˈˈpɛpɛ ˈwo ˈˈkpɔnŋtaadhɛ ˗todhʋ̈sü ˈgü ˗an ˗dhɛ. *

ˈˈKɛɛ ˈˈsu ˈdho˗ ˗gban ɛɛnˈˈ ˗yö ˈdho˗ ga, Eblö ˗nu ˗wa ˈwɔn ˗dɔ ˗kɔ ˗kë ꞊dhɛ? ꞊Dɛɛ ˈkwa ˗dhɛ ˗ga kadhaŋdrie ˈsëëdhɛ ˗ta ɛɛnˈˈ kwa ˗bha parɛ ˗nu ˈgü, kwa ˗to mü ˈkwa˗ ˈwɔn dɔ. ˈˈKɛɛ Biblö ˗ya ˈˈtʋ̈ŋ ˈgü ˈyaa kun ˈˈdhʋ̈.

Noe ˗bha ˈˈtʋ̈ŋ ˈgü, ˗dhɛkpaɔyi 30 ˗ya ʒiö ˈyö mɛn ˗nu ˗wa pö ˈˈsu ˗ya yö ˈko ˈˈdhiʋ̈. (ˈWun. 7:11, 24; 8:3, 4) ˈˈKɛɛ ꞊taabha Eblö ˗nu ˗bha kadhaŋdrie ˈgü, ˗an ˗bha ˈˈsu dhʋŋˈˈ ˗sü ˈyaa kun ˗gban ˗sü ˈka ˗dhɛkpaɔyi 30 ˗bha. ˗Wo ˈˈsu dhʋŋˈˈ ˗sü zübho kö ˗gbɔdë ˗dɛɛ ˗ya ˗gban. ꞊Ya kë ˈˈdhʋ̈, ˗an ˗bha ˈˈsu do ˗yö ˗kë ˗dhɛkpaɔyi 29 ɛɛnˈˈ 30 ˈka.

ˈˈTʋ̈ŋ do ˈbha ˈka Davi waa Ʒonatan ˗wo ˈˈsu ˗dɛɛ ˗bha ˗gban ˗sü ˗wɔn ˗blɛɛ ˈwo˗ pö: «Dhiʋ̈ˈˈ, ˈˈsu ˗dɛɛ ˗dho ˗gban.» (1 Sam. 20:5, 18) ˗Yö ˗kë ꞊dhɛ ˈdhɛ ˈˈtʋ̈ŋ ˈbha ˗yö ˗wo, ˗wo ˈˈsu ˗nu ˗to ˈˈdhiʋ̈ ˈwo ˗ya ˗an dhʋŋˈˈ ˗sü ˗bha. ˈˈKɛɛ Izraɛdhömɛn ˗nu ˗wa ˗kë ꞊dhɛ ˈyö ˈwo ˈˈsu ˗dɛɛ ˗gban ˈˈtʋ̈ŋ dɔ? ˈSëëdhɛ ˗be do ˈwo˗ ˗dhɛ Mishna ˈö Zuifö ˗nu ˗bha ˈtɔŋ˗ waa ˗an ˗bha wɔkɔ ˗nu ˈwo˗ ˈgü, ˗yö ˈwɔn ˈö ˗gban ˗a ˗bha ˗a ˗blɛɛ. ˗Yö ˗zɔn ˗sü ˈka ˗a ˈgü ꞊dhɛ ˈdhɛ Zuifö ˗nu ˗wo go ˈˈgan ˈgü ˈwo nu, ˗an ˗bha zakanmɛn ˗nu ˗wo ˗ya ˈˈsu dhʋŋˈˈ ˗sü ˗bha. ˈˈSu ˈˈsɔɔplɛ ˈwo kun ˗an ˗bha ˈwlaan˗ ˗nu kë ˈˈtʋ̈ŋ ˈka bhë ˗an ˈgü, zakanmɛn ˗nu ˗wo ˗dho wo ˈkwëë˗ ˗a ˗dhɛkpaɔyi 30 ˗bha ˗naan ˈka. Wo ˈnën ˈwo ˈˈtʋ̈ŋ ˈö ˈˈsu ˗dɛɛ dho yö ˗a ˈka ˈko ˈˈdhiʋ̈ ˈwo˗ pö. ˗Mën ˈö ˈwo ˗gban ˗a ˗ta ˈyö ˈwo˗ pö?

˗Wo mɛn ˗nu ˗bɔ ˗tɔn ˗ta ˗dhɛ ˗nu ˗bha Zedhizadhɛmö ˗pö ˗züzü ˈwo ˗ya mü, kö ˗wo wo ˈˈɲan kë ˗gbɔdë ˗dɛɛ ˗bha ˗gban ˗sü ˗gɔ. ꞊Ya kë ˈˈdhʋ̈ ˈyö ˈwo zakanmɛn ˗nu ꞊kpɔɔ ˈzozodhö. ꞊Waa˗ yö ꞊dedewo ꞊dhɛ ˗gbɔdë ˗dɛɛ ˗ya ˗gban, ˈyö ˈwo˗ pö mɛn ꞊gban ˈˈpɛpɛ ˗dhɛ ꞊dhɛ ˈˈsu ˗dɛɛ ˗ya ˗gban. ꞊Ya kë ꞊dhɛ ˈˈdhuu ɛɛnˈˈ dha kpö ˗ya yö ˗gbɔdë ˗dɛɛ ˈö bhë ˗a ˗ta, ˗dhɛgamɛn ˗nu ˈˈɲan ˈti˗ yö ˈzodhö ꞊wɛ, ˗wa ˗kë ꞊dhɛ? ꞊Ya kë ˈˈdhʋ̈, ˈyö ˈwo˗ pö  ˈˈsu ˈdhɛ bhë ˗a ˗dhɛkpaɔyi ˗dho kë 30, ˈyö ˈwo ˗ya ˈˈsu ˗dɛɛ ˗dhɛkpaɔyi dhʋŋˈˈ ˗sü ˗bha.

ˈSëëdhɛ ˗be ˈwo˗ ˗dhɛ Mishna bhë ˗ya ˗pö ꞊dhɛ zakanmɛn ˗nu ˗wo ˗ya ˗mɔn ˈˈsu ˗dɛɛ ˗gban ˈˈtʋ̈ŋ ˗bha, ˈyö ˈwo dho Odhivö ˗tɔn ˈö Zedhizadhɛmö ˗pö ˈˈsuee bhë ˗a ˗ta ˈwo ˈˈwo ˗ya mü, kö ˗yö kë ˗a ˗pö ˈˈsɛgümɛn ˗nu ˗dhɛ ˗sü ˈka. ꞊Ya kë ˈˈdhʋ̈, ˗dhɛ ˈbha ˗nu ˈgü ˈzü Izraɛdhö ˗sɛ ˈgü, ˗wo ˈˈwo ˗ya ˈpö kö wa blɛɛˈˈ mɛn ˗nu ˈwo to ˗an ˗dhɛ. ˗Wa wo bo, ˈyö ˈwo mɛn ˗nu bɔ ˗dhɛ ꞊gban ˈgü, kö ˗wa ˗nɔɔn pö. ꞊Ya kë ˈˈdhʋ̈, ˈyö Zedhizadhɛmömɛn ˗nu waa mɛn ˈˈpɛpɛ ˈwo Izraɛdhö ˈwo˗ ˈwɔn dɔ ꞊dhɛ ˈˈsu ˗dɛɛ ˗ya ˗gban, ˈyö ˗an ˗bha ˈwlaan˗ ˗nu kë ˈˈtʋ̈ŋ ˗ya ˗wo, ˗an ꞊gban ˈˈpɛpɛ ˗wa zübho wo ˈˈkwöö.

Ka ˗dho ˗kpan pë ˈˈbin ˈbha ˈö dho ka ˗takun kö ˗kɔ ˈö Eblö ˗nu ˗bha ˈˈsu ˗nu, ˗an ˗bha ˈwlaan˗ ˗nu waa ˗an ˗bha ˈˈtʋ̈ŋ ˗nu kun ˗a ˈka, ˈka˗ ˈgüman ˗së ˈka ˗a ˗bha.