A yelmeŋɛ Naaŋmen la maale boma zaa. O ba taa piilee, o daaŋ koŋ taa baaraa meŋ zaa. (Yieme 90:2) O zie ka a duorisoŋ naŋ be a Baabole poɔ na yi. (1 Timoti 1:11) Naaŋmen la ko te nyɔvore, azuŋ aseŋ ka te puoro ona yoŋ.​—Kanne Yel-iriwulaa 4:11.

 Nensaalaa zaa kyebe a daaŋ nyɛ Naaŋmen, bonso Naaŋmen eɛ vooroŋ poɔ Neɛ. Lɛ wuleeŋ ka nyɔvore na o naŋ taa na eɛ tegroŋ yaga zaa a gaŋ bonvobɔ naŋ taa eŋgama a be a teŋɛzuŋ na. (Gyɔɔn 1:18; 4:24) Aneazaa, te na baŋ nyɛɛ Naaŋmen gyogri a yi boma na oŋ maale na eŋɛŋ. Aŋa mannoo poɔŋ, tewɔmɔ ane flaware tɛɛtɛɛ naŋ bebe na wulee o nɔmmo ane o yɛŋ. Lɛ na a aŋdonɛɛ naŋ e kpoŋ seŋ na wulee o kpeɛ̃o.​—Kanne Urom 1:20.

 Ka teneeŋ maŋ kanna a Baabole te na wa baŋɛɛ Naaŋmen gyogri yaga zaa. Aŋa mannoo poɔŋ, a Baabole maŋ wuli teŋ yɛlɛ Naaŋmen naŋ boɔrɔ ane yɛlɛ o naŋ ba boɔrɔ. O maŋ lɛ wuli teŋ lɛ na Naaŋmen neŋ noba mine naŋ da laŋ e yɛlɛ, ane lɛ na oŋ da e o yɛlɛ saŋa na oŋ wa tuore yɛlɛ mine na.​—Kanne Yieme 103:7-10.

 Yezu yeleeŋ ka: “Te Saa naŋ be sazuŋ, vɛŋ ka ho yuori pɛgeyi.” (Matio 6:9) Aneazaa ka noba maŋ de la yodɔglɔ yaga boɔlɔ neŋ Naaŋmen, kyɛ Naaŋmen taaɛ yuori bonyeni yoŋ. Kɔkɔre zaa maŋ taaɛ lɛ na baŋ maŋ boɔle Naaŋmen yuori na. Dagaare kɔkɔre poɔŋ, ba maŋ boɔlooŋ ka “Jehoova.”​—Kanne Yieme 83:18.

 Noba mine iree Naaŋmen yuori na yi Baabolehi yaga poɔŋ, a kyɛ de yodɔglɔ aŋa Daana ane Naaŋmen eŋ ziiri na Naaŋmen yuori naŋ be na. Saŋa na baŋ da sɛgrɛ a Baabole na, ba da sɛgɛɛ Naaŋmen yuori na aŋa gbɛre 7,000 eŋ a Baabole  poɔŋ. Saŋa na zaa Yezu naŋ wa wulo noba Naaŋmen yɛlɛ na, o da maŋ vɛŋeŋ baŋ baŋ Naaŋmen yuori na.​—Kanne Gyɔɔn 17:26.

 Kaa a vidio, Naaŋmen Tarɛɛ Yuori?

 Lɛ na nensaaleba naŋ dire dɔgɛɛ yaga zaa na wuleeŋ ka Jehoova Naaŋmen ba taa te yɛlɛŋ bee? Noba mine maŋ yeliŋ ka Naaŋmen maŋ de la dɔgɛɛ erɛ te nyɛrɛ, kyɛ a yɛlɛ ŋa ba e yelmeŋɛ.​—Kanne Gyimisi 1:13.

 Naaŋmen ko la nensaaleba zaa apoɔsori ka ba kaa iri yɛlɛ ba naŋ boɔrɔ. Te poɔ pɛlɛɛŋ yaga zaa Naaŋmen naŋ ko te son-meŋɛ ka te maŋ kaa iri yɛlɛ te naŋ boɔrɔ. (Joosua 24:15) Kyɛ noba mine maŋ baŋeŋ perɛ a erɛ yelfaare, lɛ eebo maŋ vɛŋeŋ ka dɔgɛɛ bebe yaga zaa. A daŋkyagre ŋa maŋ vɛŋeŋ ka Jehoova poɔ sãã yaga zaa.​—Kanne Munpiilee 6:5, 6.

 Jehoova eɛ Naaŋmen naŋ taa te yɛlɛŋ. O boɔrɔŋ ka te wono noɔ̃ te zemmo poɔŋ. A koŋ kɔɔre o na iree dɔgɛɛ ane noba na zaa naŋ vɛŋ teŋ dire dɔgɛɛ na bare. Jehoova taaɛ ananso naŋ soma oŋ tere sori ka dɔgɛɛ bebe te saŋa ŋa. A yi Zannoo 8 poɔŋ, te na zannɛɛ bon nanso oŋ tere sori ka dɔgɛɛ bebe.​—Kanne 2 Piita 2:9; 3:7, 13.

 Jehoova yuo la sori ko te ka te maŋ tu puore sɔroo eŋɛŋ a tage peɛloo. Jehoova boɔrɛɛ te yeni yeni zaa yɛlɛ. (Yieme 65:2; 145:18) O maŋ eɛ siri ka o vɛŋ te yelfaare ko te. O nyɛrɛɛ moɔbo na zaa teŋ moɔrɔ ka te pɛlɛ o poɔ na, haali ka teneeŋ maŋ ŋmeɛrɛ gbɛɛ saŋa mineŋ. Aneazaa ka te eɛ noba naŋ ba pɛgeyi, kyɛ te neŋ Naaŋmen na baŋ nyɔgɛɛ niiloŋ naŋ e kpeɛŋaa.​—Kanne Yieme 103:12-14; Gyimisi 4:8.

 Jehoova la ko te nyɔvore, azuŋ aseŋ ka te nɔmoo a gaŋ neɛzaa. (Marko 12:30) Ka hooŋ moɔ̃ niŋe a zanna Naaŋmen yɛlɛ, lɛ wuleeŋ ka ho nɔmooŋ. Ka hooŋ lɛ moɔ̃ niŋe a erɛ yɛlɛ oŋ boɔrɔ, a na vɛŋeŋ ka ho tage peɛloo yaga zaa.​—Kanne 1 Timoti 2:4; 1 Gyɔɔn 5:3.