Jalea la ńolo di mapula kwala

• bia we̱lisane̱

• bia jalea bepuledi bo̱ngo̱

• bola bebolo o si to̱ndino̱

• se̱le̱ jombwea bane̱

Bana bena ba be̱n jalea la ńolo be ná ba banga bola lambo la bobe, to̱ e be̱ nde ná di mawanea babo̱ muńe̱nge̱ ma son a ponda. O diwengisan, e bo̱bi ná bana bena ba si be̱n jalea la ńolo

• ba be̱ eyango

• ba be̱ne̱ diboa la mo̱nge̱le̱

• ba ńo̱ sika, banga, to̱ belam buka dime̱ne̱

• ba be̱ ńai ni made̱ to̱ nje nde na o to̱ njika ponda nde

Muwaso mō̱ mu so̱i ná bato bena ba ta ba be̱ne̱ jalea la ńolo ke̱ ba dia bana ba si be̱n maboa jita, to̱ mutaka jita jombwea mo̱ni, ba mabupe̱ pe̱ mambenda m’ekombo. Mu muwaso mu tute̱le̱ mulēdi Angela Duckworth ńa Universite ńa Pennsylvania o kwala ná: “Be̱ne̱ la jalea la ńolo di titi bobe to̱ buńa.”

Bia kwala ná ke̱m, o je pe̱ o byala bo̱ngo̱.

BETE̱SEDI BA BIBE̱L: “Ese̱le̱ eyal’ańu e be̱ nde na: E, e; ke̱m, ke̱m.”​—Mateo 5:37.

Bana basadi be ná beya mbembe na te̱ misea, yen ebe oboso ba bato, o keka ńakisane̱ bayedi babu ná ba tukwe mo̱nge̱le̱. Bayedi ba boli te̱ babo̱ nje beno̱ o pula, bana be nde ná ba so̱ṅtane̱ ná tongwea na nika, be ná ba kusa nje ye̱se̱ ba mapulano̱.

Nde yete̱na muyedi a kwali ná ke̱m a ja pe̱ o byala bao, muna a mokwa ben belēdi ba mweńa ná di titi ná di kusa nje ye̱se̱ di mapulano̱. Do̱kita David Walsh a tili ná: “Nje ye mańaka ye nde ná, bato bena boko o be̱ne̱ jalea la ńolo nde be bonam buka ba bena ba si be̱n mo̱. Jese̱le̱ te̱ ná bana basu ba koke na jo̱nge̱le̱ ná be ná ba kusa nje ye̱se̱ ba mapulano̱, ke̱ di titi o lee̱le̱ babo̱ ndolo.” *

 O bangi te̱ o sebea mun’ango̱ nje ye̱se̱ a mapulano̱ botea tatan, we nde o jongwane̱ mo̱ o bia banga mambo mō̱ ombusa ponda, ka mińakisan ma ńo̱ banga, wite̱ musonje, to̱ bola lambo la bobe dipe̱pe̱.

Ongwane̱ bana bo̱ngo̱ o so̱ṅtane̱ nje bedangwedi ba bwam to̱ ba bobe be mawanano̱.

BETE̱SEDI BA BIBE̱L: “Nje moto a masano̱, mo̱ pe̱ nde a mumbwano̱.”​—Galatia 6:7.

Mun’ango̱ angame̱n so̱ṅtane̱ ná lambo te̱ moto a mabolano̱ di be̱n musawedi, na ná si be̱ne̱ la jalea la ńolo di mawana betune̱. K’eyembilan, mun’ango̱ a le̱le̱m te̱ o linga, bato be ná ba kumwa ńa mo̱ mīla. Nde, oko te̱ o jalea ńolo ke̱ ba kumo mo̱, a be̱ pe̱ ńai ni si make̱ bane̱ bwambo, bato ba me̱nde̱ to̱ndo̱ mo̱. Ongwane̱ mun’ango̱ o so̱ṅtane̱ ná longe̱ di me̱nde̱ wamea mo̱ yete̱na a be̱n jalea la ńolo.

Okwe̱le̱ mun’ango̱ o bia jemba mamboma be̱n epol’a boso.

BETE̱SEDI BA BIBE̱L: ‘Emba ma menama te̱nge̱n.’​—Filipi 1:10.

Jalea la ńolo di titi buka te̱ banga bola lambo la bobe, nde bola pe̱ mambo me mweńa, to̱ e be̱ nde ná ma si mabwesane̱ muńe̱nge̱. Ye mweńa ná mun’ango̱ okwe o bia njika mambo ma be̱n epol’a boso, na bola pe̱ mo̱. K’eyembilan, angame̱n bola bebolo bao b’esukulu obiana a mala o loko.

Be̱ eyembilan a bwam.

BETE̱SEDI BA BIBE̱L: “Na boli nde bińo̱ eyemban, ná bińo̱ pe̱ lo bole kana na boledino̱ bińo̱.”​—Yohane 13:15.

Mun’ango̱ a me̱ne̱ ne̱ni o mabolano̱ ke̱ lambo di lingise̱ wa. Tongwea n’eyembilan ango̱, lee̱ mun’ango̱ ná jalea la ńolo di mawana minam. K’eyembilan, mun’ango̱ a boli te̱ lambo la bobe, o mońa nde na malinga nga o malea ńolo e?