Ńamuloloma Paulo a tiledi Timoteo nu ta mutudu ka mo̱ ná: “Na makwalane̱ wa na iwiye̱ oboso ba Loba na oboso ba Kristo Yesu na oboso ba Ange̱l i po̱so̱be̱ ná o ne̱nge̱ man esibe̱ jombwea moto, o si bola pe̱ to̱ lambo ka mute̱me̱ye̱ mudi mō̱.”—1 Tim. 5:21.

Ka laboso, ná di bie ba nja be yi ange̱l, di me̱nde̱ je̱ne̱ ba nja ba titi ná ba be̱ yi ange̱l. E me̱ne̱ne̱ na bwē ná yi ange̱l i titi yi ye o muso̱ngi ma 144 000. Ponda Paulo a tiledino̱ Timoteo, bepumbwedi ba kriste̱n yo̱kisabe̱ be si ta be mábotea. Bamuloloma na bane̱ bo̱kisabe̱ ba si ta ba mátimba bewekedi ba mudī, ba si wusa so̱ be̱ yi “ange̱l i po̱so̱be̱”.—1 Kor. 15:50-54; 1 Tes. 4:13-17; 1 Yohane 3:2.

Yi “ange̱l i po̱sobe̱” i titi pe̱ ná i be̱ yi ange̱l a pamo yena i ta o pond’a mpupe ma dibumbe. Yi ange̱l i sue̱le̱ nde Satan na mo̱ i timba midī ma bobe, yena Yesu a tano̱ a te̱nge̱ne̱. (Bbot. 6:2; Lukas 8:30, 31; 2 Pet. 2:4) O mińa mi maye̱, i me̱nde̱ kwesabe̱ o njiba ońola 1000 a mbu, ombusa ponda i ńamsabe̱ mwemba na Diabolo.—Yuda 6; Bbī. 20:1-3, 10.

Yi “ange̱l i po̱so̱be̱” yena Paulo a kwaledino̱, i ta nde yangame̱n be̱ ange̱l ye o mo̱ń, yena i sue̱le̱ “Loba na Kristo Yesu,” y’epas’a Bibe̱l e makwalea ońola babo̱ babane̱.

Lokoli na lokoli la ange̱l a jemea ye. (Bon. 12:22, 23) Di s’angame̱n jo̱nge̱le̱ na ye̱se̱ i be̱n mulemlem m’ebolo o mulemlem ma ponda. (Bbī. 14:17, 18) O̱nge̱le̱ ná ngedi po̱, ange̱l po̱ na mune nde e lomabe̱ o bwa 185 000 ya sonj’a bila ya Asiria. (2 Ki. 19:35) Muso̱ngi munde̱ne̱ ma ange̱l mu lomabe̱ o “dubwa malambi me̱se̱ o janea la [Yesu] mwemba na be̱se̱ bena ba mabole̱ bobe.” (Mat. 13:39-41) Ipe̱pe̱ i lomabe̱ o “ko̱te̱le̱ ba bena ba po̱so̱be̱” o mo̱ń. (Mat. 24:31) Nde ipe̱pe̱ pe̱ i lomabe̱ o ‘tata biso̱ o mangea masu me̱se̱.’—Mye. 91:11; Mat. 18:10; ombwa Mateo 4:11; Lukas 22:43.

Pondapo̱ “ange̱l i po̱so̱be̱” kalat’a 1 Timoteo 5:21 e makwaleano̱ i ta nde ange̱l yena i lomabe̱ ońola bebolo ba tobotobo be mombweye tumba la Loba. O byala be dinge̱le̱ y’epas’a Bibe̱l, Paulo e o bola batudu malea ońola mbadi bangame̱nno̱ jombwea mwemba na ná ba bena be o mwemba bangame̱n bola batudu edube. O nje e mombweye̱ batudu, o ebol’abu, ba s’angame̱n “te̱me̱ye̱ o mudi mō̱,” ba s’angame̱n pe̱ to̱ no̱ngo̱ bedomsedi esibe̱ dutea. Njo̱m po̱ ńa mweńa ońola nje bangame̱nno̱ bupe̱ malea ma Paulo ńe nde ná ba mabolea nde “oboso ba Loba na Kristo Yesu na ange̱l i po̱sobe̱.” Nik’e malee̱ na bwē ná ange̱l iwo̱ i malomabe̱ o bola bebolo bō̱ be be̱n mulatako na mwemba, ka betatedi, jombwea la ebol’a dikalo, na bola la Yehova bolangi—Mat. 18:10; Bbī. 14:6.