OŃOLA BABAEDI
2: Mulatako
NJE NIKA E MAPULANO̱ KWALA
Mulatako mwe te̱ o diba, mome na munj’ao ba mabe̱ nde ka muduane̱ avion na mongwaned’ao be o wale̱ o mulemlem ma wuma. To̱ mitakisan mi po̱ nde, mubaedi to̱ mō̱ a si madutea ná “mba,” nde ná “biso̱.”
BETE̱SEDI BA BIBE̱L: “Ba si mabe̱ pe̱ so̱ baba, nde eyobo ewo̱.”—Mateo 19:6.
“Dia diwo̱ di si makaka dibomba. Mome na muto bangame̱n be̱ mulatako ná ba tongwe̱le̱ diba labu.”—Kristo̱f.
OŃOLA NJE NIKA ŃENO̱ MWEŃA
Myambo mi po̱i te̱, mome na muto bena ba titi mulatako ba le̱le̱m o numane̱le̱ njo̱m o mulopo ma wasa sangilane̱ mo̱. Bwambo bosadi bwe ná bo timba bonde̱ne̱.
“Mulatako nde mwe idubwan a diba. Biso̱ na mom’am di si be̱ te̱ mulatako, di wusa nde be̱ ka banange̱ o tuṅ po̱, nde seto̱ babaedi—bato baba bena ba maje̱ mwemba, nde bena ba titi jo̱nge̱le̱ diwo̱ ke̱ e po̱i ná ba no̱nge bedomsedi be mweńa.” —Alexandra.
NJE WENO̱ NÁ O BOLA
KEKA WAME̱NE̱
-
Mo̱ na me̱ne̱ nde mo̱ni na masombwano̱ ka “mam ma mbame̱ne̱” e?
-
Mo̱ nangame̱n panda na nu na baino̱ ná na longe̱le̱ ńolo e?
-
Mo̱ na mapanda na mbia ma nu na baino̱, to̱ná mo̱ eno̱ batabata na mo̱ e?
KWALA NA NU O BAINO̱
-
O njika mambo ma diba lasu jeno̱ mulatako e?
-
O njika mambo jangame̱nno̱ ńaka e?
-
Nje jeno̱ ná di bola ná di bate be̱ mulatako e?
MALEA
-
Dutea ná bińo̱ le o loko la duta la musinga, mō̱ ńanu te̱ e o mao mudi. Nje weno̱ ná o bola ná bińo̱ na mom’ango̱ to̱so̱ munj’ango̱ lo be̱ o mudi mō̱ e?
-
O mulopo ma dutea ná, ‘Ne̱ni neno̱ ná na buka e?’ dutea nde ná ‘Ne̱ni biso̱ babane̱ jeno̱ ná di buka e?’
“O si wasa bia nja nu te̱nge̱n to̱ nja nu kwedi muka. Nika e titi mweńa buka musango na mulatako weno̱ ná o be̱ne̱ o diba lo̱ngo̱.”—Etan.
BETE̱SEDI BA BIBE̱L: “To̱ mō̱ a s’ombwea mambo mao mo̱me̱ne̱, nde mambo ma bane̱ bape̱pe̱ pe̱.”—Filipi 2:3, 4.
