Nika bińo̱ leno̱ o botea longe̱ lańu mwemba, ńai na ńai a mitakisan mena mi po̱. Ońolana mbadi lokwabe̱le̱no̱ e mabola ná: mo̱nge̱le̱ mańu, besengedi bańu ba mulema na je̱ne̱ lańu la mambo ba be̱ diwengisan. To̱so̱ mitakisan mena mi wa o eboko to̱so̱ na muyo̱mbo̱ ma mambo.

We ná o pula samba kwalea ońola lambo to̱so̱ jenge̱le̱ ná bape̱pe̱ ba ye jongwane̱ bińo̱ o sangilane̱ bwambo, nde Bibe̱l e mome̱le̱ biso̱ ná jokwe lembe̱ mitakisan. (Mateo 5:23, 24) Bete̱sedi ba Bibe̱l nde be me̱nde̱ jongwane̱ wa sangilane̱ myambo o mbad’a bwam ni buki ye̱se̱ yete̱na o we̱le̱ mo̱ o ebolo.

NJE BIBE̱L E MAKWALANO̱: “Me̱se̱ ma te̱se̱be̱le̱ ponda . . . ponda ońola to̱po̱.” (Mulangwedi 3:1, 7) Wasa ponda ná lo kwaleye ońola nje e matakise̱ bińo̱ na te̱ite̱i. Tele̱ye̱ mom’ango̱ to̱so̱ munj’ango̱ nje ye̱se̱ ye wa o mulema na nje o mo̱nge̱le̱no̱ jombwea y’ekwali. Langwea mō̱ na nune̱ “mbale̱” ponda ye̱se̱. (Efeso 4:25) To̱ wońa nde na malinga, alea ńolo ná o s’ana. Jalabe̱ la muyao di meka ná tet’a ­ekwali e timbe mutango.—Minia 15:4; 26:20.

To̱ e be̱ nde ná lo titi so̱ṅtane̱le̱, be̱ muyao, o si dimbea lee̱le̱ munj’ango̱ to̱so̱ mom’ango̱ ndolo, o bole pe̱ mo̱ edube. (Kolose 4:6) Pomane̱ o sangilane̱ bwambo, lo si mińane̱ pe̱ to̱.—Efeso 4:26.

NJE WENO̱ NÁ O BOLA:

• Po̱so̱ ponda ni te̱nge̱n o kwalea ońola nje e matakise̱ bińo̱

• Pond’ao ńa kwala e po̱i te̱, o si ke̱ mo̱ bwambo o mudumbu, nde lambe̱ye̱ mo̱ toi. O me̱nde̱ to̱po̱ o ńo̱ngo̱ ponda

NJE BIBE̱L E MAKWALANO̱: “Bińo̱ bolane̱ muyao mō̱ na nune̱ . . . mō̱ te̱ a se̱le̱ bola nupe̱pe̱ edube.” (Roma 12:10) Mbadi o malambe̱no̱ toi ńe mweńa jita. Wasa so̱ṅtane̱ jo̱nge̱le̱ la mom’ango̱ to̱so̱ la munj’ango̱ na ‘ndedi . . . na sibise̱ la ńolo.’ (1 Petro 3:8; Yakobo 1:19) O si be̱ne̱ eladingo̱m a senga. Yete̱na nika ńena e we̱le̱ be̱, se̱le̱ jese̱le̱ nje weno̱ o bola ná o senge nje munj’ango̱ to̱so̱ mom’ango̱ a mapulano̱ lan­gwea wa, to̱so̱ baise̱ mo̱ nga bińo̱ lena lo kwala ponda nipe̱pe̱. We̱n te̱ munj’ango̱ to̱so̱ mom’ango̱ ka mwenj’ango̱ nde seto̱ ka mute̱nge̱ne̱ wa, o si me̱nde̱ “wamse̱ jońa na malinga.”—Mulangwedi 7:9.

NJE WENO̱ NÁ O BOLA:

• Benga lambe̱ye̱ mo̱ toi ńai weno̱ be̱be̱ o so̱ṅtane̱ mo̱, to̱ e be̱ nde ná nje eno̱ o kwala e si do̱lisan wa

• Wasa so̱ṅtane̱ jo̱nge̱le̱ le ombusa byala bao. Langa mabola ma ńol’ao nikame̱ne̱ pe̱ na ton ao ńa bwambo

NJE BIBE̱L E MAKWALANO̱: “Ntū na ntū mu mawana muse̱ṅ, nde byala ba tete be mawana nde mbo̱lo̱n.” ­(Minia 14:23) No̱ngo̱ la bedomsedi ba bwam le nde lambo diwo̱, bupe̱ la mo̱ pe̱ dipe̱pe̱. Nika e mabaise̱ ná o tingame̱ o nje lo domse̱no̱ bińo̱ babane̱. Nika e mapula ebolo jita na miwe̱n pe̱ jita, nde nika ńe muse̱ṅ. (Minia 10:4) Lo lati te̱ mā mańu o bola, lo me̱nde̱ ‘tombwane̱ ońola ntū mańu.’—Mulangwedi 4:9.

NJE WENO̱ NÁ O BOLA:

• Bińo̱ no̱ngo̱ bedomsedi ba nje mō̱ ńanu te̱ a me̱nde̱no̱ bola na te̱ite̱i o bwam ba sangilane̱ nje e matakise̱ bińo̱.

• Wasa bia ponda na ponda te̱ o ­njika dime̱ne̱ lo mápo̱no̱ o miwe̱n mańu