MO̱ MOT’A benama ena a tika be̱ jemea na Loba yete̱na a kekisabe̱ o dime̱ne̱ di sukan na yete̱na sengane̱ di me̱ne̱ne̱ ka biana di si mawana muse̱ṅ to̱ mō̱ e? Mu muedi mu ta mu baisabe̱le̱, mu kusa pe̱ jalabe̱, tongwea na moto nu ta nu belabe̱ na Hiob.

Bonaisrae̱l ba ta ba diya o Egipto, ke̱ Hiob, eyab’a Abraham a maja o mundi mu mabelabe̱ o we̱nge̱ ná Arabia. Buńa bō̱ ange̱l i tano̱ i ko̱to̱me̱ oboso ba Loba, ńa pamo Satan pe̱ a ta oteten’abu. Oboso ba jako̱to̱ne̱ la mo̱ń, na Yehova a pase̱le̱ lakisane̱ a be̱ne̱ne̱no̱ mūt’ao ńa jemea Hiob. Yehova a kwali nde ná mot’a benama to̱ mō̱ a si tingame̱ o dube̱ ka Hiob. Nde Satan a ka ná Hiob a mabolea nde Loba bukate̱ ońolana Loba a namse̱ mo̱ a matata pe̱ mo̱. Na Satan a ka ná yete̱na ba no̱ngo̱ne̱ Hiob mambo me̱se̱ aledino̱ a mato̱bo̱ Loba.

Loba a ta ese̱le̱ ná Satan a se̱le̱ sumwane̱ Hiob m’bwaṅ mao a bwe pe̱ bana bao to̱ denge̱ a mabóuse̱ mo̱. Esibe̱ Hiob bia ebolo Satan a tano̱ a be̱ne̱ o nje ye̱se̱ e ta e ko̱ye̱ mo̱, a si so̱ṅtane̱ ońola nje Loba ese̱le̱no̱ ná yin ndutu i ko̱ye̱ mo̱. To̱na nika Hiob a si to̱bi Loba tomtom.

Na mako̱m malalo ma titi mbale̱ ma po̱ye̱ Hiob. O mbupan ma bekwali be o kalat’a Hiob, ba bato ba keka o mbad’a bobe o bola Hiob ná emeye ná Loba e nde ko̱kise̱ mo̱ ońol’a myobe a bolino̱ o diwuta. Ba ka na mo̱me̱ne̱ ná Loba a si mado̱lisane̱ baboledi bao a si malakisane̱ pe̱ to̱ babo̱. Nde Hiob a banga di dutea labu la mpenga. Na Hiob a langwa na mbaki ná a me̱nde̱ tika tingame̱ o dube̱ lao nate̱na kwedi!

Nde Hiob a wusi ke̱ a mawasa lee̱le̱ buka dime̱ne̱ ná a tem ná sim. Elihu eso̱mb’a moto yena e ta e senga ekwali ye̱se̱, a to̱po̱ o tese̱ mo̱nge̱le̱ mabu. Elihu óbise̱ Hiob ońolana a subi jémba ná lingea doi la bianedi lāsam la Yehova Loba le mweńa jita buka lingea to̱ njik’a mot’a benama. Elihu a domea mako̱m ma Hiob ma titi mbale̱.

Na Yehova Loba a kwalisane̱ Hiob o tese̱ mo̱nge̱le̱ mao. Yehova a tuba mambo ma betańsedi ma bewekedi o jókwe̱le̱ Hiob bosadi ba moto kobisane̱ na bonde̱ne̱ ba Loba. Hiob a kasa belēdi ba Loba na sibise̱ la ńolo le̱se̱. Ońolana Yehova “a londi na bwam, a be̱n pe̱ na mulema ma ndedi,” a bo̱lise̱ Hiob, a bola mo̱ m’bwaṅ a se̱le̱no̱ be̱ne̱ ngedi ibā, a namse̱ pe̱ mo̱ na bola mo̱ dom la bana. (Yakobo 5:11) Na tingame̱ lao na Yehova o was’a makekisan mande̱ne̱, Hiob a boli jalabe̱ o ni pend’a Satan ńe nde ná bato ba benama ba titina ba tika be̱ jemea na Loba yete̱na ba we̱le̱be̱ o kekise̱.

​—Nika e se̱medi o kalat’a Hiob.