DONGO 17
Yesu a mókwe̱le̱ jombwea Janea la Loba
Yesu a mókwe̱le̱ bókwedi bao mambo jita, a mabolane̱ nde tema po̱ ńe nde Janea la Loba
OŃOLA nje Yesu a lomabe̱no̱ o wase e? Mo̱me̱ne̱ a kwali ná: “Nángame̱ne̱ pe̱ langwea mindi mipe̱pe̱ myango ma bwam ma janea la Loba; ebanja ońola nika nde na lomabe̱no̱.” (Lukas 4:43) Ombwea so̱ mambo mane̱i Yesu ókwe̱le̱no̱ jombwea di Janea di ta tem’a dikalo lao.
1. Yesu a po̱so̱be̱ ka Kiṅe̱. Yesu mo̱me̱ne̱ a kwali ná mo̱ nde e Mesia nu se̱le̱ bīsabe̱. (Yohane 4:25, 26) A lee̱ pe̱ ná mo̱ nde e Kiṅe̱ ńena muto̱pe̱ bedinge̱ Daniel e̱nno̱ o̱ jene̱. Yesu a ta a kwalisane̱ bamuloloma bao ná buńa bō̱ a me̱nde̱ ja o “bejedi ba bosangi” na ná babo̱ pe̱ ba me̱nde̱ ja o kond’a janea. (Mateo 19:28) A bele̱ di dibo̱to̱ la badiedi ná ‘dibemba lao disadi a kwali pe̱ ná a be̱n “mido̱ngi mipe̱pe̱” mena mi titi dongo la di dibo̱to̱.—Lukas 12:32; Yohane 10:16.
2. Janea la Loba di mawana te̱me̱ la sim la mbale̱. Yesu a kwali ná Janea di me̱nde̱ bo̱le̱ si te̱me̱ la sim di buki me̱se̱ tongwea na sangise̱ dina la Yehova Loba, na sumwa njo̱m ye̱se̱ yena Satan a numno̱ mo̱ botea o Ede̱n. (Mateo 6:9, 10) Yesu ókwe̱le̱ bome na bito, ba m’bwaṅ na ba tue, na nika, a lee̱le̱ pe̱ ná a titi ndando. To̱ ná ebol’ao a boso e ta no̱ nde ya jókwise̱ Bonaisrae̱l, óngwane̱ Bonasamaria nde na Basibi pe̱. O diwengisan la badiedi ba ebasi ba pónd’ao a si lee̱ ndando.
3. Janea la Loba di si mano̱ngo̱ dongo na nin wase. Yesu a ta nde longe̱ o pónd’a mpungu munde̱ne̱. Mundi mao mu ta o was’a bianedi ba ekombo a ngińa e pe̱pe̱. Nde nipóndá bato ba kekino̱ o so̱lise̱ mo̱ o bekwali ba politik ba mi mińa a we̱nge̱me̱ye̱ nde. (Yohane 6:14, 15) A langwea mudied’ekombo mō̱ ná: “Janea lam di titi la nin wase.” (Yohane 18:36) A langwea pe̱ bókwedi bao ná: ‘Lo titi ba wase.’ (Yohane 15:19) A si wusa jese̱le̱ babo̱ ná ba bolane̱ bewesan ba bila to̱ mo̱me̱ne̱ o jana ońol’ao.—Mateo 26:51, 52.
“A ta a yo̱mbo̱ o . . . mindi misadi, a to̱po̱, a langwa myango ma bwam ma janea la Loba.”—Lukas 8:1
4. Bediedi ba Kristo be se̱medi nde o ndolo. Yesu a kakane̱ ná a me̱nde̱ lo̱ko̱ bato na wamse̱ myuna mabu. (Mateo 11:28-30) A bupe̱ pe̱ byala bao. A boli malea ma ndolo na mena me muse̱ṅ jombwea ne̱ni we̱lisane̱ mutaka, pongulane̱ mulatako, janane̱ to̱ndo̱ la sango na wasa la bonam. (Mateo, bepasi 5-7) Ońolana a lee̱le̱ ndolo, klas’a bato ye̱se̱ i ta i sisea mo̱ be̱be̱. Dimuti la beye̱me̱ki ba bato pe̱ di ta di po̱ na mo̱, na nin mbaki ná a me̱nde̱ lee̱le̱ babo̱ muyao n’edube. A se̱ Mudied’a bwam Yesu a me̱nde̱no̱ be̱!
Mbadi nipe̱pe̱ ńa ngińa ńe, ńena Yesu a bolane̱no̱ o jókwe̱le̱ jombwea Janea la Loba. Ńe nde ná a boli jita la betańsedi. Ońola nje a bolino̱ nika e? Jombweye te̱ nika.
