Hali n’i be i seko bɛɛ kɛra walisa hɛɛrɛ ka kɛ i ka gwa kɔnɔ, barinanko dɔw be se ka cun aw kan. O be se k’a to i ka ninsɔndiya be nagasi (Waajulikɛla 9:11). O koo ɲɔgɔn na, Ala b’an dɛmɛ ni kanuya ye. Koow mana gwɛlɛya cogo o cogo, n’i be tugu Bibulu ka ladili nunu kɔ, e n’i ka denbaya bena se k’u muɲu.

BIBULU BE MIN FƆ: “Aw k’aw ka haminakow bɛɛ to a bolo, bari a be janto aw la.” (1 Piyɛri 5:7). Kana ɲinɛ abada ko i ka gwɛlɛyaw tɛ Ala nɔɔ ye (Zaki 1:13). N’i tora k’i magwɛrɛ Ala la, a bena i dɛmɛ cogo fisaman na (Ezayi 41:10). “Aw k’aw ka haminako yira a la.”—Zaburuw 62:9.

N’i be Bibulu kalan ani k’a sɛgɛsɛgɛ loon o loon, o bena i dusu saalo. O la, i bena a ye ko Jehova “b’an jigi tugu an ka tɔɔrɔ bɛɛ la.” (2 Korɛntikaw 1:3, 4; Ɔrɔmukaw 15:4). A ye layidu ta ko “Ala ka hɛrɛ min tɛmɛna mɔgɔw ka faamuyali ma,” a bena o di i ma.—Filipikaw 4:6, 7, 13.

I BE SE KA MIN KƐ:

• Jehova deli a k’i dɛmɛ walisa i hakili ka sigi ani i ka se ka miiri koɲuman

• Fɛɛrɛ minw bɛɛ be i bolo kɔrɔ, olu lajɛ ani min ka fisa i ma, i k’o sugandi

BIBULU BE MIN FƆ: “Hakilitigi be lɔnniya sɔrɔ. Lɔnnikɛla b’a tulo malɔ lɔnniyakuma na.” (Talenw 18:15). A ɲini ka koow faamu koɲuman. I k’a filɛ i somɔgɔ kelen kelen bɛɛ mako be min na. Kuma n’u ye ani u lamɛn.—Talenw 20:5.

Nka n’i ka mɔgɔ sɔbɛ dɔ sara do? Kana siran k’a yira ko i dusu kasinin lo. I hakili to a la ko hali “Yezu kasira.” (Zan 11:35; Waajulikɛla 3:4). A kɔrɔtanin lo fana i ka lafiɲɛ ka ɲɛ ani i ka sinɔgɔ koɲuman (Waajulikɛla 4:6). O la, a bena nɔgɔya i ma k’i ka dusukasiko muɲu.

I BE SE KA MIN KƐ:

• Kumaɲɔgɔnya kɛ n’i ka somɔgɔw ye tuma bɛɛ. Kana a to gwɛrɛgwɛrɛko ka cun aw kan ka sɔrɔ k’o kɛ. O la, ni kunkow ye aw sɔrɔ, a tɛna gwɛlɛya u ma ka kuma n’i ye

• O koo ɲɔgɔn ye mɔgɔ minw sɔrɔ, baro kɛ n’olu ye

BIBULU BE MIN FƆ: “Teri sɛbɛ bɛ mɔgɔ kanu tuma bɛɛ, a bɛ kɛ i balimakɛ ye tɔɔrɔ waati la.” (Talenw 17:17, ABM) I teriw b’a fɛ k’i dɛmɛ, nka n’a sɔrɔ u t’a lɔn u ka ɲi ka min kɛ. I mako be min na tigitigi, kana sigasiga k’o fɔ u ye (Talenw 12:25). Mɔgɔ minw be Bibulu faamu ka ɲɛ, dɛmɛ ɲini u fɛ. U bena ladili minw di i ma ka bɔ Bibulu kɔnɔ, o bena i nafa.—Zaki 5:14.

Minw limaniyanin lo kosɔbɛ Ala la ani u lanin be a ka layiduw la, n’i be to ka jɛn n’olu ye, i bena dɛmɛ sɔrɔ. Mɔgɔ minw mako be jijali la, n’i b’olu dɛmɛ, i dusu bena saalo kosɔbɛ fana. I ka limaniya kofɔ o mɔgɔw ye. Jehova ka layiduw kofɔ u ye fana. Mɔgɔ wɛrɛ minw mako be dɛmɛ na, i ka to k’u dɛmɛ. Minw b’i kanu ani u b’u janto i la, i kana i mabɔ olu la.—Talenw 18:1; 1 Korɛntikaw 15:58.

I BE SE KA MIN KƐ:

• Kuma n’i teri sɔbɛ dɔ ye ani a to a k’i dɛmɛ

• I mako be min na tigitigi, i kɔnɔ gwɛ k’o fɔ a ye