I b’a lɔn wa?
Jehova tun be sɔn kɔnɔ sifa fila ka kɛ saraka ye minkɛ, mun na o tun ye koo ɲuman ye?
KA KƐƝƐ ni Musa ka sariya ye, mɔgɔ tun be se ka tuganin wala jɛnɛtuba saraka Jehova ye. Musa ka sariya yɔrɔ min be kuma sarakaw koo la, o kɔnɔ sifa fila kofɔra ɲɔgɔn fɛ tuma bɛɛ. Ni mɔgɔ tun ma tuganin sɔrɔ, a tun be se ka jɛnɛtuba saraka (Lev. 1:14; 12:8; 14:30). Mun na o tun ye koo ɲuman ye do? Sabu tuganin tun sɔrɔ man di tuma bɛɛ. Mun na do?
Tuganin
Tuganinw tɛ to yɔrɔ kelen tuma bɛɛ. U tun ka teli ka sɔrɔ Israɛl jamana na funteni kalow lo la. Nka ɔkutɔburukalo la, u tun be van ka taga funteni yɔrɔw la worodugu fan fɛ ani u be kɔsegi Israɛl jamana na funteni wagati la (Dɔnk. 2:11, 12; Zer. 8:7). O kama lo a tun ka gwɛlɛ Israɛldenw ma ka tuganinw bɔ saraka ye nɛnɛ tuma na.
Jɛnɛtuba minw be sɔrɔ kuluyɔrɔw la
Nka jɛnɛtubaw tɛ van ka taga yɔrɔ wɛrɛw la. O kama, u tun be sɔrɔ Israɛl jamana na saan kuru bɛɛ la. Ka fara o kan, mɔgɔw tun be jɛnɛtubaw mara u ka soo (Zan 2:14, 16 lajɛ). * Gafe dɔ b’a fɔ ko: “Dugu denninw ni dugubaw bɛɛ la Palastine jamana na, mɔgɔw tun be jɛnɛtubaw mara u ka soo. Lutigi kelen kelen bɛɛ tun be ni a ka jɛnɛtubaw ka boon ye wala a tun be woo sogi kogo la walisa k’a ka jɛnɛtubaw mara yen (Bible Plants and Animals).—Ezayi 60:8 lajɛ.
Jɛnɛtuba dɔ b’a ka woo kɔnɔ
Kɔnɔ minw tun sɔrɔ ka di Israɛl jamana na saan kuru bɛɛ la, Jehova sɔnna olu ka kɛ saraka ye. O b’a yira ko a be a sagokɛlaw kanu ani ko a be koow kɛ ka dama kɛɲɛ.
[Jukɔrɔla kunnafoni]
^ dakun 5 O vɛrisew kɔnɔ, kumaden min bayɛlɛma ko tuganin, o ɲɛsinna fana jɛnɛtubaw ma.
