1, 2. Jehova be baara kɛ n’a ka nafolofɛnw ye cogo di?

JEHOVA ALA b’a tɛgɛ labila ka mɔgɔw sɔn. Fɛɛn o fɛɛn b’an fɛ, ale lo y’o di an ma. Sanu, warigwɛ ani dugukolo ka nafolofɛnw bɛɛ ye Jehova ta lo ye. A be baara kɛ n’o ye walisa k’an mako wasa (Zab. 104:13-15; Aze 2:8). Bibulu ka maana caaman b’a yira ko Jehova ye baara kɛ n’o nafolofɛnw ye cogo kabakoman na walisa k’a sagokɛlaw dɛmɛ.

² Saan 40 kɔnɔ, Jehova ye maanɛ ni jii di Israɛldenw ma k’u to kongokolon kɔnɔ (Ɛkiz. 16:35). O kɛra sababu ye u “ma dɛsɛ foyi la.” (Neemi 9:20, 21). Firiyamuso dɔ ka tulu tun man ca ani Jehova tɛmɛna kira Elize fɛ ka kabako dɔ kɛ walisa k’o tulu caya. O nilifɛn sababu fɛ, o muso y’a ka juruw bɛɛ sara ani ka wari sɔrɔ walisa k’ale n’a deenw balo (2 Mas. 4:1-7). Tuma min na jamaba mako tun be dumuni na, Yezu ye kabako kɛ k’u balo Jehova ka dɛmɛ sababu fɛ. Yezu ye kabako kɛ fana ka wari di Piyɛri ma walisa a ka lanpo sara.—Mat. 15:35-38; 17:27.

3. An bena mun lo lajɛ barokun nin na?

³ Jehova be se ka tɛmɛ fɛɛn bɛɛ fɛ walisa k’a ka danfɛnw  dɛmɛ dugukolo kan. O n’a ta bɛɛ, a b’a ɲini a sagokɛlaw fɛ u k’u ka bololafɛnw kɛ ka dɛmɛ don a ka ɔriganisasiyɔn ka baara la (Ɛkiz. 36:3-7; Talenw 3:9 kalan). Jehova ye fɛɛn nafaman minw di an ma, mun na a b’a fɛ an ka dɔ di ale ma? Galen, Jehova sagokɛlaw tun be dɛmɛ don a ka baara la n’u bololafɛnw ye cogo di? Nili minw be kɛ bi, Jehova ka ɔriganisasiyɔn be baara kɛ n’u ye cogo di? An bena o ɲiningaliw jaabi barokun nin na.

4. N’an be dɛmɛ don Jehova ka baara la, o be mun lo yira?

⁴ An ka ɲi ka Jehova sɔn sabu an b’a kanu ani a koo ka gwɛlɛ an ma. Jehova ye fɛɛn minw bɛɛ kɛ an ye, n’an miirila o la, o b’an dusu diya kosɔbɛ. Solomani mako tun be min na walisa ka Alabatosoba lɔ, Dawuda y’o ɲɛfɔ. A ko fɛɛn o fɛɛn b’an fɛ, o ye Jehova ta lo ye. An fana be n’o miiriya ɲɔgɔn lo ye. O la, an be fɛɛn o fɛɛn di Jehova ma, ale lo y’o di an ma.—1 Tilew Kibaru 29:11-14 kalan.

5. Ala ka Kuma b’a yira cogo di ko ka nili kɛ, o ye tiɲɛn batoli faan dɔ ye min kɔrɔtanin lo?

⁵ Ka nili kɛ, o ye an ka batoli faan dɔ lo ye. Mɛlɛkɛ minw be Jehova sago kɛra sankolo la, ciden Zan y’u ye yelifɛn dɔ kɔnɔ ani u b’a fɔra ko: “An Matigi n’an ka Ala, i ka kan ni boɲa ni tanuli ye, k’i ka sebagaya koo fɔ! Bari, e le ye fɛɛn bɛɛ dan, a diyara i ye, e y’u bɛɛ dan.” (Yir. 4:11). N’an b’an bololafɛnw bɛɛ la nafaman di Jehova ma, an be bonya ni nɔɔrɔ la a kan. Tiɲɛn tɛ? Jehova tɛmɛna Musa fɛ k’a fɔ Israɛldenw ye ko u ka na ale ɲɛɛ kɔrɔ siɲɛ saba saan kɔnɔ walisa ka fɛti kɛ. O fɛtiw la, u ka batoli faan dɔ tun ye ka u bololafɛn dɔw di Jehova ma. O kama, u tun man kan ka na “Masaba ɲakɔrɔ u bololakolon.” (Deter. 16:16). Bi fana, an ka batoli faan dɔ ye ka nili kɛ n’an dusukun bɛɛ ye. O cogo la, Jehova ka ɔriganisasiyɔn be baara min kɛ, an b’a yira ko an b’o jati fɛɛn nafamanba ye ani ko an be dɛmɛ don o baara la.

6. N’an be nili kɛ, mun na o b’an nafa? (Jaa lajɛ, barokun daminɛ na.)

⁶ N’an be nili kɛ, o b’an nafa. Sanni mɔgɔw k’an sɔn tuma bɛɛ, nafa b’a la an ka tɔɔw sɔn. Bibulu b’a fɔ ko: “N’i y’i ka jɔncɛ sagonafɛnw bɛɛ di a ma kabi a kanbeletuma na, a laban, a bena kɛ ɲumanlɔnbali ye.” (Talenw 29:21, NW). Miiri k’a filɛ: Deen dɔ bangebagaw be wari dɔɔni di a ma ani a be dɔ bɔ o la ka nilifɛn dɔ san u ye. O nilifɛn bena mun lo kɛ a bangebagaw la? Miiri k’a filɛ fana: Kanbelenin dɔ ye piyɔniye ye ani a be n’a bangebagaw ye u ka soo. A be wari dɔɔni di a bangebagaw ma walisa k’u dɛmɛ ka musakaw sara. Hali ni bangebagaw lo m’o ɲini a fɛ, u be sɔn o dɛmɛ na. Mun na do? Sabu o cogo lo la o deen b’a yira ko a bangebagaw be min bɛɛ kɛra a ye, a b’u waleɲuman lɔn o kosɔn. O cogo kelen na, Jehova b’a lɔn ko n’an b’an ka fɛɛn nafamanw di ale ma, o b’an yɛrɛ lo nafa.

7, 8. Bibulu sɛbɛwagati la, Jehova sagokɛlaw tun be dɛmɛ don cogo di a) baara kɛrɛnkɛrɛnnin dɔw la? b) Jehova ka baara la?

⁷ A fɔra Bibulu kɔnɔ ko Jehova sagokɛlaw tun be to ka niliw kɛ. Tuma dɔw la, u tun be nili kɛ ka dɛmɛ don baara kɛrɛnkɛrɛnnin dɔw la. Ɲɛyirali fɛ, Musa ye Israɛldenw jija u ka nili kɛ fanibugu lɔli kama. Kɔfɛ, masacɛ Dawuda y’o ɲɔgɔn lo kɛ Alabatoso lɔli kama (Ɛkiz. 35:5; 1 Til. Kib. 29:5-9). Masacɛ Zowasi ka tile la, jama tun ye nili minw kɛ, sarakalasebagaw y’o kɛ ka Alabatosoba  lalaga (2 Mas. 12:4, 5). Saan kɛmɛkulu fɔlɔ la, kerecɛnw y’a mɛn ko kɔngɔba tun be Zude mara la ani ko balimaw mako tun be dɛmɛ na. O kama, u ye “ŋaniya ta k’u bolo farafara ɲɔgɔn kan ka kɛɲɛ n’u bɛɛ seko ye, k’u b’o ci u balima Zudekaw ma.”—Kɛw. 11:27-30.

⁸ Minw tun be Jehova ka baara ɲɛminɛ, Jehova sagokɛlaw tun b’u bololafɛnw di walisa k’u dɛmɛ. Ɲɛyirali fɛ, Musa ka sariya kɔrɔ, Levitew tun tɛ cɛɛn sɔrɔ i n’a fɔ Israɛlden tɔɔw. O kama, Israɛldenw tun be jaka bɔ ka di Levitew ma walisa u ka se k’u seen don bɛrɛbɛrɛ u ka baara la fanibugu kɔnɔ (Nɔnb. 18:21). O cogo kelen na, muso dɔw tun “be Yezu n’a ka kalandenw dɛmɛ n’u bololafɛnw ye.”—Luka 8:1-3.

9. Galen, Israɛlden minw tun be nili kɛ, u tun y’o wari sɔrɔ cogo di?

⁹ Israɛldenw tun ma u bololafɛnw sɔrɔ cogo kelen na walisa ka nili kɛ. Minw tun ye nili kɛ walisa ka dɛmɛ don fanibugu lɔli baara la, n’a sɔrɔ olu y’u ka bololafɛnw sɔrɔ Ezipiti (Ɛkiz. 3:21, 22; 35:22-24). Saan kɛmɛkulu fɔlɔ la, kerecɛn dɔw tun y’u ka fɛɛnw feere i n’a fɔ u ka forow wala u ka boonw walisa k’o wari di cidenw ma. O kɔ, balima minw mako tun be dɛmɛ na, cidenw y’o wari kɛ k’u dɛmɛ (Kɛw. 4:34, 35). Kerecɛn dɔw tun be to ka wari bila danna walisa k’o di ka dɛmɛ don Ala ka baara la (1 Kor. 16:2). Nafolotigiw wo, fantanw wo, u bɛɛ tun be fɛɛn dɔ di.—Luka 21:1-4.

10, 11. a) Jehova sagokɛla minw tun be Bibulu sɛbɛwagati la, an be se k’olu ladegi cogo di? b) Nɛɛma min dira i ma ka dɛmɛ don Masaya waajuli baara la, i b’o jati cogo di?

¹⁰ Bi, n’a sɔrɔ u be se k’a ɲini an fana fɛ an ka nili kɛ walisa ka dɛmɛ don koo kɛrɛnkɛrɛnnin dɔ la. Ɲɛyirali fɛ, yala labɛn kɛra walisa Masaya Boon kura ka lɔ aw ka kafo ye wa? Yala u ka ɲi k’aw ka Masaya Boon wala aw ka Betɛli lakuraya wa? N’a sɔrɔ an be se ka dɛmɛ don walisa k’an ka lajɛnba ka musakaw sara. A be se ka kɛ fana ko an balima dɔ be yɔrɔ dɔ la balawo kɛra yɔrɔ min na ani a mako b’an ka dɛmɛ na. Minw be baara kɛ an ka sigiyɔrɔsoba la ani Betɛliw la duniɲa kuru bɛɛ kɔnɔ, an be se ka nili kɛ walisa k’olu dɛmɛ. An ka niliw sababu fɛ, an be misɔndenw, dan na piyɔniyew ani kafokulu kɔrɔsibagaw dɛmɛ. Labɛn kɛra duniɲa kuru bɛɛ kɔnɔ walisa ka lajɛnbaw kɛyɔrɔw ani Masaya Boonw lɔ. Siga t’a la, i ka kafo ye ŋaniya ta ka to ka wari ci walisa ka dɛmɛ don o baara la.

¹¹ Jehova ka ɔriganisasiyɔn be baara min kɛra laban loonw na, an kelen kelen bɛɛ be se ka nili kɛ walisa ka dɛmɛ don o baara la. Mɔgɔ tɛ bɔ an ka niliw fanba kala ma. N’an be wari don nili buwatiw kɔnɔ Masaya Boon na, wala n’an be tɛmɛ jw.org fɛ ka nili kɛ, an t’a to mɔgɔ si k’a lɔn an ye wari daa min di. Nka, n’i b’a miiri ko i ye min di o tɛ bɛrɛ ye do? Tiɲɛn na, mɔgɔw be nili minw kɛ bi, u fanba tɛ nilibabaw ye, nka, nili fitinin fitininw lo. Hali an balima minw ye fantanw ye, olu be Masedwanɛ kerecɛnw ladegi. O kerecɛnw “n’u ka fantanyajugu” bɛɛ n’a ta, u ye cidenw deli walisa ka se ka nili kɛ ani u y’u tɛgɛ yɛlɛ kosɔbɛ.—2 Kor. 8:1-4.

12. Jehova ka ɔriganisasiyɔn b’a jija cogo di ka baara kɛ n’an ka niliw ye cogo ɲuman na?

¹² Koow Ɲɛnabɔla Jɛnkulu mɔgɔw be baara kɛ n’an ka niliw ye ni kantigiya ani hakilitigiya ye (Mat. 24:45). U be delili kɛ walisa ka desizɔn ɲumanw ta ani u be labɛnw kɛ koɲuman k’a filɛ u bena baara kɛ n’o niliw ye cogo min na  (Luka 14:28). Bibulu sɛbɛwagati la, cɛɛ kantigi minw tun be niliw koo ɲɛnabɔ, olu tun b’u janto walisa Jehova ka baara dɔrɔn lo ka kɛ n’o ye. Ɲɛyirali fɛ, Pɛrɛsi masacɛ tun ye nafolofɛn caaman minw di Jehova ka baara kama, Ɛsidirasi tagara n’u ye Zeruzalɛmu. O nafolofɛn dɔw tun ye sanu, warigwɛ ani nafolofɛn wɛrɛw ye. U bɛɛ tun be miliyari 56 ni kɔ bɔ CFA wari la. Ɛsidirasi tun b’a jati k’o tun dira Jehova lo ma. O kama, a ye cikan tigitigi dɔw di walisa k’o nafolofɛnw latanga benkannikɛlaw ma sira kan (Ɛsid. 8:24-34). Saan caaman o kɔ, Zude balima minw mako tun be dɛmɛ na, ciden Pol ye wari lajɛn walisa k’u dɛmɛ. Minw tun ka kan ka taga o wari di, a y’a janto u “ka tilenninya kɛ Matigi . . . ɲakɔrɔ” ani “mɔgɔw ɲakɔrɔ fana.” (2 Korɛntikaw 8:18-21 kalan). Bi, Jehova ka ɔriganisasiyɔn be Ɛsidirasi ni Pol ladegi. N’a be niliw koo ɲɛnabɔ ani ka baara kɛ n’u ye, a b’a janto ka koow kɛ ka kɛɲɛ ni saratiw ye.

13. Mun na Jehova ka ɔriganisasiyɔn ye yɛlɛmani dɔw kɛ?

¹³ N’a sɔrɔ denbaya mɔgɔ dɔw be yɛlɛmani dɔw kɛ walisa u ka musakaw kana caya n’u ka sɔrɔ ye. Wala u be fɛɛrɛ dɔw ɲini walisa ka ɲɛnamaya kɛ cogo nɔgɔman na ani ka baara kɛ Jehova ye bɛrɛbɛrɛ. Jehova ka ɔriganisasiyɔn b’o ɲɔgɔn lo kɛ fana. Kɔsa la, baara kura caaman daminɛna. O y’a to an ka musakaw tun ka ca ka tɛmɛ an ka sɔrɔ kan. O kama, Jehova ka ɔriganisasiyɔn ye fɛɛrɛ dɔw ɲini walisa ka dɔ bɔ musakaw la ani ka baara kɛ cogo nɔgɔman na. O la, baara ɲuman caaman sera ka kɛ n’an ka niliw ye.

14-16. a) I be nili minw kɛ, baara juman lo be kɛ n’o ye? b) Baara min be kɛ n’i ka niliw ye, o b’i nafa cogo di?

¹⁴ Mɔgɔ minw ye Jehova Seerew ye kabi wagatijan, olu y’a fɔ ko u ma deli ka fɛɛn caaman sɔrɔ ten Alako ta fan fɛ ka se bi ma. Miiri k’a filɛ: A ma mɛɛn, jw.org ani JW Telewisɔn daminɛna. Ka fara o kan, Traduction du monde nouveau bayɛlɛmana kaan caaman na. An ka tile saba lajɛnba min labɛnna jamana caaman kama, o kɛra dugu 14 na, stadi belebelebaw kɔnɔ duniɲa faan bɛɛ la, saan 2014 wala 2015 la. O lajɛnba kuun tun ko: “A ye to ka Ala ka Masaya ɲini fɔlɔ!” Mɔgɔ minw tagara o lajɛnba la, u ninsɔndiyara kosɔbɛ!

 ¹⁵ Mɔgɔ caaman y’u ka waleɲumanlɔn yira sabu u ye fɛɛn ɲuman caaman sɔrɔ ka bɔ Jehova ka ɔriganisasiyɔn yɔrɔ. Ɲɛyirali fɛ, balimacɛ dɔ n’a muso be Azi mara la ani u y’a fɔ JW Telewisɔn koo la ko: “An b’an ka cidenya baara kɛra dugu dennin dɔ lo kɔnɔ. O kama, tuma dɔw la, an b’a miiri ko an b’an kelen na ani an ka teli ka ɲinɛ ko Jehova ka baara be kɛ duniɲa kuru bɛɛ kɔnɔ. Nka, n’an ye JW Telewisɔn ka videwow filɛ, o b’an hakili jigi ko balimaya jɛnkulu min be duniɲa kuru bɛɛ kɔnɔ, an y’o jɛnkuluden dɔw ye. An ka dugudennin na, JW Telewisɔn ka di balimaw ye kosɔbɛ. Videwo minw be bɔ kalo o kalo, dɔw y’a fɔ ko n’olu y’o filɛ, o b’a to u b’u magwɛrɛ Koow Ɲɛnabɔla Jɛnkulu mɔgɔw la. U ninsɔn ka di kosɔbɛ ka kɛ Ala ka ɔriganisasiyɔn mɔgɔ dɔ ye sisan ka tɛmɛ fɔlɔ kan.”

¹⁶ Duniɲa kuru bɛɛ kɔnɔ, Masaya Boon 2 500 be lɔra wala ka lakuraya. Hɔndirasi jamana na, kafoden dɔw y’a fɔ ko olu tun b’a fɛ n’u dusu bɛɛ ye k’u yɛrɛ ka Masaya Boon sɔrɔ. U y’u ka Masaya Boon sɔrɔ sisan ani u ko: “An ninsɔn ka di kosɔbɛ ka kɛ Jehova ka denbayamɔgɔ dɔw ye ani k’an ka balimaya diyabɔ min be kɛ duniɲa kuru bɛɛ kɔnɔ.” Mɔgɔ caaman be n’o miiriya ɲɔgɔn lo ye n’u ye Bibulu ani gafe wɛrɛw sɔrɔ u ka kaan na. Wala n’u ye dɛmɛ sɔrɔ balawo dɔ kɛnin kɔ. U b’o lo miiri fana n’u y’a ye ko mɔgɔ caaman be sɔnna tiɲɛn kalanw na fɛɛrɛ nin sababu fɛ: waajuli min be kɛ dugubaw ani jamayɔrɔw la u ka kiinw kɔnɔ.

17. An b’a lɔn cogo di ko Jehova b’a ka ɔriganisasiyɔn dɛmɛna bi?

¹⁷ Mɔgɔ minw tɛ Jehova Seerew ye, olu tɛ se k’a faamu ko an be baara nunu bɛɛ kɛ niliw sababu dɔrɔn lo fɛ. Baarada belebeleba dɔ ka ɲɛmɔgɔ nana an ka ɛnprimɛriw filɛ. A kabakoyara k’a ye ko minw b’o baara kɛ, u b’u yɛrɛ di k’o kɛ gwansan. A kabakoyara fana k’a ye ko o baaraw bɛɛ be kɛ niliw dɔrɔn lo sababu fɛ ani ko an tɛ feereli kɛ ani an tɛ wari deli mɔgɔw fɛ. A y’a fɔ ko an be min kɛra, o tɛ se ka kɛ. An b’o kala ma! An b’a lɔn ko an be se k’o koow bɛɛ kɛ Jehova ka dɛmɛ dɔrɔn lo sababu fɛ.—Zɔbu 42:2.

18. a) An be duga juman lo sɔrɔ n’an be nili kɛ walisa ka dɛmɛ don Masaya ka baara la? b) An be se k’an deenw ni mɔgɔ kuraw dɛmɛ cogo di u ka dɛmɛ don fana o baara la?

¹⁸ Jehova be nɛɛma kɛ an ye ani ka sababu di an ma ka dɛmɛ don Masaya waajuli baara la. A y’a daa di ko n’an b’o kɛ, a bena an duga (Mal. 3:10). A y’a daa di fana ko n’an be sɔn ka nili kɛ, koow bena ɲɛ an bolo (Talenw 11:24, 25 kalan). N’an be mɔgɔ sɔn, o b’an ninsɔndiya sabu “nisɔndiya be mɔgɔ sɔnni na ka tɛmɛ sɔrɔli kan.” (Kɛw. 20:35). An be se ka kɛ ɲɛyirali ɲuman ye an deenw ani mɔgɔ kuraw fɛ an ka kumaw n’an ka kɛwalew fɛ. An be se k’u dɛmɛ k’a faamu olu fana be se ka dɛmɛ don Ala ka baara la cogo min na ani ka duga caaman sɔrɔ o la.

19. Barokun nin y’i jija cogo di?

¹⁹ Fɛɛn o fɛɛn b’an fɛ, Jehova lo y’o di an ma. O la, n’an b’o dɔ segi a ma, an b’a yira ko an b’a kanu ani ko a ye min bɛɛ kɛ an ye, an b’a waleɲuman lɔn o kosɔn (1 Til. Kib. 29:17). Tuma min na u tun be nili kɛra Alabatoso lɔli kama, “jama tun nisɔndiyara u ka boɲafɛn nunu diko la, bari mɔgɔ tun ma u karaba u ka sɔrɔ k’o kɛ Masaba ye.” (1 Til. Kib. 29:9). Jehova ye fɛɛn minw bɛɛ di an ma, an fana ka to k’u dɔ segi a ma. O la, an bena ninsɔndiya ani ka wasa.