TERI ɲumanw nafa ka bon kosɔbɛ. Nka teriya min be mɛɛn, o tɛ sɔrɔ n’i ma dɔ kɛ dɔ ye. Ni teriya be farati la, mun lo be se ka kɛ sababu ye a tɛ tiɲɛ? Mɔgɔ dɔw kofɔra Bibulu kɔnɔ minw tun ye teri sɔbɛw ye. Tuma dɔ la, u ka teriya tun be ɲini ka nagasi. U be se k’an dɛmɛ ka koo caaman faamu teriya koo la.

Dawuda tun ye sagadɛndɛla ye ani a kɛra masacɛ ye. Siga t’a la, a tun be ni teri ɲumanw ye. N’a sɔrɔ i hakili b’a tericɛ Zonatan na (1 Sam. 18:1). Teri wɛrɛw tun be Dawuda fɛ fana. U dɔ tun ye Natan ye. Bibulu t’a fɔ an ye u ka teriya daminɛna tuma min na. Nka loon dɔ la, Dawuda y’a kɔnɔkow fɔ Natan ye i ko mɔgɔ b’a kɔnɔkow fɔ a teri ye cogo min na. Dawuda tun b’a fɛ ka soo lɔ Jehova ye. Natan ka miiriya tun kɔrɔtanin lo masacɛ fɛ o koo la sabu a teri tun lo ani hakili senu tun b’a kan.—2 Sam. 7:2, 3.

Nka, koo dɔ kɛra min y’u ka teriya bila farati la. Masacɛ Dawuda ye ɲamɔgɔya kɛ ni Batiseba ye ani o kɔ, a y’a kɛ u y’a cɛɛ Uri  faga (2 Sam. 11:2-21). Saan caaman kɔnɔ, Dawuda ye kantigiya kɛ Jehova ye ani a ye tilenninyakow lafasa. Nka sisan, a ye jurumuba kɛ! Mun lo y’o masacɛ ɲuman bila o la? A tun m’a lɔn ko a ye kojuguba lo kɛ wa? Yala a tun b’a miiri ko a tun be se k’o dogo Ala la wa?

Natan tun bena mun lo kɛ do? Yala a tun bena a to mɔgɔ wɛrɛ lo ka kuma masacɛ fɛ o koo la wa? Mɔgɔ dɔw tun b’a kala ma ko Dawuda lo y’a kɛ u ye Uri faga. O la, Natan tun be se k’a miiri ko kuun t’a la ale k’a daa don o koo la ani k’a ka teriya ɲuman tiɲɛ ni Dawuda ye. O yɛrɛ tun be se k’a niin bila farati la sabu Dawuda tun y’a kɛ u ye Uri faga k’a sɔrɔ a ma foyi kɛ.

Nka, Natan tun ye Ala ka kuma lasebaga ye. A tun b’a lɔn ko n’a ma kuma, ale ni Dawuda ka teriya tun tɛna kɛ i ko fɔlɔ la ani a dusukun tun bena a jalaki. A tericɛ Dawuda tun ye min kɛ, o tun ma diya Jehova ye. Masacɛ mako gwɛlɛ tun be dɛmɛ na walisa ka teriya kɛ ni Ala ye tugun. Tiɲɛn na, Dawuda mako tun be teri sɔbɛ la. Natan tun y’o teri ɲɔgɔn lo ye. Natan y’a latigɛ ka kuma Dawuda fɛ. Komi Dawuda tun ye sagaw dɛndɛ ka ye, Natan tɛmɛna ɲɛyirali dɔ fɛ walisa k’a dusukun sɔrɔ. A ye Ala ka kuma fɔ Dawuda ye cogo dɔ la min y’a to a y’a faamu ko a ye kojuguba lo kɛ. O ye Dawuda lasun ka nimisa ani ka sɔn kololi ma.—2 Sam. 12:1-14.

N’i teri dɔ ye filiba wala jurumuba dɔ kɛ, i bena mun lo kɛ do? N’a sɔrɔ i be se k’a miiri ko n’i y’o fɔ, o bena aw ka teriya nagasi. Diinan mɔgɔkɔrɔw be se k’o teri dɛmɛ Alako ta fan fɛ. Nka, i be se k’a miiri fana ko n’i y’a fɔ u ye, a bena kɛ i n’a fɔ i y’i teri janfa le. I bena mun lo kɛ do?

Gianni min kofɔra daminɛ na, ale ko: “Ne y’a ye ko koow tun yɛlɛmana. Maurizio tun t’a kɔnɔkow fɔ n’ ye tugun komi fɔlɔ la. A tun man nɔgɔ, nka n’ y’a latigɛ k’a ɲininga fɛɛn min kɛra. N’ ye n’ yɛrɛ ɲininga ko: ‘Ne be se ka mun lo fɔ a ye a tɛ min lɔn? N’a sɔrɔ a bena dimi n’ kɔrɔ!’ Nka, an ye koo minw bɛɛ kalan ɲɔgɔn fɛ, n’ hakili jigira u la. O ye fanga di n’ ma, n’ sera ka kuma a fɛ. Maurizio tun y’o ɲɔgɔn lo kɛ n’ ye tuma min na n’ mako tun be dɛmɛ na. N’ tun t’a fɛ an ka teriya ka sa. Nka, n’ tun b’a fɛ k’a dɛmɛ le sabu a koo ka gwɛlɛ n’ ma.”

Maurizio fana ko: “Gianni y’a kɔnɔ gwɛ ka kuma n’ fɛ ani tiɲɛn tun b’a fɛ. N’ tun b’a lɔn ko min ye n’ sɔrɔ, Gianni ni Jehova nɔɔ tɛ. Nka, ne yɛrɛ nɔɔ lo. O kama, n’ sɔnna diinan mɔgɔkɔrɔw ka ladili ma. Wagati damanin o kɔ, n’ ye barika sɔrɔ tugun Alako ta fan fɛ.”

Dawuda tun be jɛnɲɔgɔnya kɛ ni mɔgɔ wɛrɛw ye minw ye kantigiya kɛ a ye ani u y’a dɛmɛ gwɛlɛyaw tuma na. Ɲɛyirali fɛ, Bibulu b’a fɔ ko Usayi ye “Dawuda tericɛ” ye (2 Sam. 16:16; 1 Til. Kib. 27:33). N’a sɔrɔ a tun be baara kɛ masaso kɔnɔ. Masacɛ tericɛ sɔbɛ tun lo. Masacɛ y’a ci tuma dɔw la ka taga gundo koo dɔw ɲɛnabɔ.

Tuma min na Dawuda dencɛ Abisalɔn ye masaya bɔsi, Israɛlden caaman tugura a kɔ. Nka, Usayi kɔni ma tugu a kɔ. Dawuda bolitɔ Abisalɔn ɲɛ, Usayi tagara a kunbɛn. Dawuda dusu tun kasinin lo kosɔbɛ sabu a yɛrɛ dencɛ n’a ka mɔgɔ sɔbɛ dɔw y’a janfa. Nka, Usayi m’a janfa. Ale sɔnna k’a niin bila farati la walisa ka cii dɔ dafa min tun bena Abisalɔn ka nanbarako tiɲɛ. A m’a jati ko komi a be baara kɛ masaso kɔnɔ, waajibi lo a k’o cii dafa. Nka a y’a yira ka gwɛ ko a ye teri kantigi ye.—2 Sam. 15:13-17, 32-37; 16:15–17:16.

Bi, ninsɔndiya lo k’a ye ko balimaw bɛnnin lo. U be baara min kɛ wala u lɔyɔrɔ ye min ye kafo kɔnɔ, o bɛɛn tɛ dan o dɔrɔn ma. U ka kɛwaliw fɛ, a be komi u b’a fɔra ko:  “A ma kɛ komi waajibi lo n’ ka kɛ i teri ye dɛ! Nka, i koo lo ka gwɛlɛ n’ ma.”

O ɲɔgɔn lo ye balimacɛ Federico sɔrɔ. A balima kanulen Antonio sababu la, a sera ka gwɛlɛya dɔ muɲu. A ko: “Tuma min na Antonio nana an ka kafo kɔnɔ, a ma mɛɛn an kɛra teriw ye. An fila bɛɛ tun ye kɔrɔsigi cidenw ye ani a tun ka di an ye ka baara kɛ ɲɔgɔn fɛ kafo kɔnɔ. Dɔɔni o kɔ, a kɛra diinan mɔgɔkɔrɔ ye. O la, a tun tɛ n’ tericɛ dɔrɔn ye. N’ tun b’a ladegi fana Alako ta fan fɛ.” O kɔ, Federico ye koo bɛnbali dɔ kɛ. A ye dɛmɛ ɲini joona joona Alako ta fan fɛ. Nka, a tun tɛ saratiw dafa tugun ka kɛ piyɔniye wala kɔrɔsigi ciden ye. A tericɛ Antonio ye mun lo kɛ do?

Federico hakili b’a la ko: “N’ y’a ye k’o koo ye Antonio fana dusu kasi. A y’a seko bɛɛ kɛ ka n’ dɛmɛ. A ye n’ dɛmɛ kosɔbɛ walisa n’ ka segi ka jɛnɲɔgɔnya ɲuman kɛ ni Ala ye. A ma ban n’ na fewu. A ye n’ jija walisa n’ ka barika sɔrɔ kokura Alako ta fan fɛ ani n’ fari kana faga.” Antonio fana ko: “Ne ni Federico ye wagati caaman kɛ ɲɔgɔn fɛ. N’ tun b’a fɛ a k’a lɔn ko, koo o koo b’a kɔnɔ, a be se k’o fɔ n’ ye hali a ka dusukasiko.” Ninsɔndiya lo k’a ye ko Federico ye fanga sɔrɔ tugun Alako ta fan fɛ ani a kɛra piyɔniye ni kɔrɔsigi ciden ye tugun. Antonio y’a ka kuma kuncɛ ko: “Hali n’an tɛ kafo kelen kɔnɔ tugun, an magwɛrɛnin lo ɲɔgɔn na kosɔbɛ.”

Tuma min na i mako gwɛlɛ b’i teri sɔbɛ dɔ la, n’a bolila k’i to yen, i bena mun lo miiri do? O koo be digi mɔgɔ la yɛrɛ le! Yala i bena se ka yafa a ma wa? Yala aw ka teriya be se ka fanga sɔrɔ tugun komi fɔlɔ la wa?

Miiri k’a filɛ koo min ye Yezu sɔrɔ a ka loon labanw na dugukolo kan. A tun ye wagati caaman kɛ n’a ka ciden kantigimanw ye ani jɛnɲɔgɔnya kɛrɛnkɛrɛnnin tun b’u ni ɲɔgɔn cɛ. Yezu yɛrɛ tun b’u weele a teriw (Zan 15:15). Nka, mun lo kɛra tuma min na u ye Yezu minɛ? Cidenw bolila k’a to yen.  Piyɛri tun y’a fɔ ka gwɛ ko ale tun tɛna a Kalanfa janfa abada. Nka o loon suu yɛrɛ la, Piyɛri ko ale tɛ Yezu lɔn!—Mat. 26:31-33, 56, 69-75.

Yezu tun b’a lɔn ko a teriw tun bena boli k’a to yen a ka kɔrɔbɔli laban na. N’a jigi tun tigɛra wala n’a dusu tun kasira, a joo tun lo. Tile damanin a suu kununi kɔ, a ye baro kɛ n’a ka kalandenw ye. Nka, foyi m’a yira ko a jigi tun tigɛnin lo, ko a tun diminin lo wala ko a tun nimisanin lo u koo la hali dɔɔni. Yezu ma segi a ka kalandenw ka filiw kan. U tun ye min kɛ a la a minɛlon sufɛ, a ma kuma o koo la fana.

Nka, Yezu ye Piyɛri ni ciden tɔɔw hakili sigi. Yezu y’a yira ko a jigi lanin be a ka kalandenw kan. A ye cikanw di u ma walisa u ka mɔgɔw kalan Ala koo la. Baara si kɔrɔtanin tɛ ka se o ma! Yezu fɛ, a ka kalandenw bele tun y’a teriw ye. A ka kanuya ye nɔɔba to u kan. U tun jijanin lo k’u seko bɛɛ kɛ walisa u kana u ka Kalanfa janfa tugun abada. Siga t’a la, a ye baara min kalifa u ma, u y’o dafa koɲuman.—Kɛw. 1:8; Kɔlɔs. 1:23.

Bɛnbaliyako dɔ tun donna balimamuso Elvira n’a terimuso kanulen Giuliana cɛ. Elvira tɛ se ka ɲinɛ o kɔ. A ko: “Tuma min na Giuliana ko n’ ye koo dɔ kɛ min y’ale dusu kasi, ne ye n’ yɛrɛ jalaki kosɔbɛ. Joo tun b’a fɛ ka dimi n’ kɔrɔ. Nka min ye n’ kabakoya, o ye ko a tun be jɔrɔla n’ ka kɛwale nɔfɛkow ni ne yɛrɛ koo lo la. N’ ye min kɛ a la, a ma sinsin o kan. Nka, o koo tun bena min kɛ ne yɛrɛ la, a sinsinna o lo kan. N’ b’a waleɲuman lɔn o kosɔn. Ne be Jehova fo sabu a ye teri di n’ ma min b’a janto n’ ka hɛɛrɛko la ka tɛmɛ a yɛrɛ kan.”

O la do, teri ɲuman bena mun lo kɛ n’u ka teriya be farati la? N’a bɛnnin lo, a bena kuma o koo la ka gwɛ. Nka, a b’o kɛ ni ɲumanya ye. O teri bena kɛ i n’a fɔ Natan ni Usayi. Olu ye kantigiya kɛ hali gwɛlɛya wagati la. O teri bena kɛ fana i n’a fɔ Yezu, ale min tun be sɔn ka yafa. Yala i y’o teri ɲɔgɔn lo ye wa?