Mɔgɔ minw b’o ɲiningaliw kɛ, u caaman tɔɔrɔla kosɔbɛ u ka mɔgɔ kanulen dɔw saya kosɔn. U tɛ jaabili dama lo ɲinina, nka u mako be dususalo lo fana na. Dɔw b’a miiri ko Yahutu caamanba minw sara Naziw bolo, o b’a yira ko adamadenw ka juguya y’a dama tɛmɛ. Ani, a ka gwɛlɛ o ɲɔgɔnna mɔgɔw ma ka la Ala la.

 Mɔgɔw be min fɔ: Koo jugu lo k’an yɛrɛ ɲininga mun na Ala y’a to Naziw ye Yahutu caaman faga.

 Min ye tiɲɛn ye: Mɔgɔ minw tun limaniyanin lo kosɔbɛ, u dɔw ye ɲiningali kɛ ko mun na Ala b’a to koo juguw ka kɛ. Misali la, kira Abakuki ye Ala ɲininga ko: “Mun na i b’a to ne ɲaa be la tilenbaliyakow kan? Mun na i be sɔn kojugu ka kɛ i ɲana? Ne te foyi yera ni benkanni ani fariyakow dama tɛ! Kɛlɛw be kɛra, benbaliya ka ca.” (Abakuki 1:3). Sanni Ala ka Abakuki jalaki, a y’a kɛ u ye Abakuki ka kumaw sɛbɛ Bibulu kɔnɔ walisa bɛɛ k’a kalan.

 Mɔgɔw be min fɔ: Tɔɔrɔ minw be adamadenw kan, o tɛ foyi kɛ Ala la.

 Min ye tiɲɛn ye: Juguya n’a nɔfɛkow ka gwo Ala ye (Talenw 6:16-19). Nuhun ka tile la, fariyakow tun jɛnsɛnna dugukolo kan minkɛ, ‘o digira Ala la.’ (Zɛnɛzi 6:5, 6). Siga t’a la, Yahutuw fagariko min kɛra, o ye Ala dusu tiɲɛ kosɔbɛ.—Malasi 3:6.

 Mɔgɔw be min fɔ: Ala tun b’a fɛ ka Yahutuw ɲangi le. O lo kama a y’a to Naziw y’u caamanba faga.

 Min ye tiɲɛn ye: Tiɲɛn lo ko Ala y’a to Ɔrɔmukaw ye Zeruzalɛmu halaki saan kɛmɛkulu fɔlɔ la (Matiyo 23:37–24:2). Kabi o tuma, Ala ma siya tigitigi si sugandi walisa ka nɛɛma kɛrɛnkɛrɛnnin dɔ kɛ a ye wala k’a ɲangi. Ala fɛ, “faranfasi tɛ Yahutuw ni siya tɔw cɛ.”—Ɔrɔmukaw 10:12, Bible senuma.

 Mɔgɔw be min fɔ: Ni Kanutigi ni Sebagayabɛɛtigi Ala tun be yen tiɲɛn na, a tun bena Yahutuw fagari koo bali.

 Min ye tiɲɛn ye: Tɔɔrɔw tɛ Ala nɔɔ ye fewu, nka tuma kelen kelen, a b’a to u ka kɛ wagati dɔ la.—Zaki 1:13; 5:11.

 Ala b’a to adamadenw ka tɔɔrɔ walisa sɔsɔliko min lawulila a saan caaman ye nin ye, o ka se ka ɲɛnabɔ. O kuun kelen nin lo kama a y’a to Yahutu caaman sara Naziw bolo. Ka fara o kan, Bibulu b’a yira ka gwɛ ko Sutana lo be duniɲa nin marala, Ala tɛ (Luka 4:1, 2, 6; Zan 12:31). An ka koo fila lajɛ Bibulu kɔnɔ minw b’a yira fɛɛn min kama Ala y’a to Naziw ye Yahutu caaman faga.

1.   Ala ye adamadenw dan ani a ye see di u ma u ka koow latigɛ u yɛrɛ ma. Ala y’a fɔ Adama ni Awa ye a tun be min ɲinina u fɛ. Nka a m’u waajibiya u ka mɛnni kɛ ale fɛ. U y’a latigɛ ka Ala kaan bila u kɛtɔ k’a latigɛ u yɛrɛ ma min ka ɲi ani min man ɲi. Kabi sanga ni wagati bɛɛ, mɔgɔw y’o desizɔn jugu ɲɔgɔn lo ta ani a nɔfɛkow ka jugu kosɔbɛ adamadenw ma (Zɛnɛzi 2:17; 3:6; Ɔrɔmukaw 5:12). Lɔnni gafe dɔ b’o lo fɔ fana. A fɔra yen ko: “See min be adamadenw ye ka koow latigɛ u yɛrɛ ma, u be baara jugu min kɛ n’o ye, duniɲa ka tɔɔrɔw fanba be bɔ o le la.” (Énoncé des principes du judaïsme conservateur). Sanni k’o see bɔsi adamadenw la, Ala ye wagati di u ma walisa u ka diɲɛ mara u yɛrɛ ma k’a filɛ.

2.   Fagariko min kɛra Yahutuw la, see be Ala ye k’o ɲɛnabɔ ani a bena o kɛ . Ala y’a daa di ko mɔgɔ miliyɔn caaman minw sara, a bena u kunu ka bɔ saya la. Hali Naziw ye Yahutu minw fanga. Yahutu minw kisira Naziw bolo, o fagariko ye tɔɔrɔ min lase olu ma, Ala bena o bena o ban (Ezayi 65:17; Kɛwaliw 24:15). Ala be adamadenw kanu cogo min na, o b’a to an lanin b’a la kosɔbɛ ko a ye layidu min ta, a bena o dafa.—Zan 3:16.

 Yahutu minw kisira o fagariko ma, u caaman sera k’u ka limaniya mara ani ka kuun sɔrɔ u ka ɲɛnamaya la. Mun na do? Sabu u y’a faamu fɛɛn min kama Ala b’a to tɔɔrɔkow ka kɛ ani cogo min na Ala bena o tɔɔrɔ nɔfɛkow ban.