Sɛgɛsɛgɛri dɔ y’a yira ko Etazini jamana na, kanbelew ni sunguru kɛmɛ kɛmɛ kan, mɔgɔ 80 lo be delili kɛ. Nka, u tilancɛ dɔrɔn lo be delili kɛ loon o loon. O kanbelew ni sunguru dɔw b’u yɛrɛ ɲininga ko: “Delili kuun ye ka mɔgɔ hakili sigi dɔrɔn, wala koo wɛrɛ lo min kɔrɔtanin lo ka tɛmɛ o kan?”

•  Delili ye mun lo ye?

•  Ala be deliliw lamɛn wa?

•  N’ be se ka delili kɛ mun lo koo la?

•  I filankuruw be min miiri

 Ka delili kɛ, o kɔrɔ ko ka kumaɲɔgɔnya kɛ ni duniɲa kuru bɛɛ Danbaga ye. Miiri o la k’a filɛ! Jehova Ala ka bon ni adamadenw ye fɔɔ ka taga ka na. Nka, a “do yɔrɔ man jan an si la.” (Kɛwaliw 17:27). Bibulu yɛrɛ b’an jija ko: “Aw ye gwɛrɛ Ala la, ale fana bena gwɛrɛ aw la.” O be mɔgɔ kabakoya dɛ!—Zaki 4:8.

 I be se k’i magwɛrɛ Ala la cogo di?

•   O kɛcogo dɔ ye k’a deli: o cogo la, i be kuma Ala fɛ.

•   O kɛcogo wɛrɛ ye ka Bibulu sɛgɛsɛgɛ: o cogo la, Ala be “kuma” i fɛ.

 N’i be kumaɲɔgɔnya kɛ ni Ala ye (delili fɛ ani Bibulu sɛgɛsɛgɛri fɛ), o bena i dɛmɛ ka teriya sɔbɛ kɛ ni Ala ye.

 “Ka kuma Jehova fɛ, ale min ye Kɔrɔtaninba ye, o ye nɛɛmaba ye min ɲɔgɔn tɛ yen adamadenw fɛ.”—Jeremy.

 “Ni n’ be n’ dusukunnakow fɔ Jehova ye delili la, n’ b’a ye ko n’ magwɛrɛnin lo a la kosɔbɛ.”—Miranda.

 Hali n’i lanin be Ala la, ani hali n’i b’a deli, a be se ka gwɛlɛya i ma ka la a la ko a b’i lamɛnna. O n’a ta bɛɛ, Bibulu b’a fɔ ko Jehova “be daaliliw mɛn” (Zaburuw 65:3). Bibulu yɛrɛ b’i jija ko i k’i “ka haminakow bɛɛ to a bolo.” Mun na do? ‘Bari a be janto i la.’—1 Piyɛri 5:7.

 Miiri k’a filɛ: Yala i be wagati ta ka kuma n’i teri sɔbɛw ye tuma o tuma wa? I be se k’o kelen kɛ ni Ala ye. A deli tuma o tuma, ani i ka deliliw la, a tɔgɔ fɔ ko Jehova (Zaburuw 86:5-7; 88:10). Tiɲɛn na, Bibulu b’i jija ko i “kana Aladali dabila.”—1 Tesalonikaw 5:17.

 “Delili ye kumaɲɔgɔnya ye ne ni n’ sankolola Faa cɛ. O wagati la, n’ be n’ kɔnɔkow bɛɛ fɔ a ye.”—Moises.

 “Ni n’ be kuma Jehova fɛ, n’ be koo bɛɛ fɔ a ye i n’a fɔ n’ be kumana ni n’ bamuso wala n’ terimuso sɔbɛ dɔ ye.”—Karen.

 Bibulu b’a fɔ ko: “Fɛn o fɛn ko bɛ aw la, aw ka o ɲini Ala fɛ ni deliliw ni delilibaw ni barika dali ye.”—Filipikaw 4:6, Bible Senuma.

 O kɔrɔ ko i be se ka kuma Ala fɛ i ka gwɛlɛyaw koo la wa? Ɔnhɔn kɛ! Bibulu yɛrɛ b’a fɔ ko: “E k’i ka koow to Masaba [Jehova] bolo, a bena i dɛmɛ.”—Zaburuw 55:23.

 Ayiwa, n’i be Ala delila, kana kuma i ka gwɛlɛyaw dɔrɔn koo la. Sunguru dɔ, min tɔgɔ ko Chantelle, ale y’a fɔ ko: “Tiɲɛn lo ko n’ be kuma Jehova fɛ ni n’ mako be dɛmɛ na. Nka, ni n’ tun be dan o wagatiw dɔrɔn ma, an ka teriya tun tɛna diya. Ne ka miiri la, n’ ka ɲi ka barika la a ye fɔlɔ le. Ani, n’ ka ɲi k’o kɛ koo caaman kosɔn.”

 Miiri k’a filɛ: I be Jehova waleɲuman lɔn mun ni mun lo kosɔn? Miiri koo saba koo la i be se k’a waleɲuman lɔn minw kosɔn bi loon na.

 “Hali koo dennin dɔw be se k’an lasun ka Jehova deli walisa k’a waleɲuman lɔn, i n’a fɔ ka flɛru cɛɲumanin dɔ filɛ.”—Anita.

 “Miiri Jehova ka danfɛn dɔ koo la min b’i kabakoya, wala Bibulu ka vɛrise dɔ la min ye i dusukun sɔrɔ kosɔbɛ. Ani, barika la Jehova ye o kosɔn.”—Brian.